Hjólreiðabrautir í vegaáætlun. Til hamingju Sturla!

Vísað er í hádegisfréttir en þar var sagt að á morgun verði lögð fyrir Alþingi ný samgönguáætlun. Ein af nýjungunum í tillögu um nýja vegaáætlun er að heimila að styrkja gerð göngu-, og hjólreiðastíga meðfram stofnvegum í þéttbýli og meðfram fjölförnustu þjóðvegum í dreifbýli.  Landssamtök hjólreiðafólks hafa lengi barist fyrir að hjólreiðabrautir verði settar í vegalög og viðurkenndar sem hluti að vegakerfinu.  Í tillögum að nýrri vegaáætlun segir: “Í tengslum við endurskoðun vegalaga og hugsanlegar heimildir þar mun koma til skoðunar þátttaka ríkisins í gerð hjóla,- og göngustíga meðfram stofnvegum í þéttbýli. Á sama hátt mun koma til skoðunar þátttaka ríkisins í gerð hjóla,- og göngstíga meðfram fjölförnustu stofnvegum í dreifbýli.“

Þetta er mikill gleðidagur fyrir hjólreiðafólk og persónulega fyrir mig líka en á Alþingi í nóvember s.l. var ég með fyrirspurn til ráðherra um þetta efni sem var svona:
Hefur ráðherra látið undirbúa áætlun um að lagðar verði hjólreiðabrautir sem verði fullgildur samgöngukostur?
Í munnlegu svari ráðherra kom fram að hann var jákvæður fyrir þessu máli og nú er sannarlega tilefni til bjartsýni.

Athugasemdir

[Addi (IP-tala skráð) 18.2.2007 kl. 14:34]

Mikið yrði ég ánægður ef satt væri, en þú mátt ekki gleyma því, að það eru að koma kosningar, þá er ýmsu lofað.

[Sigurður Ásbjörnsson, 18.2.2007 kl. 15:27]

Ekki má gleyma því að fyrir 380 milljarða er einfaldlega gert ráð því að allir draumar allra muni rætast.  Þetta er ekki stefna í samgöngumálum.  Þetta er fantasía.

[Hákon Hrafn (IP-tala skráð) 18.2.2007 kl. 20:37]

Þetta er mjög stórt skref í samgöngumálum og auðvitað vonar maður bara að eitthvað verði úr þessu. Það fer enginn í sund ef engar eru sundlaugarnar og svipað gildir um hjólreiðabrautir.