Er það tímaspursmál hvenær hægt verður að greiða fyrir vörur með evrum í verslunum á Íslandi?

Ef litið er til umræðu síðustu daga um krónuna og evruna þá finnst manni eins og það sé tímaspursmál hvenær við förum að greiða með evrum í verslunum hér á Íslandi.

Ýmsir sérfræðingar á sviði peningamála segja að krónan og evran geti lifað góðu lífi saman næstu árin og að ekki sé nein knýjandi nauðsyn að breyta skipan gjaldeyrismála með formlegum hætti.   

Æ fleiri fyrirtæki eru að taka upp annan gjaldmiðil, gera upp og greiða laun aðallega í evrum.

Ekki er annað hægt en að spyrja sig hvort staðan sé að verða þannig að skammt sé í að íslenskir kaupmenn sem kaupa inn í evrum kjósi einnig að selja vöruna í evrum? 

Athugasemdir

[Marinó G. Njálsson, 11.11.2007 kl. 17:31]

Það er annað hvort það eða við förum sömu leið og Danir og Svíar og tengjum krónuna við ervuna á föstu gegni.  Þannig getum við tekið upp evruna en samt haldið krónunni.  Þetta er aðferð sem við höfum beitt áður, en þá var tengingin við myntkröfu.

[Óttarr Makuch, 11.11.2007 kl. 20:50]

"Er það tímaspursmál hvenær hægt verður að greiða fyrir vörur með evrum í verslunum á Íslandi?"  Er fyrirsögn bloggsins hjá þér í dag en ég má til með að benda á að það hefur lengi verið hægt að greiða í flestum verslunum landsins með öllum helstu gjaldmiðlum heims þ.m.t evrum.

[Þorkell Sigurjónsson, 11.11.2007 kl. 21:04]

Þetta sýnir þá einföldu staðreynd, að allt fer í hringi í tilverunni. Fyrir margt löngu voru hér á Íslandi notaðar spesíur sem gjaldmiðill, þannig að nú virðist hringnum lokað með öðrum gjaldmiðli en góðu Íslensku krónunni.

[Kolbrún Baldursdóttir, 12.11.2007 kl. 10:07]

Ég hef ekki hugsað út í það að hægt sé að greiða í flestum verslunum með öðrum gjaldmiðli en krónunni.
Ferðamenn greiða auðvitað oft með evrum og dollurum fremur en að skipta yfir í íslenskar krónur.
Ég hef lengi gengið með 5 evrur í veskinu frá því ég var í Berlín. Kannski ég athugi hvort ég geti ekki losnað við þær í næstu verslunarferð.

Það sem ég velti nú fyrir mér er hvort stutt sé jafnvel í að vörur verði t.d. merktar bæði með íslenska verðinu og evruverðinu og þá jafnvel að varan sé seld ódýrari ef greitt er með evrum.