Eyðublöð í þúsunda tali við að svara einföldum já/nei spurningum

Ég legg fram þessa fyrirspurn í borgarráði nú í morgunsárið í tilefni fréttar um að það þurfi að skila út­­prentuðum eyðu­blöðum í haust ætli foreldrar að hafa börn sín í leikskóla í haust- og vetrarfríi grunnskóla og jólafríi. Ekki náðist þó í tæka tíð að gera foreldrum kleift að skrá börnin í vistun í Völu og því þurfa allir foreldrar leikskólabarna í Reykjavík að skila útprentuðu eyðublaði til leikskólastjóra ætli þau að hafa börnin í leikskóla í þessum fríum.

 

Stafræn mál í Reykjavík eru á ótrúlegum stað þegar horft er til þess gríðar mikla fjármagns sem farið hefur í málaflokkinn.

 

Fulltrúi Flokks fólksins óskar upplýsinga um af hverju það gengur svo erfiðlega hjá þjónustu- og nýsköpunarsviði að leiða stafræna umbreytingu sem halda á utan um skráningar í leikskólum borgarinnar í ljósi alls þess fjármagns sem veitt hefur verið til sviðsins.
Einnig vill fulltrúi Flokks fólksins fá að vita hvort foreldrar þurfi enn að fylla út 4 handskrifuð blöð og skila til leikskóla þegar barn er að flytja á milli leikskóla eða þegar aðrar breytingar á högum barna þurfa að eiga sér stað?

Greinargerð

Líkt og flestir foreldrar leikskólabarna í Reykjavík furðar fulltrúi Flokks fólksins sig á því hversu illa gengur að framkvæma stafræna umbreytingu á mörgum sviðum í borgarkerfinu og ekki hvað síst skráningu barna í leikskólum. Gefið er lítið fyrir þær skýringar sem birst hafa í fjölmiðlum þess efnis að ábyrgðin á þessum seinagangi liggi fyrst og fremst hjá eiganda Völu kerfisins. Fyrir utan þá handavinnu og keyrslur sem foreldrar þurfa að sinna við skráningar á handskrifuðum blöðum, hafa foreldrar í núna í mörg ár þurft að fylla út handvirkt 4ra síðna umsókn þegar barn er að skipta um leikskóla. Hvort um sé að ræða fleiri atriði varðandi leikskólaskráningar sem fylla þarf út handvirkt á pappír og aka með milli staða hefur fulltrúi Flokks fólksins ekki vitneskju um. Í öllum helstu sveitarfélögum í landinu eru allt þetta orðið rafrænt. Það hlýtur að vera ljóst að stafrænt ráð þarf að fara gaumgæfilega ofan í saumana á verkefnastjórn sviðsins sem oft virðist vera ansi handahófskennd hvað varðar flokkun verkefna eftir mikilvægi. Eftir alla þá fjármuni, 20 milljarða plús sem farið hefur í stafræna umbreytingu frá 2019 er Reykjavík eins og aftur úr fornöld í einföldustu stafrænum ferlum sem smæstu sveitarfélög eru komin með í fulla virkni og það fyrir löngu.