Bleikt á stelpur, blátt á strákana eða kynhlutlausa liti á nýburana?

Umræðan um þá hefð sem skapast hefur á fæðingardeildum hins opinbera hefur fallið í misjafnan jarðveg hjá fólki og sitt sýnist hverjum eins og gengur.

Sjálf er ég þeirrar skoðunar að sú hefð að klæða nýfæddar stúlkur í bleikt og strákana í blátt er ágætis hefð sem engin ástæða er til að varpa fyrir róða. 
Væri ég nýbökuð móðir í dag myndi ég vera fyllilega sátt við þetta litaval á kynin.

Þeim foreldrum sem líkar þessi hefð illa ætti einnig að vera í frjálst að velji aðra liti á börn sín þá fáu daga sem þau dvelja á fæðingardeildinni.

Þetta atriði hefur að gera með smekk, stíl, viðhorf og gildismat og því ekkert til fyrirstöðu að fólk hafi um það val. 

Ég vona sannarlega að þingmenn fari ekki að eyða of miklum tíma í þessa umræðu enda brýnni mál sem bíða.

Athugasemdir

[Birna Dis Vilbertsdóttir (IP-tala skráð) 4.12.2007 kl. 12:13]

Ég er svo sammála þér með þetta.Það er verið að reyna að gera allt kynlaust. Við eigum að vera stolt af því kyni sem við tilheyrum. Hvort sem það er kona eða maður.

[halkatla, 4.12.2007 kl. 16:36]

það eina sem skiptir máli er að það sé komið eins fram við nýfæddu börnin, sama í hvorn litinn þau eru klædd (mjög víða væri það nefninlega ekki gert, við erum mjög heppin að drengir og stúlkur séu alveg jafn mikils metin hér)

ég er semsagt sammála því að það sé alveg fáránlegt að vera að breyta þessu með litina (samt finnst mér þetta engan vegin töff né nauðsynlegt og bleikt og blátt eru ekki einu sinni flottir litir, hvað varð t.d um röndótt?)

[Gúnna, 4.12.2007 kl. 23:01]

Heyrheyr Kolla. Mér finnst alveg með ólíkindum ef fara á að gera eitthvað stórmál úr þessu. Það eru svo ótal mörg brýn mál í þjóðfélaginu sem alþingi ætti frekar að taka á. Ef ráðamenn þjóðarinnar fara að gleyma sér yfir svona smáatriðum er ekki von á bjartari framtíð fyrir börnin okkar - hvort sem þau verða þá öll í hvítu, bleiku eða bláu.

[Jóna Kolbrún Garðarsdóttir, 5.12.2007 kl. 01:58]

Mér finnst að foreldrarnir eigi að ráða því hvernig börnin þeirra eru klædd, hafa val um bleikan, bláan, hvítan eða hvaða annan lit sem er í boði.  Þetta kemur ekki starfsfólki fæðingardeildarinnar ekkert við

[Ásta Gunnlaugsdóttir, 5.12.2007 kl. 02:59]

Börnin geta varla séð nógu skýrt til að greina andlitsdrætti skýrlega, hvað þá gert sér grein fyrir hvaða lit þau eru í.

Þetta eru ungabörn, þeim er sama. Þegar þau fá vitsmuni ætti þeim að vera leyft að ganga í hvaða litum sem þeim þóknast, en inni á vöggudeildum er þetta afskaplega þægilegt 'kerfi' á að finna auðveldlega út hvort barnið er strákur eða stelpa. 

Ef aðrir litir væru teknir upp verður hugsanlega gulur hinn nýi bleikur og grænn hinn nýi blár. Maður breytir ekki innréttingunni bara með því að mála veggina.

[Hlynur Hallsson, 5.12.2007 kl. 07:58]

Ég er sammála Jónu í þessu. Auðvitað eiga foreldrarnir að ráða því hvernig nýburarnir eru klæddir. Það að vísa í hefð (sem er ekki mjög gömul, innan við 50 ára) eru ekki sterk rök. Ég vil fjölbreytni á þessu sviði sem og öðrum og tek einnig undir með Önnu: Hvað varð um röndótt? Bestu kveðjur,

[Ásthildur Cesil Þórðardóttir, 5.12.2007 kl. 11:48]

Ég er sammála Kolbrúnu B. hér, það skiptir ekki máli með litinn.  Ef fólk sættir sig ekki við að drengurinn eða stúlka séu klædd í bleikt eða blátt þá ætti að vara hægt að nota gult eða grænt.  En rökin með að þekkja hvort kynið er, finnst mér vera góð.  Til dæmis eru ekki samskonar bleyjur fyrir bæði kynin.  Vegna þess að þau hafa jú sitt hvort kynfærið ekki satt.  Það er hér verið að gera stór mál úr litlu. 

[Guðjón Sigþór Jensson, 5.12.2007 kl. 12:13]

Mosi hvetur alla að lesa betur hvað Kolbrún Halldórsdóttir spyr um í fyrirspurn sinni. Það er ótrúlegt hve margir eta upp vitleysuna hver eftir öðrum án þess að kynna sér betur um hvað málið snýst. Fyrir vikið minnir þetta á frægt ævintýri eftir H.C. Andersen um fjaðrinar sem urðu að dauðum hænum! Eins og lesa má er fyrirspurnin ákaflega kurteislega og hóflega orðuð eins og Kolbrúnu er von og vísa. En það eru ýmsir sem telja sig ekkert hafa þarfara með tímann að gera en að snúa út úr og gera lítið úr störfum annarra.

Fyrirspurnina má lesa hér á eftir.

Mosi

135. löggjafarþing 2007–2008. Þskj. 318 — 284. mál.

Fyrirspurn til heilbrigðisráðherra um aðgreiningu kynjanna við fæðingu. Frá Kolbrúnu Halldórsdóttur.   

1. Hvernig hefur sú hefð mótast á fæðingardeildum opinberra sjúkrastofnana að nýfædd stúlkubörn eru klædd í bleikt en drengir í blátt og þeir auðkenndir með bláum armböndum og stúlkur með bleikum? 

2. Telur ráðherra koma til greina að þeirri hefð verði breytt á þann veg að nýfædd börn verði ekki aðgreind eftir kyni með bleikum og bláum armböndum og að þau verði framvegis klædd í hvítt eða aðra kynhlutlausari liti?

[Kolbrún Baldursdóttir, 5.12.2007 kl. 19:34]

Ég fór nú að hugsa þegar ég las athugasemdirnar sem komnar eru í tengslum við þessa bloggfærslu hvort þetta sé málefni sem á heima á þinginu yfir höfuð? 
Stendur það einhversstaðar í lögum í hvað (hvaða lit) nýburar skulu klæðast?  Er þetta ekki bara spurning um að LSH taki ákvörðun um að gefa þeim sem eru ósáttir við þann klæðnað og litaval sem LSH bíður upp á að þeir komi sjálfir með klæðnað á börn sín.

Nú ráða konur mikið til hvort þær vilji dvelja allan þann tíma á fæðingardeildinni sem þeim stendur til boða, gefið að móður og barni heilsist vel.
Maður skildi því halda að umfjöllun og ákvörðun um klæðnað nýbura ætti fyrst og fremst heima innan LSH.