18-23 ára fá ekki að tjalda í Akureyrarbæ um verslunarmannahelgina

Í ljósi reynslunnar hafa Akureyringar ákveðið að gera breytingar á hverjir fá að tjalda á útihátið þeirra Ein með öllu. Þessar breytingar má sjá á heimasíðu þeirra. Það kveður nokkuð við annan tón hjá mótshöldurum í ár en oft áður.  Af 14 útihátíðum leggur rúmlega helmingur sérstaklega áherslu á að um fjölskylduhátíð sé að ræða. Tvær höfða til ákveðinnar afþreyingar s.s. golfmót og ein til þeirra sem hafa gaman af harmóníkuspili. Af þessu má sjá að tónninn er að breytast. Mótshaldarar sækjast eftir því að fá fjölskylduna í heild sinni en ekki einvörðungu unglingana þó einstaka horfi einna helst til þess að fá sem flesta inn á svæðið. Tónninn í umsjónarmönnum tjaldsvæða hefur einnig breyst. Þeir hafa ekki farið varhluta af ofbeldinu sem sérstaklega fylgir eiturlyfjaneyslu sé hún fyrir hendi á staðnum.

Mótshaldarar hljóta að vera ábyrgir fyrir því sem gerist á hátíðinni sem þeir standa fyrir. Foreldrar eru ábyrgir fyrir að veita börnum undir 18 ára fararleyfi án eftirlits. Fjöldi sjálfboðaliða og grasrótarsamtaka geta aldrei komið alveg í veg fyrir að ofbeldi eigi sér stað ef neysla áfengis- og vímuefna er á staðnum. Þeir eru heldur ekki ábyrgðaraðilar. Óeigingjarn starf þeirra er að mínu viti ekki nægjanlega þakkað eða virt. Þetta kemur skýrast fram í þeirri frétt sem lesa mátti í dag að allir sjálfboðaliðar verða sem dæmi að greiða fullt verð inn á Þjóðhátíð í Eyjum þótt erindi þeirra sé einvörðungu að sinna hjálparstarfi.

Athugasemdir

[Sigurður Orri Kristjánsson, 31.7.2007 kl. 19:21]

Ertu nokkuð með link um þetta? eða geturðu útskýrt hvernig 20 ára aldurstakmarkið gengur fyrir sig? Hvað er bannað innan 20?, varla Trúðarnir?

[Kolbrún Baldursdóttir, 31.7.2007 kl. 21:02]

Varðandi Akureyrarhátíðina og aldurstakmark varðandi hana vísa ég á heimasíðu Akureyrarbæjar

[Linda (IP-tala skráð) 1.8.2007 kl. 08:26]

Held að þú sért að misskilja þetta.  Það á að banna einstaklingum á aldrinum 18-23 að tjalda í bænum.  Þetta er til háborinnar skammar og líkist því að stinga hausnum ofaní sandinn frekar en að taka ábyrgð.  

[Birgir Marteinsson (IP-tala skráð) 1.8.2007 kl. 12:15]

Að gera ákveðinn aldurshóp nánast útlægan úr ákveðnum bæ yfir ákveðið tímabil jaðrar við fordómar í garð þessara kynslóða sem þar eru gerð útlæg.

Ég er einmitt á tilgreindum aldri og hef ferðast mikið í sumar um landið með félögum mínum. Undantekning er ef unglingahópur hefur séð um ölvunina, hávaðann og rifrildin sem vill fylgja of stórum skammti áfengis því í lang flestum tilvikum er það "kurteisa" fjölskyldufólkið sem sér um lætin. Það er a.m.k. ekki alltaf til sóma, rétt eins og ákveðnir einstaklingar á aldrinum 18-25 ára!

Einhvertíma heyrði ég að börnin læri það sem fyrir þeim er haft, kannski að það gildi einnig í þessu samhengi?

[Sigurður Orri Kristjánsson, 1.8.2007 kl. 14:13]

Ég sé að efri færslan hefur verið fjarlægð... Hvers vegna? Ekki, það að ég fann ekki þær upplýsingar sem sú færsla talaði um.

[Kolbrún Baldursdóttir, 1.8.2007 kl. 16:33]

Nei þetta er sama færslan bara leiðrétt. Það var ekki 20 ára aldurstakmark heldur aldurtakmark ef fólk ætlaði að tjalda, ég lagaði því fyrirsögnina. Heyrði samt ekki betur en þetta hefði verið sagt svona í fréttum í gær. En allar upplýsingar eru á heimasíðu Akureyrarbæjar.
Heyrnin kannski farin að förlast hjá mér enda að nálgast miðjan aldur.