Flokkur fólksins stendur fyrir margt en megináhersla er á  að ekkert þjóðfélag getur verið án heimila. Heimilið er í raun grunnforsenda öryggis. Við búum á Íslandi í samfélagi sem þýðir að við sem þjóð erum í raun ein stór fjölskylda. Ef einhver þegn glímir við vanda sem hann ræður af einhverjum orsökum ekki við að leysa úr, komum við hin sem erum á betri stað í lífinu hvort heldur fjárhagslega eða persónulega, til hjálpar.  Þessi hjálp kemur að sama skapi til okkar sé fótum kippt undan okkur og grunnstoðum tilveru okkar. Svoleiðis virkar samtryggingin. Íslenska þjóðin hefur margoft þegar samlandar okkar verða fyrir áfalli opinberað þjóðarsál sína sem er engri lík.

Flokkur fólksins hefur frá upphafi sett hagsmuni eldra fólks í forgang og hefur einn flokka á Alþingi átt frumkvæði að gagngerum umbótum á lífsskilyrðum þeirra og aðstæðum. Íslendingar lifa nú lengur af ástæðum sem er okkur flestum kunnar. Meðal baráttumála fyrir þennan hóp er að tryggja aukið framboð húsnæðis fyrir eldra fólk og tryggja með lögum að öryrkjar og eldri borgarar fái 450.000 kr. á mánuði í ráðstöfunartekjur skatta- og skerðingarlaust. Listinn er lengri og má sjá hann í stefnuskrá Flokks fólksins.

Ævikvöldið

Eldra fólk á Íslandi hefur það alla jafna gott. Það nýtur ævikvöldsins og nýtur afraksturs vinnu sinnar og framlegðar til samfélagsins. Grunnforsenda þess að njóta ævikvöldsins er fyrst og síðast að búa við ágæta heilsu við öruggar aðstæður. Ellikerling lætur eðli málsins samkvæmt á sér kræla þegar komið er á þetta ævistig. Flokkurinn hefur barist fyrir frá upphafi hans að stofnað verði embætti hagsmunafulltrúa aldraðra. Meginhlutverk hagsmunafulltrúa er að skoða málefni eldri borgara og halda utan um hagsmuni þeirra, fylgjast með aðhlynningu og aðbúnaði. Hann myndi kortleggja stöðuna í húsnæðismálum aldraðra, heimahjúkrun og dægradvöl og fylgjast með framkvæmd heimaþjónustu.

Lengi legið á Landspítalanum

Þeir eru ófáir sem hafa þurft að dvelja á Landspítala vikum eða mánuðum saman löngu eftir að meðferð er lokið vegna þess að ekkert annað úrræði er til. Skortur er á hjúkrunarrýmum og sérstaklega er skortur á plássum á hjúkrunarheimilum fyrir eldra fólk sem þarf fulla þjónustu og mikla umönnun. Einnig er löng bið eftir hvíldarinnlögn. Hluti þeirra sem „hafa dagað“ uppi á sjúkrahúsi kemst ekki heim vegna manneklu í heimaþjónustu. Mannekla er rótgróið mein í umönnunarstörfum.

Flestir vilja búa sem lengst heima hjá sér og ganga hugmyndir nútímans út á að veita þeim sem vilja og geta búið heima þann möguleika. Ýmist vill fólk halda áfram að búa á sínu gamla heimili eða flytjast í sjálfstæða búsetu sem er hannað með þjónustuþarfir þessa aldurshóps að leiðarljósi. Flokkur Fólksins vill róttækar aðgerðir í þessum málum strax. Komist Flokkur fólksins til áhrifa á þingi mun hann ráðast í að gera stórátak í fjölgun hjúkrunarrýma. Efri árin eiga að vera gæðaár, ár sem ekki eiga að einkennast eða litast af kvíða og óvissu.

Andlega hliðin

Það eru ekki einvörðungu aðstæður fólks sem komin eru á þetta aldursskeið sem eru mismunandi eins og gengur heldur einnig andlega hliðin. Sem sálfræðingur með víðtæka reynslu hefur mér verið sérstaklega umhugað um að þessi hópur gleymist ekki, einangrist og líði fyrir einmanaleika. Sumir hafa misst maka sína og ekki eru allir sem eiga fjölskyldu sem getur hlaupið undir bagga eða stytt stundir. Þess vegna hef ég lengi talað fyrir mikilvægi þess að þeir sem búa heima eða á hjúkrunarheimili fái sálfélagslegan stuðning til að draga úr líkum á einmanaleika og samhliða virkja fjölþættar heilsueflandi aðgerðir. Þjónustu sem þessa þarf að formgera og virkja með skilvirkum hætti og vera aðgengileg án tafa.

Kæri kjósandi

Við frambjóðendur  í Flokki fólksins erum ótrúlegt baráttufólk þótt ég segi sjálf frá. Í flokknum er samsafn einstaklinga sem vílar ekkert fyrir sér að berjast með kjafti og klóm þegar kemur að sanngirnismálum, auknu réttlæti og jöfnuði. Við viljum einnig sjá meiri mennsku í kerfinu, betri hlustun og að tekið sé meira tillit til einstaklingsþarfa. Við viljum ekki sjá fólki varpað fyrir borð án björgunarhrings. Nú stendur Ísland á krossgötum. Breytinga er þörf, skipta þarf um fólk í brúnni. Flokkur fólksins vill endurvekja drauminn um öruggt heimili fyrir alla til að geta lifað öruggu lífi. Heimili er aðalgrunnstoðin og án heimilis þrífst enginn sama á hvaða aldursbili hann er. 

Flokkur fólksins er kominn með reynslu og hefur á að skipa valið fólk í hverju sæti, hokið af lífsins reynslu með raunverulegar lausnir í farteskinu. Við erum málsvarar minnihlutahópa og þeirra sem minna mega sín og við stöndum ótrauð fast í þeirri trú að ríkið beri og eigi að axla ábyrgð á framtíð og öryggi.

Setjum x-ið við bókstafinn F.

Fólkið fyrst – og svo allt hitt

Kolbrún Áslaugar Baldursdóttir, sálfræðingur og borgarfulltrúi skipar 2. sæti í Reykjavíkurkjördæmi suður fyrir Flokks fólksins í komandi Alþingiskosningum

Birt á visi.is 18. nóvember 2024

Er með þessa tillögu í borgarráði að fallið verði frá hugmyndum um bílastæðahús eða fjölnotahús og þessar hugmyndir skoðaðar betur, kannað með samráð sem dæmi.

Fulltrúi Flokks fólksins vill að borgaryfirvöld og skipulagsyfirvöld endurskoði  hugmyndina um bílastæðahús í borgarlandinu eða fjölnotahús eins og þau eru stundum kölluð. Það kann vel að vera að hús sem þetta virki vel erlendis og hafi eitthvað notagildi en það eru miklar efasemdir um að slík bygging falli i í kramið hér. Þetta kom skýrt fram í máli íbúa í Grafarvogi á íbúafundi vegna byggingaráforma í Grafarvogi á fundi í Rimaskóla 11. nóvember sl. Bílastæðahús er ein af hugmyndum í byggingaráformum í Grafarvogi og ein 6 slík eiga að rísa í Keldnalandinu. Það má telja vel líklegt að hér sé verið að fara offari í hugmynd sem þeim sem eiga að nýta húsið telja ekki góða. Um er að ræða allt að 5 hæða hús og það segir sig sjálft að erfitt gæti verið fyrir fjölskyldu með lítil börn og matvörur að fara frá bílahúsinu og ganga ef til vill nokkurn spöl heim til sín. Í þessum húsum er ekki gert ráð fyrir lyftum eftir því sem fulltrúi Flokks fólksins skilur

Á fundi umhverfis- og skipulagsráðs Reykjavíkurborgar í vikunni voru teknar fyrir fjöldi stjórnsýslukæra á hendur borginni sem nú eru til meðferðar hjá úrskurðarnefnd umhverfis- og auðlindamála. Alls eru kærurnar 11 talsins og snúa þær allar að meðferð skipulagsyfirvalda í borginni á hinum ýmsu málum.

Áheyrnarfulltrúi Flokks fólksins furðar sig á fjöldanum og segir að oft hafi heyrst fullyrðingar um að ekki sé unnið að þessum málum hjá borginni af fullum heilindum.

https://www.dv.is/frettir/2024/11/1/fjoldi-stjornsyslukaera-hendur-reykjavikurborg-til-medferdar/

Í sumum málanna á fundinum tók umhverfis- og skipulagssvið eingöngu fyrir erindi úrskurðarnefndarinnar vegna viðkomandi í kæru en í öðrum var lögð fram greinargerð umhverfis- og skipulagssviðs vegna málsins.

Kærurnar eru af ýmsu tagi. Þær varða umsögn skipulagsfulltrúa vegna niðurrifs á gömlum skjólvegg, synjun á byggingarleyfi fyrir fjóra gististaði, ákvörðun um að samþykkja nýtt hverfisskipulag fyrir Háteigshverfi, Hlíðahverfi og Öskjuhlíðarhverfi en alls hafa þrjár kærur verið lagðar fram vegna þess máls. Einnig hefur ákvörðun um að falla frá dagsektum vegna girðingar á lóðamörkum verið kærð. Byggingarleyfi vegna framkvæmda við sendiherrabústað Bandaríkjanna hefur verið kærð o breyting á deiliskipulagi nokkurra lóða hefur verið kærð af tveimur mismundandi aðilum. Loks hefur synjun á að samþykkja nýja íbúð í húsi verið kærð sem og synjun á byggingarleyfi vegna breytinga á fjöleignarhúsi.

Furða og pottur brotinn

Kolbrún Áslaugar Baldursdóttir áheyrnarfulltrúi Flokks fólksins í umhverfis- og skipulagsráði furðar sig á þessum mikla fjölda kæra og segir bera á fullyrðingum um að eitthvað sé mikið að í meðferð mála sem tengjast þessu málaflokki hjá borginni. Í bókun hennar á þessum fundi ráðsins segir:

„Fulltrúi Flokks fólksins lýsir furðu sinni á þeim óvenju mikla fjölda kæra sem hér koma fram en þær eru nú 11 og hafa sjaldan verið svo margar. Ítrekað hafa komið upp mál þar sem skipulagsyfirvöld eru sökuð um að segja ekki satt – jafnvel „falsa gögn“ eða breyta þeim eftir því sem skjólstæðingar umhverfis- og skipulagssviðs hafa sagt á opinberum vettvangi. Allt of oft fást ekki svör, gögnum og upplýsingum er haldið leyndum og hefur verið fullyrt að ekki sé alltaf unnið  af heiðarleika og gagnsæi.

Þetta er miður og telur Flokkur fólksins að endurreisa þurfi embætti umboðsmanns borgarbúa eins og það var á árunum 2013-2020. Það voru mistök að leggja af embættið. Verkefni umboðsmannsins voru flutt yfir til innri endurskoðunar og búinn til eins konar „ráðgjafi íbúa“ hjá því embætti. Þetta fyrirkomulag hefur virkað illa og nú hefur fólk sem telur á sér brotið af skipulagsyfirvöldum ekki annað fært en að fara með málið fyrir dómstóla sem er bæði dýrt og tímafrekt.“

Sumt verður bara að laga strax og það á við um umferðaröryggi á Sæbraut. Því miður virðist oft þurfa alvarlegan atburð til að eitthvað fari að hreyfast. Flokkur fólksins hefur ítrekað í mörgum bókunum og tillögum óskað eftir betrumbótum og að hraða máli vegna hættunnar þarna. Íbúar hafa lengi verið að kalla eftir úrbótum.
Síðasta bókun Flokks fólksins var í janúar á þessu ári til að að ítreka og aftur ítreka. Hér er bókun um málið lögð fram í janúar í umhverfis- og skipulagsráði

Bókun Flokks fólksins undir liðnum: Fram fer kynning á tímabundinni göngu- og hjólabrú yfir Sæbraut við Vogabyggð:
Flokkur fólksins hefur margsinnis talað um og bókað um hversu hættulegt þetta svæði er gangandi vegfarendum og fagnar þess vegna tímabundinni göngu- og hjólabrú yfir Sæbraut. Sífellt er talað um “tímabundna” brú en þarna þarf auðvitað að tala um varanlega lausn sem er stokkur. Flokkur fólksins lagði fram tillögu í júní 2022 um að strax yrði hafist handa við að byggja bráðabirgða göngubrú yfir Sæbraut við gatnamót við Skeiðarvog/Kleppsmýrarveg. Vogabyggð er orðin fjölmenn byggð, en þannig er málum háttað að börnin í hverfinu þurfa daglega að fara yfir Sæbrautina til að sækja skóla, frístundir og fleira. Íbúar Vogabyggðar hafa þurft að takast á við ótta um öryggi barna sinna allt of lengi.

Bráðavandann í umferðinni verður að leysa. Í morgun var ástandið sérlega slæmt enda skólarnir að byrja. Hægt væri að laga mikið ef ráðist væri í að nútímavæða umferðarljósastýringar. Miklubraut og Kringlumýrarbraut eru þær götur sem eru með mesta umferðarflæði í Reykjavík og í morgun var þar bara allt fast. Ljósin voru stillt þannig að græna ljósið logaði í 15 sekúndur og rauða í 50 sekúndur á leið vestur í bæ. Þetta ætti að vera búið að leysa.  Snjallljósastýringarkerfi sem les umferðina og bregst við samkvæmt aðstæðum má finna í öllum borgum í Evrópu. Með snjallljósstýrikerfi er umferðarflæði meira og eyðsla, mengun og skemmdir á malbiki minni. Ef tafir eru miklar eru bílar sífellt að hægja á sér, nema staðar og taka af stað með tilheyrandi mengun. Það klukkuprógramm sem er við lýði með fjórum stillingum er ekki snjallkerfi. Tafir eru miklar og afkastageta á umferðargötum borgarinnar er í mesta lagi 50%. Ef snjallljósastýringar væru við lýði myndu ljósin nema þörfina og flæði umferðar yrði í samræmi við umferðarþunga og aðstæður.

Ég sárvorkenni fólkinu sem býr í Gufunesþorpinu. Það hélt það gæti lifað þar bíllausum lífsstíl en annað kom heldur betur á daginn

Ég lagði fram þessa tillögu á síðasta fundi umhverfis- og skipulagsráðs:

Tillaga Flokks fólksins um að Strætó bs. skipuleggi strætóferðir inn í Þorpið

Flokkur fólksins leggur til að strætó aki inn í Þorpið í Gufunesi, að Þorpið verði einfaldlega hluti af almenningssamgangnakerfinu. Engar almenningssamgöngur eru í vistþorpinu utan þess að hægt er að hringja á leigubíl.

Greinargerð

Fólk sem fjárfesti í íbúð í Þorpinu var lofað að hægt væri að lifa þar bíllausum lífsstíl en hefur orðið að kaupa sér bíl þar sem engar almenningssamgöngur standa þessu fólki til boða. Bílastæði eru fá sem bæta þarf úr hið snarasta. Fólk hefur neyðst til að leggja ólöglega og nú er bílastæðasjóður farin að sekta bíleigendur sem hvergi geta lagt bílnum sínum. Það er ámælisvert að meirihlutinn geti ekki tryggt aðgang að almenningssamgöngum í íbúðahverfi í Gufunesi sem hefur verið kynnt sem vistþorp. Án almenningssamgangna kemst fólk ekki spönn frá rassi enda langt í almenningsþjónustu. Í grein sem íbúi skrifaði í des. 2021 á visi.is segir:
"Næsta strætóstoppistöð er í 20-25 mínútna göngufjarlægð, en þá leið getur manneskja einungis farið ef hún er fullfær og ófötluð enda liggur sú leið upp brattan, ólýstan slóða í gegnum móa (einungis er um slóða að ræða, enga formlega leið eða gangstétt). Og ef manneskja ætlar að taka strætó með barnavagn þá þarf hún að ganga um 45 mínútna leið - og úti á miðjum Gufunesveginum, því engin gangstétt er þar meðfram heldur,"
Einnig eru alvarlegar athugasemdir gerðar við að skortur sé á göngustígum sem liggja að hverfinu. Almenningssamgöngur í Gufunesið snúast ekki bara um íbúana sjálfa heldur einnig fjölskyldur og vini þeirra sem vilja koma í heimsókn.

Tillaga um að fjölga bílastæðum í Þorpinu Gufunesi.

Flokkur fólksins leggur til að komin verði upp fleiri bílastæðum í Þorpinu í Gufunesi. Það stóð til að fólk lifði bíllausum lífsstíl í Þorpinu en það  er með öllu útilokað vegna fjarlægðar frá þjónustu og engar  almenningssamgöngur eru á staðnum þrátt fyrir tillögur þar um.  Flestir hafa nú þegar neyðst til að kaupa sér bíl  en í Þorpinu er skortur á bílastæðum og neyðast bíleigendur til að leggja bíl sínum á svæði sem ekki eru merkt sem bílastæði.

Greinargerð

Nýlegar fréttir bárust af því að verið væri að sekta fólk fyrir ólöglega lagningu bíla í Þorpinu. Það er eðli málsins samkvæmt afar ósanngjarn þar sem mikill skortur er á bilastæðum og almenningssamgöngur engar. Byggingarframkvæmdir eru auk þess í gangi á staðnum. Finna þarf svæði í Þorpinu þar sem hægt er að koma fyrir nægum bílastæðum svo fólk þurfi ekki að leggja ólöglega. Ekki er hægt að búa í Þorpinu án þess að eiga bíl eins og sakir standa vegna skorts á almenningssamgöngum auk þess sem talsverð fjarlægð er í alla almenningsþjónustu. Sú eina lausn sem stendur fólki til boða núna er í formi pöntunarþjónustu. Skal farþegi láta vita með minnst hálf tíma fyrirvara fyrir áætlaða brottför og stilla sér upp við merkta  biðstöð hjá Gufunesþorpi og bíða þar eftir leigubíl sem  kemur þeim á næstu skiptistöð Strætó.
Meirihlutinn samþykkti að hækka fjárheimildir til strætósamgangna um 14,6 milljónir króna  til að auka almenningssamgöngur í Gufunesi á fundi sínum þann 7. desember 2022 og er þetta útkoman. Fulltrúa Flokks fólksins finnast það varla geta verið að þetta fyrirkomulag sé hugsað til  framtíðar. Hér kann að vera um millibilsástand að ræða sem er reyndar orðið alltof langt. Varla munu íbúar sætta sig við þetta mikið lengur. Lítið sem ekkert hefur verið gert í þessu máli þrátt fyrir að tæp tvö ár séu liðin frá því að borgin gaf vilyrði fyrir lóðum undir Gufuneshverfið.

Á fundi borgarráðs hyggst ég leggja fram tillögu um að gerð verði óháð úttekt á þjónustu Strætó bs., sérstaklega með tilliti til þjónustulundar, viðmóts og sveigjanleika í garð notenda Strætó bs. samkvæmt samþykktri þjónustustefnu byggðasamlagsins. Mikilvægt er að skoða einnig stjórnendur og hæfni þeirra til stjórnunar fyrirtækisins.  Skoðað verði sérstaklega þætti eins og hvort starfsfólk þ.m.t. vagnstjórar þekki hlutverk, stefnu og gildi fyrirtækisins. Einnig hvort starfsfólk:

 -sýni drifkraft í störfum sínum með frumkvæði, kjark og þor að leiðarljósi?  

-vinni vel saman að hagsmunum og framtíðarsýn Strætó og mynda þannig sterka liðsheild?  

-skapi traust þeirra sem reiða sig á þjónustu Strætó og sýna áreiðanleika og ábyrgð í verki? 

-sýni viðskiptavinum jákvætt viðmót og kurteisa framkomu?

-eru vingjarnleg og hjálpfús gagnvart öllum viðskiptavinum?

-geti veitt upplýsingar um starfsemi Strætó?

-beri virðingu fyrir ásýnd Strætó og umhverfi_

Þessi tillaga er lögð fram í ljósi fjölmargra kvartanna, sumar hverjar alvarlegar, sem berast reglulega til Strætó bs. Strætó er með þjónustustefnu sem virðist samkvæmt fjölda kvartanna vera meira orð á blaði en raunveruleiki. Markmið þjónustustefnunnar er m.a. að skapa traust notenda, sýna áreiðanleika og ábyrgð í verki og sýna viðskiptavinum jákvætt viðmót og kurteisa framkomu sem og að vera vingjarnleg og hjálpfús gagnvart öllum viðskiptavinum.  Á þessu er pottur brotinn. Það er þess vegna mikilvægt að óháður utanaðkomandi aðili verði fenginn til að rannsaka hverju það veldur að Strætó bs. gangi svo illa að fylgja þjónustustefnunni sem raun ber vitni. Reglulega berast fréttir af slæmri framkomu Strætó bs gagnvart farþegum. Nýlegt dæmi er að 10 ára stúlku var vísað úr  strætisvagni á miðri leið að því er virðist að tilefnislausu. Engar skýringar hafa enn verið gefnar á atvikinu.

Ástandið á Breiðholtsbraut frá Jafnaseli að Rauðavatni er skuggalegt um þessar mundir. Það voru stór mistök að byrja ekki á að breikka þennan kafla Breiðholtsbrautar áður en ráðist var í framkvæmd 3ja áfanga Arnarnesvegar. Þetta ástand á eftir að vara lengi og var það slæmt fyrir. Hver ber á þessu aðalábyrgðina? Vandinn er slíkur að oft er ekki hægt að komast út úr hringtorginu frá Suðurlandsvegi til að beygja inn til hægri inn á Breiðholtsbrautina vegna bílateppu. Þrengingar eru miklar vegna framkvæmda við Arnarnesveg. Þetta ástand skapar slysahættu svo ekki sé minnst á umferðarkraðakið sem þarna myndast á háannatíma. Þetta var auðvitað fyrirsjáanlegt. Það dugar ekki að breikka aðeins smá bút af Breiðholtsbrautinni að Arnarnesvegi heldur verður að breikka Breiðholtsbrautina alla leið að Rauðavatni ef vel á að vera.
Ákall borgarbúa um breikkun er hunsað. Þetta bitnar á öllum þeim sem aka þessa leið, margir á leið út úr bænum og aðrir á leið inn í borgina. Fulltrúi Flokks fólksins lagði fram tillögu 2021 um „að skipulagsyfirvöld Reykjavíkurborgar þrýsti á Vegagerðina með að fá viðræður um breikkun Breiðholtsbrautar frá Jafnaseli að Rauðavatni". Tillagan var felld af meirihlutanum.

Eftirfarandi tillaga er lögð fram á fundi umhverfis- og skipulagsráðs 29. maí 2024:

Tillaga Flokks fólksins um að gerð verði úttekt á þeirri ákvörðun að byrja á 3ja áfanga Arnanesvegar áður en Breiðholtsbrautin milli Jafnasels og Rauðavant var tvöfölduð. Með því að byrja fyrst á svo stórum framkvæmdum sem Arnarnesvegurinn er áður en Breiðholtsbrautin var tvöfölduð voru gerð alvarleg mistök sem einhver þarf að bera ábyrgð á.

Greinargerð 

Á þessum kafla ríki nú ófremdarástand. Umferðarteppur og tafir vegna þeirra eru þær mestu sem sést hefur á stað þar sem umferðarþungi er gríðarlegur og yfir svo langan tíma sem raun ber vitni. Vandinn er slíkur að oft er ekki hægt að komast út úr hringtorginu frá Suðurlandsvegi til að beygja inn til hægri inn á Breiðholtsbrautina. Þrengingar eru miklar vegna framkvæmda við Arnarnesveg.  Þetta ástand skapar mikla slysahættu svo ekki sé minnst á umferðarkraðak á háannatímanum. Ákall borgarbúa um breikkun hefur verið hunsað. Þetta bitnar á öllum þeim sem aka þessa leið, margir á leið út úr bænum og aðrir á leið inn í borgina. Fulltrúi Flokks fólksins lagði fram tillögu 2021 um „að skipulagsyfirvöld Reykjavíkurborgar þrýsti á Vegagerðina með að fá viðræður um breikkun Breiðholtsbrautar frá Jafnaseli að Rauðavatni". Tillagan var felld af meirihlutanum.

Flokki fólksins hefur borist ábending frá fólki um sára vöntun bílastæða við Dalslaug. Aðkomugestir í sundlaugina þarf að ganga dágóðan spotta, hafandi neyðst til að leggja bíl sínum einhvers staðar inn í hverfi eða upp á kant því engin bílastæði eru við laugina. Sumir eru með stóran barnahóp auk sundfarangurs eins og gengur. Hér hafa orðið stór mistök í skipulagi sem finna þarf lausn á.

Flokkur fólksins lagði inn þessa tillögu í morgun á fundi umhverfis- og skipulagsráðs.

Fulltrúi Flokks fólksins leggur fram svohljóðandi tillögu um að bílastæðum verði fjölgað við Dalslaug í Úlfarsárdal:

Flokkur fólksins leggur til að bílastæðum verði fjölgað við Dalslaug í Úlfarsárdal og íþróttasvæðið þar í kring. Við laugina eru allt of fá stæði sem skapar öngþveiti.

Greinargerð

Örfá bílastæði eru við Dalslaug og  kvarta íbúar mikið yfir því. Sundlaugaverðir segjast fá kvartanir á hverjum degi vegna þessa bílastæðaskorts. Nokkur fjöldi  bílastæða er við íþróttamiðstöð Fram í Úlfarsárdal. Þau eru hins vegar mjög oft þéttsetin bæði af sundlaugargestum og íþróttaiðkendum.  Þegar haldin eru  fótboltamót eða einstaka fótboltaleikir spilaðir verður algjört öngþveiti á svæðinu. Bílum er lagt upp á umferðareyjar á grasbala og inn í næstu íbúðargötur. Þessi staða veldur íbúum miklu ónæði. Það er greinilega ekki gert ráð fyrir að íbúar úr öðrum hverfum borgarinnar sæki sér þjónustu við íþróttamiðstöðina eða njóti sundlaugarinnar í Úlfarsárdal. Úr þessu þarf að bæta hið snarasta. Foreldrar sem koma með börn sín, stundum mörg og tilheyrandi sundfarangur í laugina þurfa iðulega að ganga langa vegalengd frá bíl að laug vegna þess að þau fáu stæði sem eru i boði eru fullsetin.