Smá minnisatriði fyrir okkur foreldra

Ég er um þessar mundir með fræðslu fyrir foreldra 6 ára barna á svo kölluðum Skólafærnisnámskeiðum sem fjölmargir grunnskólar halda fyrir foreldra fyrstu bekkinga. 

Á klukkutíma fyrirlestri fer ég víða allt frá ágripi af þroskasálfræði og yfir í hvernig undirbúa megi barnið fyrir grunnskólagönguna. 

Mér datt í hug að deila einu atriði úr þessum fyrirlestri með foreldrum hér á blogginu sem ég held að gott sé að minna sig reglulega á.  Það er hversu mikilvægt það er að við foreldrar skeytum ekki skapi á börnunum okkar.

Öll föllum við endrum og sinnum í þessa gryfju.  Börn, sérstaklega þessi litlu kríli hafa viðkvæmar sálir.  Ef við látum okkar vanlíðan sem stundum birtist í geðvonsku bitna á þeim þá halda þau mörg hver að þau hafi gert eitthvað af sér eða að þau hafi ekki verið nógu þæg.  Sumum finnst sem þau eigi að reyna að gera eitthvað til að mömmu/pabba líði betur og taki gleði sína á ný.

Unglingarnir taka þetta ekkert síður nærri sér og velja þá oft bara að forða sér út eða inn í herbergið sitt.

Að finnast maður vera ábyrgur fyrir líðan foreldra sinna er mikil byrði fyrir ung börn.
Þess vegna er svo gott að hlífum þeim sem mest við getum ef okkur sjálfum líður eitthvað illa.

Athugasemdir

[Sigríður Gunnarsdóttir, 24.9.2007 kl. 07:18]

Mæl þú manna heilust. Þetta er svo satt og þörf áminning.

[Heiða Þórðar, 24.9.2007 kl. 11:08]

Sammála Sigríði...

[Ragnheiður , 24.9.2007 kl. 13:34]

Fín áminning og afar þörf. Takk fyrir pistilinn.

[Heimir Lárusson Fjeldsted, 24.9.2007 kl. 22:06]

http://hlf.blog.is/blog/hlf/#entry-320634

[Ásthildur Cesil Þórðardóttir, 25.9.2007 kl. 12:15]

Góð áminning og þörf.  Ég var að hlusta á viðtal hjá Margréti Blöndal við skólastjóra missti af í hvaða skóla,  hann er með samverustund alla morgna með öllum krökkunum, þau segja öll upphátt að þau séu í skóla til að læra og ganga vel, síðan syngja þau nokkur lög og hafa síðan þagnarstund í þrjár mínútur.  Mér fannst þetta svo frábært.  Þau fá líka kennslu í að koma fram og standa frammi fyrir öllum bekknum alveg frá byrjun.

Börn sem koma út úr skóla með svona í farteskinu hljóta að geta betur fótað sig inn í framtíðina. Ég tek ofan fyrir þessum skólastjórnanda.  Hann var sennilega frá Akureyri, en sem sagt ég missti af byrjuninni.

Ég var nokkur ár með leiklistakennslu í litlum skóla og það var ótrúlegt hvað börnin lærðu og við gátum tekið á allskonar hlutum eins og einelti.  Svo lauk vetrinum með sýningu sem við settum upp og sýndum fyrir foreldra og aðra.  Ég held að það sé nauðsynlegt að vera með slíka kennslu og uppbyggingu sálarinnar ekki síður en líkamans.  Það getur fleytt börnum ótrúlega langt.

[Kristín Katla Árnadóttir, 25.9.2007 kl. 14:56]

Mjög góð áminning takk fyrir þetta.