Stýrihópur um þjónustu borgarinnar við gæludýr

Eins og margir kannski vita þá hef ég lagt fram nokkrar tillögur er varða gæludýr og hundamál og má sjá þær hér neðar í færslunni. En nú hefur verið stofnaður stýrihópur hjá borginni sem fara á yfir þjónustu borgarinnar við gæludýr. Ég hef spurt formanninn hvort þessi mál sem öllum var vísað til umhverfis- og heilbrigðisráðs muni koma til skoðunar hjá hópnum. Hann svaraði því reyndar ekki en sagði að vinna taki nokkra mánuði og haft verði samráð við hagsmunaaðila. Ég hef miklar áhyggjur af þessu. Samráð þessa meirihluta við hagsmunaaðila hafa hingað til verið meira á orði en á borði.

Tillögur um hunda og gæludýr:

 

13. september 2018 lagði ég fram tillögu um að hunda- og kattahald yrði leyft í félagslegum íbúðum í Reykjavík. Tillögunni var vísað til stjórnar Félagsbústaða þar sem hún var í vinnslu heila meðgöngu en var síðan samþykkt.

Undir lok síðasta árs lagði ég fram nokkrar tillögur:

 

Tillögu um að heimilt verði að halda katta- og hundasýningar í íþróttahúsum

 

Tillaga um að rýmri reglur verði fyrir gæludýr í strætisvögnum

 

Tillaga um að Reykjavíkurborg hefði frumkvæði að því að heilbrigðisnefnd Reykjavíkur fái undanþágu frá reglugerð um hollustuhætti og að samþykkt um hundahald verði endurskoðuð m.t.t. undanþágu frá reglugerðinni um:

 

1. Að gæludýr hafi aðgang að kaffihúsum með eigendum sínum þar sem rekstraraðilar leyfa.

2. Gæludýr hafi aðgang að verslunarmiðstöðvum nema annað sé tekið fram.

3. Einnig er lagt til að hundaleyfisgjaldið verði nýtt til að bæta aðstöðu fyrir hundaeigendur í borginni. Gjaldið er nú notað til að greiða starfsemi hundaeftirlits borgarinnar.

 

Tillaga um að hundagjald hundaeigenda sem eru öryrkjar og/eða eldri borgarar verði fellt niður

 

Tillaga um að hundaeftirlitsgjald verði notað í þágu dýr og eigenda þeirra í ríkari mæli en gert er

 

Tillaga um að lagfæringar verði gerðar á hundasvæðinu í Geirsnefi og sá peningur sem innheimtur er með hundaeftirlitsgjaldi verði nýttur til þess.

 

Færum dýrahald í borginni til nútímans
Gæludýr, þar með taldir hundar og kettir, eru hluti af lífi fjölmargra og skipa stóran tilfinninga- og félagslegan sess í hjörtu eigenda þeirra. Öll þekkjum við ýmist persónulega eða hjá vinum og vandamönnum hvernig gæludýr geta dimmu í dagsljós breytt, ekki síst hjá þeim sem eru einmana. Margar rannsóknir hafa sýnt fram á góð áhrif af umgengni manna við dýr. Rannsóknir sýna að umgengni við dýr eykur tilfinningalega og líkamlega vellíðan og eykur m.a. sjálfstraust, einbeitingu, athygli sem og minnkar streituviðbrögð. Dýr veita einstaklingnum vinskap, líkamlega snertingu og sýna áhuga og væntumþykju án nokkurra skilyrða. Ást til gæludýrs getur verið djúpstæð. Hundar og kettir eru til dæmis oft hluti af fjölskyldunni. Sú sorg sem nístir þegar gæludýr fellur frá eða er aðskilið frá eiganda sínum þekkjum við mörg, ef ekki af eigin reynslu þá annarra.

Harmageddon í morgun, leikskólamál, byggðasamlög og Sorpa til umræðu

Ég var í viðtali í Harmageddon í morgun. Alltaf svo gaman að hitta strákana þar. Við ræddum styttingu opnunartíma leikskólanna, galla við byggðasamlög fyrir sveitarfélag eins og borgina sem á stærsta hluta í þeim en hefur ekki áhrif í samræmi við það og svo auðvitað málefni Sorpu.

Ég hef sterkar skoðanir á þessu leikskólamáli sem ég byggi mest á þekkingu og reynslu minni sem sálfræðingur og auðvitað reynslu minni sem móður og ömmu. Langflestum börnum þykir gaman á leikskóla enda líður þeim þar vel. Samvera við önnur börn er sérhverju barni bráðnauðsynleg. Ég vil að foreldrar séu hafðir með í ráðum þegar díla og víla á um börn þeirra og leikskólann.

Aðstæður foreldra eru mismunandi og samfélagið verður að bjóða upp á rúmt val. Gleymum því ekki að vegna ófremdarástands í umferðarmálum eru margir foreldrar kannski 45 mínútur að komast frá vinnustað sínum til leikskóla barna sinna. Fæstir vinna á sama stað og þeir búa og flest börn eru í leikskóla í hverfinu sem þau búa.

Ég vil að horft sé á grunnvandann sem er mannekla og undirmönnun. Þetta er áherslan sem meirihlutinn vill ekki ræða. Það er mannekla og undirmönnun í Dagdvöl aldraðra. Er það næsta á dagskrá að stytta opnunartíma þar kannski? Það hljóta allir að sjá á hvað vondu leið við erum í þessum málum. Það kostar að veita góða þjónustu og það er eitthvað sem þessi borgarmeirihluti sem nú ríkir skilur ekki. Þetta er allt spurning um forgangsröðun og við í Flokki fólksins segjum FÓLKIÐ FYRST!

Lenska að senda framkvæmdastjóra heim en stjórn fríar sig ábyrgð

Ber ekki stjórn fyrirtækis höfuðábyrgð á rekstri þess? Í annað sinn á stuttum tíma er framkvæmdastjóri í fyrirtæki í eigu borgarinnar sendur heim en stjórnarformaður situr sem fastast og stjórnin öll ef því er að skipta. Þetta mátti sjá hjá Félagsbústöðum en þar pakkaði framkvæmdastjóri saman en stjórnarformaður til langs tíma sat sem fastast og situr enn. Nú er sama upp á teningnum hjá Sorpu.

Skýrsla innri endurskoðunar er komin út og er svört. Ekki ætla ég á þessu stigi að setja mig í dómarasæti en mér finnst skjóta skökku við að framkvæmdarstjóri taki alla ábyrgð á mistökum, klúðri eða hvað eina sem þarna hefur verið í gagni á meðan stjórn fríar sig ábyrgð. 

Í morgun lagði ég fram eftirfarandi tillögu í borgarráði:

Flokkur fólksins leggur til að stjórnarmaður Reykjavíkur í Sorpu víki sæti úr stjórn og ætti í raun öll stjórnin að segja af sér. Henni hefur mistekist hlutverk sitt.
Enn ein svört skýrsla innri endurskoðunar hefur birst á þessu kjörtímabili sem varla er hálfnað og snýr nú að stjórnarháttum Sorpu. Í skýrslunni koma fram  ástæður fram­úr­keyrslu sem varð á áætl­uðum fram­kvæmda­kostn­aði vegna bygg­ingar gas- og jarð­gerð­ar­stöðvar í Álfs­nesi og mót­töku­stöðvar í Gufu­nesi. Framkvæmdarstjórn, undir stjórn stjórnar Sorpu hafði lagt til að tæpum 1,4 millj­örðum króna yrði bætt við fjár­hags­á­ætlun fyr­ir­tæk­is­ins vegna næstu fjög­urra ára.  Innri end­ur­skoðun Reykja­vík­ur­borgar gerði jafn­framt úttekt á stjórn­ar­háttum félags­ins og fann þar margt athugavert og jafnvel ámælisvert. Að sögn fram­kvæmda­stjóra höfðu hvorki stjórn­ar­for­maður né aðrir stjórn­ar­menn frum­kvæði að því að afla upp­lýs­inga um heild­ar­kostnað á hverjum tíma til að gera við­eig­andi sam­an­burð við áætl­an­ir. Í kjölfari áfellisdóms sem stjórnin fær hlýtur stjórnarmaður Sorpu að víkja úr stjórn? Það er varla hægt að henda allri ábyrgðinni á framkvæmdarstjórann? Ábyrgðin hlýtur fyrst og fremst að vera stjórnarinnar í þessu máli. Stjórn Sorpu reynir að fría sig ábyrgð m.a. með því að segja að hún hafi kallað eftir úttekt innri endurskoðunar.

 

Greinargerð

Í skýrslunni eru marg­hátt­aðar athuga­semdir. Á meðal þess sem fram kemur í skýrsl­unni að stýri­hópur eig­enda­vett­vangs og rýni­hópur stjórnar Sorpu, sem áttu að hafa eft­ir­lit með verk­efn­inu, hafi reynst lítt virk­ir. Þá hafi fram­vindu­skýrslur fram­kvæmda­stjóra til stjórnar vegna bygg­ingar GAJA verið ómark­vissar og stundum með röngum upp­lýs­ing­um, auk þess sem skýrslu­gjöf hefði átt að vera reglu­bundn­ari. Í skýrslu innri endurskoðunar segir m.a.: „Full­nægj­andi upp­lýs­inga­gjöf og mis­vísandi orða­notkun í skýrslum til stjórnar var sér­stak­lega óheppi­leg þar sem stjórn Sorpu var að meiri­hluta skipuð nýjum full­trúum eftir sveit­ar­stjórn­ar­kosn­ing­arnar 2018 auk þess sem nýr for­maður stjórnar hafði ekki verið áður í stjórn.“

Varla er búið að gleyma því að stjórn Sorpu óskaði nýlega eftir að Reykjavík veiti samþykki sitt fyrir lántöku vegna mistaka sem gerð voru hjá Sorpu. Sótt var um 990 milljóna króna lán hjá Lánasjóði sveitarfélaga. Engar haldbærar skýringar voru gefnar fyrir því að það vantaði rúman 1.6 milljarð inn í rekstur Sorpu. Stjórnarmeðlimur borgarinnar í Sorpu var bara pirruð á minnihlutanum að samþykkja þetta ekki möglunarlaust í borgarstjórn. Meirihlutinn í borginni spurði einskis, gekk bara þegjandi í ábyrgð fyrir láni af þessari stærðargráðu. Reykjavík sem meirihlutaeigandi situr í súpunni þegar kemur að þessum byggðasamlögum. Borgin tekur mesta skellinn á meðan hin sveitarfélögin sigla lygnari sjó. Flokkur fólksins bar fram tillögu um að borgin skoði fyrirkomulag byggðasamlaga með tilliti til lýðræðislegra aðkomu borgarbúa að þeim. Hún var ekki samþykkt. Í ítrekuðu klúðri Sorpu kristallast þetta. Ef borgin ætlar að halda áfram að vera í byggðasamlagi þá þarf fjárhagsleg ábyrgð Reykjavíkur á rekstri byggðasamlaga að vera meiri en ábyrgð annarra sveitarfélaga þá á Reykjavík jafnframt að hafa stjórnunarheimildir í samræmi við þá ábyrgð. Stjórnarmaður borgarinnar þarf einnig að vera manneskja sem er laus við meðvirkni og er tilbúin að spyrna við fótum sé eitthvað rugl sýnilega í gangi.

Tillögunni var frestað

Það sem svo gerist er að hún er tekin fyrir næst og felld eða vísað frá 

Mér finnst talað niður til foreldra í þessu máli, þeir alla vega ekki spurðir um neitt

Vanmetum ekki foreldra

Vísbendingar eru um að meirihlutinn í borginni endurskoði ákvörðun sína um styttingu opnunartíma leikskóla. Fram hefur komið að nú eigi að gera jafnréttismat og hafa samráð við foreldra sem ekki var gert áður en þessi ákvörðun var tekin. Fram hefur einnig komið að þessi ákvörðun verði ekki staðfest í borgarráði 23. janúar eins og upphaflega stóð til. Tilkynnt hefur verið að þessi breyting taki ekki gildi 1. apríl eins og upphaflega stóð til.

Ákvörðun um styttingu opnunartíma leikskóla var samþykkt í skóla- og frístundarráði fyrir stuttu og kom flestum á óvart. Viðbrögðin hafa ekki látið á sér standa. Rökin fyrir ákvörðuninni eru sett í tilfinningalegan búning og tengd við hvað sé barni fyrir bestu. En um það er varla deilt. Hin raunverulega ástæða tel ég vera viljaleysi borgaryfirvalda að hækka laun og bæta aðstæður starfsmanna á leikskólum.

Hagsmunir barna ráða för

Foreldrar þekkja börn sín, líðan þeirra og þarfir. Sjái foreldrar að níu tímar á dag er of mikið fyrir börn sín á leikskóla bregðast flestir við með því að sækja þau fyrr alltaf þegar þau geta það. Ekki á að vanmeta foreldra eða ganga út frá því að þeir vilji geyma barnið sitt sem lengst í leikskólanum. Börn eru misjöfn í eðli sínu og á þeim er dagamunur eins og gengur. Langflestum börnum þykir gaman á leikskóla enda líður þeim þar vel. Samvera við önnur börn er sérhverju barni bráðnauðsynleg. En áríðandi er, sýni barn leiða og þreytu síðasta klukkutímann í leikskólanum, að foreldrar séu upplýstir um það til að geta leitað annarra leiða þótt ekki væri nema hluta vikunnar. Hagsmunir barna eiga ávallt að ráða för.

Það er ekki hlutverk skóla- og frístundarráðs að ala upp foreldra þótt vissulega sé sjálfsagt að koma með ábendingar. Ákvörðun sem þessi hefur víðtæk áhrif á vinnumál mjög margra foreldra.  Kerfisbreytingin mun  leiða til aukins ójafnvægis og álags fyrir hóp foreldra nema hún sé tekin í samráði við alla hlutaðeigandi aðila. Hún þarf einnig að vera tekin í takti við aðstæður foreldra, atvinnulífið og umræðuna um styttingu vinnuvikunnar. Stytting vinnuviku er nú eitt helsta baráttumál verkalýðshreyfingarinnar. Vegna þess hversu aðstæður eru mismunandi hjá foreldrum er mikilvægt að hafa val. Hvort félagsþjónustan geti fundið viðeigandi lausnir fyrir þá foreldra sem lenda í vandræðum verði opnunartími leikskóla styttur er stór spurning.  Það er heldur ekki lausn að setja ábyrgðina um sveigjanlegan opnunartíma í samræmi við þarfir foreldra alfarið á herðar leikskólanna eins og Sjálfstæðisflokkur lagði til í borgarstjórn. Ef öllum foreldrum stendur ekki til boða sami opnunartími býður það upp á hættu á mismunun. Ráðast þarf að rót vandans sem er mannekla og rót mannekluvanda eru lág laun í leikskólum. Einnig þarf að finna leiðir til að létta á álagi og má gera það t.d. með því að vaktaskipta deginum. Lítið pláss og mannekla einkenna leikskóla og það hefur neikvæð áhrif á börn og starfsfólk. Áherslan ætti að vera á að tryggja að slíkar aðstæður séu aldrei  í leikskólastarfi.

Kolbrún Baldursdóttir borgarfulltrúi Flokks fólksins

 

Hundaeftirlitið barn síns tíma

Það þarf að skoða hundamálefni borgarinnar ofan í kjölinn með það fyrir augum að færa allt dýrahald til nútíðar. Ég vil að innri endurskoðandi fari í rekstrarúttekt á hundaeftirliti Reykjavíkur. Ég hef sent beiðni um það á skrifstofu innri endurskoðanda og lagði eftirfarandi tillögu fram í borgarráði í gær:

Tillaga Flokks fólksins að innri endurskoðun geri úttekt á hundaeftirliti Reykjavíkur.

Flokkur fólksins leggur til að innri endurskoðun geri úttekt á hundaeftirlitinu en hlutverk innri endurskoðunar er að stuðla að hagkvæmari og skilvirkari nýtingu á fjármunum stofnana. Í ljósi megnrar óánægju með hundaeftirlit borgarinnar m.a. það árlega gjald sem hundaeigendum er gert að greiða og sem talið er að fari að mestu leyti í yfirbyggingu og laun er nauðsynlegt að innri endurskoðun fari í úttekt á hundaeftirlitinu. Hundaeigendur greiða um 35 milljónir á ári í hundaleyfisgjöld til að halda uppi hundaeftirlitinu. Hundaeftirlitsgjaldið er ekki notað í þágu hunda t.d. til að lagfæra svæðið á Geirsnefi og gera ný hundagerði. Margir hundaeigendur telja að það kunni að vera brotin lög gagnvart hundaeigendum með því að nota hundagjöld til annarra útgjaldaliða en kveðið er á um í lögum. Engar vinnuskýrslur liggja fyrir t.d. í hvað þetta fjármagn fer í. Allir vita að umfang eftirlitsins hefur minnkað og verkefnum hundaeftirlitsins hefur fækkað verulega á undanförnum árum. Árið 2019 voru kvartanir 84 en fyrir fáeinum árum margfalt fleiri. Fjöldi lausagönguhunda er varla teljandi enda sér hundasamfélagið á samfélagsmiðlum um að finna eigendur lausagönguhunda. Því er tilefni til að athuga hvort úrbóta sé þörf á starfsemi hundaeftirlitsins eða hvort tilgangur þess og hlutverk hafi ekki runnið sitt skeið á enda.

 

Leigubílanotkun embættis- og starfsmanna borgarinnar

Þegar ég mæti á viðburð t.d. opnun af einhverju tagi hjá borginni þá sé ég ávallt nokkra leigubíla koma með starfsmenn borgarinnar. Stundum er bara einn starfsmaður í bíl.

Í gær á fundi velferðarráðs lagði ég fram eftirfarandi fyrirspurn:

Fyrirspurn Flokks fólksins um leigubílanotkun velferðarsviðs og ráðs

Fulltrúi Flokks fólksins óskar eftir upplýsingum um leigubílanotkun starfsmanna sviðsins og ráðsins sundurliðað eftir erindum, deildum og starfstitli á árunum 2019 og 2018. Einnig er óskað eftir upplýsingum um hvort einhverjar starfsreglur eða einhver viðmið gildi um leigubílanotkun á vegum borgarinnar sem veiti leiðsögn um hvenær eigi að kaupa leigubifreiðaakstur og hvenær ekki. Leigubílar eru nýttir í miklum mæli af starfssviðum Reykjavíkurborgar og allra mest af velferðarsviði. Það er því mikilvægt að borgarbúar geti treyst því að ekki sé verið að bruðla með almannafé og að leigubílar séu aðeins nýttir sem úrræði þegar önnur ódýrari úrræði koma ekki til greina. Því biður fulltrúi Flokks Fólksins um aðgang að upplýsingum um leigubílanotkun velferðasviðs.

Stórkostlegt tap bílastæðasjóðs?

Tvær af mjög góðum tillögum Flokks fólksins voru látnar róa á fundi skipulags- og samgönguráðs í morgun. Önnur var að eldri borgarar fái að leggja frítt í bílastæðahúsum borgarinnar um helgar. Hin að borgarfulltrúar kolefnisjafni ferðir sínar erlendis úr eigin vasa.

Ég á ekki sæti í skipulags- og samgönguráði en fæ sem betur fer tækifæri til að bóka afstöðu Flokks fólksins á fundi borgarráðs á morgun þegar fundargerð skipulagsráð verður lögð þar fram.

Þær bókanir verða svona:

 

Meirihlutinn í skipulagsráði hefur fellt tillögu Flokks fólksins um að eldri borgarar fái að leggja frítt í bílastæðahúsum um helgar. Rökin eru að tillagan kalli á tekjutap bílastæðasjóðs. Hér má benda á að bærinn hefur tæmst af Íslendingum og þ.m.t. eldri borgurum. Þeim finnst aðgengi flókið, erfitt að fá stæði og eiga erfitt með að átta sig á nýjum stöðumælum. Það er sorglegt að sjá hvernig miðbærinn er orðinn að draugabæ nema á tyllidögum. Kannski fáeinir eldri borgarar hefðu nýtt sér frí stæði í bílastæðahús bæjarins hefði þessi tillaga orðið að veruleika og því enginn ástæða fyrir meirihlutanna að óttast að bílstæðasjóður beri stóran skaða af þótt þessi tillaga hefði verið samþykkt.

 

Tillaga um kolefnisjöfnuð úr eigin vasa hefur verið vísað frá af meirihlutanum í skipulags- og samgönguráði á þeim rökum að fagráð setji ekki reglur um hvernig fólk ráðstafi launum sínum. Flokkur fólksins spyr hvort meirihlutanum finnist borgarfulltrúar merkilegri en alþingismenn? Sambærileg tillaga hefur verið lögð fram á þingi af forseta Alþingis. Meirihlutinn ferðast á kostnað borgarbúa á sama tíma og hann kvartar yfir mengun frá bílum. Það er ekki nóg að setjast á hjólið og telja sig þá vera búinn að leggja sitt af mörkun til umhverfismála

Er borgin að virða lög?

Á morgun fer ég á fund skipulags- og samgönguráðs. Eitt af þeim málum sem ég mun leggja fram er fyrirspurn vegna nýrra umferðarlaga og varðar heimild fyrir p merkta bíla að aka göngugötur og leggja þar. Þessu viljum við í Flokki Fólksins fylgja fast eftir.

Hér er fyrirspurnin:

Nú hafa ný umferðarlög tekið gildi. Meðal nýmæla er undantekning frá akstursbanni um göngugötur sem felur í sér að bílar merktir með stæðiskorti fyrir hreyfihamlaða og bílar sem sinna akstursþjónustu fatlaðra mega nú nýta sér göngugötur og mega jafnframt leggja þar í merkt stæði. Flokkur fólksins spyr hvort borgin sé ekki að öllu leyti að virða þessi lög nú þegar vika er liðin síðan þau tóku gildi og hvort til standi að opna lokaðar göngugötur fyrir þeim bílum sem hafa nú heimild til að aka þar?

Yfir 600 börn bíða eftir sérfræðiþjónustu skóla

Á fundi velferðarráðs í desember voru lagðar fram biðlistatölur barna sem bíða eftir sérfræðiþjónustu skóla. Það eru 489 börn sem bíða eftir fyrstu þjónustu og 340 börn sem bíða eftir frekari þjónustu. Alls eru því 641 barn að bíða. Með sérfræðiþjónustu skóla er átt við sálfræðiviðtöl, kennslufræðilegt mat, talkennslu og sértækar greiningar á vanda barnanna sem foreldrar, kennarar og fleiri telja að barnið þurfi nauðsynlega á að halda. Fulltrúi Flokks fólksins hefur lagt fram formlega fyrirspurn um stöðu barnanna sem bíða eftir þessari þjónustu og sundurliðun á ástæðu tilvísunar.

Grípa verður til aðgerða
Ráðast verður til atlögu með markvissum og kerfisbundnum hætti til að stytta biðlista. Það verður einungis gert með því að fjölga fagfólki skólanna og skipuleggja störfin þannig að meiri skilvirkni náist. Við síðari umræðu um fimm ára áætlun Reykjavíkurborgar lagði Flokkur fólksins fram fimm breytingartillögur. Ein þeirra var tillaga um að fjárheimildir skóla- og frístundasviðs verði hækkaðar til að stytta biðlista. Lagt var til að ráðið yrði fagfólk tímabundið, tveir sálfræðingar og einn talmeinafræðingur til eins árs. Gert er ráð fyrir að kostnaður við þessi þrjú stöðugildi nemi 40,5 m.kr. Tillagan var felld.

Borgarfulltrúi Flokks fólksins hefur lengi talað fyrir að aðsetur skólasálfræðinga sé í skólunum þar sem sálfræðingarnir eru nálægt börnunum og til stuðnings og ráðgjafar við kennara og starfsfólk. Það myndi bæta skipulag og auka skilvirkni. Bið eftir þjónustu skapar óvissu og veldur börnum og foreldrum þeirra oft miklu álagi. Það hafa ekki allir foreldrar ráð á að leita sér aðstoðar með börn sín hjá sjálfstætt starfandi sálfræðingum. Við eigum að geta gert kröfu um að börn hafi gott aðgengi að allri þjónustu borgarinnar þar með talið sérfræðiþjónustu skólanna.