Hver er Stella Blómkvist?

Ég hef verið að lesa bækurnar hennar Stellu Blómkvist í sumarfríinu en þær fjalla um hina kjörkuðu Stellu sem er lögfræðingur í Reykjavík. Stella tekur að sér erfið mál og linnir ekki látum fyrr en hún hefur fundið lausnina.
Stella Blómkvist er dulnefni og mér skilst að ekki sé vitað hver rithöfundurinn er.  Bækurnar finnst mér alveg frábærar, stíllinn stuttur og hnitmiðaður og talsmáti Stellu sem oftar en ekki er býsna grófur er jafnframt oft mjög fyndinn. Ég tók eftir því hjá sjálfri mér að eftir að hafa lesið nokkrar bækur eftir Stellu var ég farin að taka upp talsmátan hennar, orðin all kjaftfor og farin að blóta í tíma og ótíma. Svona er nú hægt að vera áhrifagjarn á miðjum aldri.

Efni bókanna gengur út á að morð hefur verið framið, morð í Alþingishúsinu, morð í Hæstarétti, morð í Stjórnarráðinu og morð í sjónvarpinu, já meira að segja í beinni útsendingu.
Eftir að hafa lesið bækurnar hans Arnaldar Indriðasonar finnst mér eiginlega Stella skemmtilegri. Ég er þó all upptekin af því að spekúlera í hver höfundurinn  er. Þetta er að mínu viti klárlega kona frekar en karl þó konan á bókasafninu sem ég hef rætt þetta við segir að það séu getgátur um að þetta sé nefnilega karlhöfundur.  Enginn karl gæti skrifað svona um konu, það er ég alveg viss um.
Enda þótt ég sé ekkert sérlega vel að mér í bókmenntaheiminum þá dettur mér í hug hvort þetta geti verið hún Guðný Halldórsdóttir Laxness?  Gæti hún ekki skrifað einmitt svona texta?
Alla vega mæli ég með þessum bókum.

Athugasemdir

[Kolbrún Baldursdóttir, 10.7.2007 kl. 14:37]

Nei ekki Árni, hans stíll er einmitt langur, nákvæmur og lýsingar allt of yfirþyrmandi. Og Davíð, hjálpi mér, nei því mun ég aldrei trúa.

[Björg K. Sigurðardóttir, 10.7.2007 kl. 15:09]

Þetta eru skemmtilegar vangaveltur. Bloggaði einmitt um þetta einu sinni: http://bjorgkristjana.blog.is/blog/bjorgkristjana/entry/62077/

Ég held þetta gæti allt eins verið karlmaður sem skrifar þessar bækur. Laxness náði t.d. ótrúlega vel að lýsa tilfinningum kvenpersóna í bókum sínum og mér hefur oft fundist ótrúlegt að karlmaður hafi skrifað margt af því sem hann skrifaði.

Mér finnst kenning Tómasar athyglisverð, hef meira að segja heyrt þessa tilgátu áður.

[vs (IP-tala skráð) 10.7.2007 kl. 19:37]

Ég hef lengi velt þessu fyrir mér líka og er viss um að Stella er karl...

[Ragga Eiríks (IP-tala skráð) 10.7.2007 kl. 21:09]

Ég sé mig knúna til að leggja hér orð í belg og kveða í kaf allar pælingar um að Stella sé kona. Ástæður:

1. Kynórarnir í bókinni eru hreint ótrúlega karlmannlegir. Ljósbláar lessufantasíur með leðurífafi... þarf ég að segja meira?
2. Blautlegur lýsingarnar á sturtuferðum Stellu eru líka afskaplega óraunhæfar, sér í lagi þegar Stella gerir sér dælt við sjálfa sig löðrandi í sápu milli lappanna. Kvenfólk veit að sápulöður er fram úr hófi óæskilegt í sjálfsfróunarsamhengi og oft ávísum á hvimleiða sveppasýkingu.
3. Þetta með Jack Daniels er líka eitthvað svo testósterónlegt...

Ég er að minnsta kosti viss í minni sök.

[Már Högnason (IP-tala skráð) 10.7.2007 kl. 21:18]

Er rétt að leggja að jöfnu persónulega reynslu og lýsingar á prenti?

[Kristjana Atladóttir, 10.7.2007 kl. 22:51]

Ég hef einmitt oft velt þessu fyrir mér....og bloggað um það.  Ég held að Stella sé karlkyns og ég styð kenningu Tómasar.  Þetta er eitthvað sem ég gæti trúað Davíð að skrifa í laumi....

Og að leggja að jöfnu persónulega reynslu og lýsingar á prenti finnst mér auvitað algjör fjarstaða en það sem Ragga telur upp er alveg rétt. Skrifin eru mjög karlaleg og oft er Stella að brasa eitthvað sem konur mundu bara ekki gera eins og að nota sápu til sjálfsfróunar.  

[johanna (IP-tala skráð) 10.7.2007 kl. 23:43]

Ég er sammála því sem hefur áður komið fram að ég held að höfundurinn sé karlkyns...

Ég hef heyrt kenningar um Stefán Jón Hafstein...

[sigrun (IP-tala skráð) 11.7.2007 kl. 09:12]

já, algjörlega sammála ykkur Ellísabet og Kristjana, já og svo líka þegar kemur að því hvernig Stella klæðir sig. Þess endalausu " leðurdress" æi alls ekki eins "hipp og kúl" og höfundur virðis álíta.

[Ásgeir Rúnar Helgason, 12.7.2007 kl. 20:17]

Vilhelmina af Ugglas er EKKI Stella ,

svo mikið er ekki víst.

[Viðar Eggertsson, 13.7.2007 kl. 16:41]

Algjörlega sammála Röggu Eiríks, þessi lessupæling Stellu eru kynórar hetró karls og frekar klisjukennd.

Ég gæti trúað að þetta væri Árni Þórarins eða Páll Kr. Pálsson sem hefur skrifað með honum bækur og leikrit... Eða báðir saman.

[Elías Halldór Ágústsson, 13.7.2007 kl. 21:10]

Þetta allt er farið að minna á deilurnar um hvort Sir Francis Bacon hafi skrifað leikrit þau sem eru eignuð William Shakespeare. Mótrökin voru mörg hver skemmtileg, en best fundust mér þó sú að jú, víst gæti Bacon vel hafa skrifað leikrit Shakespeares, en það vekti hins vegar upp spurninguna um hver hafi skrifað rit þau sem hafa verið eignuð Sir Francis Bacon.

Mín kenning er að Stella sé eitt af eftirfarandi:

• Einhver maður eða kona útí bæ sem vill skrifa en forðast frægðina
• Rithöfundur sem er þekktur fyrir verk af gerólíkum toga
•  Einhver þekkt persóna úr blaðamennsku eða fræðiheiminum

Ég hef enga trú á að þetta geti verið Davíð Oddsson. Frekar gæti ég trúað því að það væri Kjartan Gunnarsson eða Hannes Hólmsteinn. Davíð er kannski betri penni en þeir báðir til samans, en hann er a.m.k. allt öðruvísi stílisti en Stella. Reyndar finnst mér prósi Davíðs vera undarlega bragðlaus miðað við hversu hnyttinn hann getur verið í viðtölum.

Þetta er heldur enginn sem hefur þegar skrifað glæpasögur, nema hugsanlega Arnaldur, þar sem hann er eini glæpasagnahöfundurinn sem kemst í hálfkvisti við Stellu. 

Varðandi karl-lægar lessupælingar, þá þurfa þær ekki endilega að vera úr penna karlmanns, því konur geta alveg lært þá list að skrifa til að þóknast karlmönnum. 

Þetta er heldur ekki lögfræðingur, amk ekki starfandi lögfræðingur. Hins vegar kom mér á óvart þekking höfundarins á dulkóðunarforritinu PGP í fyrstu bókinni, en á þeim tíma var slík þekking einskorðuð við internetnörda, sem á þeim tíma voru merkilega fáir.

Hins vegar virðist höfundurinn vera mjög vel að sér í alls kyns slúðri sem gengur í heimi fræðimanna, blaðamanna og stjórnmálamanna.

Ég ætla hér að stinga upp á nokkrum nöfnum:

• Illugi Jökulsson
• Sjón
• Kolbrún Bergþórsdóttir
• Steinunn Sigurðardóttir
• Bragi Ólafsson
• Hannes Hólmsteinn
  

Við nánari umhugsun virðast þessar persónur ekki líklegar, nema kannski Illugi. Sjón hefur t.d. of fágaðan smekk til að skrifa margt það sem hrýtur af penna Stellu og sama er hægt að segja um Steinunni og Braga. Eina ástæðan fyrir því að ég nefni Kolbrúnu er að hún er frekar augljós fyrirmynd einnar skemmtilega ógeðfelldrar persónu og Kolbrún gæti einmitt hafa haft húmor fyrir svoleiðis. Þessar uppástungur eru reyndar meira teknar sem dæmi en raunverulegar tilgátur. Hugmynd mín er að þetta er einhver manneskja af svipuðum toga og þessar.

Vandamálið við flestar tilgátur sem ég hef heyrt hingað til er að þrátt fyrir galla sína er Stella betri höfundur en flestir sem hafa verið nefndir til sögunnar.

[Kolbrún Baldursdóttir, 13.7.2007 kl. 21:53]

Hvað með Elísabetu Jökulsdóttur?

[Elías Halldór Ágústsson, 13.7.2007 kl. 22:22]

Hún skrifar of mikið frá hjartanu. Stella er cynical bastard. Sérstaklega ef hún er kona, þá er hún að skrifa til að lenda í hillunum í Hagkaup og Bónus. Elísabet er of falleg sál til að geta gert svoleiðis.

[Elías Halldór Ágústsson, 13.7.2007 kl. 22:34]

Maður heyrir fólk oft hallmæla sögum sem "fara eftir formúlunni". Sannleikurinn er sá að þetta fólk gæti ekki sagt formúlusögu þótt það þyrfti að bjarga lífi sínu. Eins og tónskáld sem tala niðrandi um slagara en hafa aldrei samið grípandi laglínu á æfi sinni eða gítaristar/píanistar sem eru yfir það hafnir að fara á skalafyllerí en gætu ekki spilað 12 tóna í krómatískum skala á innan við 2 sekúndum.