Níundu bekkingar í menntaskóla. Gott mál!

Ég er mjög ánægð með að skoða eigi möguleika á sveigjanlegum námstíma í grunnskóla í báða enda. Sem skólasálfræðingur í Áslandsskóla þá skynja ég sterkt hversu gríðarlega mikill fjölbreytileiki er innan þessa hóps á öllum sviðum og að útilokað er að ætla að setja alla undir sama hatt hvað varðar námskröfur eða hraða námsferils. Því meiri sveigjanleiki og einstaklingsbundnar námsleiðir því betra. Þannig geta foreldrar og síðan unglingarnir þegar þeir nálgast 9. bekk  fengið að móta eigin námsfarveg allt eftir því hvað hentar hverjum og einum. Heyrst hafa óánægjuraddir sem segja að þarna sé verið að hafa af börnunum bestu árin. Þetta eru meiningarlaus orð þar sem ekki er hægt að sjá neina tengingu milli lengd grunnskólanáms og „bestu áranna“. Það hentar ákveðnum hópi barna bæði vitsmunalega, tilfinninga,- og félagslega að fara hraðar í gegnum grunnskólakerfið en boðið hefur verið upp á hingað til. Öðrum hópi hentar að fara hægar og enn öðrum hópi ennþá hægar.  Þannig er það bara og við eigum að geta mætt þörfum allra þessara hópa í stað þess að steypa alla í sama mót og telja okkur ávalt vita hvað öðrum er fyrir bestu.

Athugasemdir

[Inga Lára Helgadóttir, 15.3.2007 kl. 20:34]

Ég verð að taka undir með þér að ég er ánægð með þessar "klæðskeralausnir" fyrir unglinga. Þau eru misjafnlega langt komin, svo ekki bara það, engin þeirra eru eins, svo gott að sníða meira námið að þeim en ekki þau að náminu

[Steinunn Helga Sigurðardóttir, 16.3.2007 kl. 06:55]

Ég er alveg sammála þér, það er gott að það sé farið að gera sér grein fyrir mismunandi þörf hvers einstaklings. Það verður sennilega til þess að fl. haldi áfram í námi, og upplifi grunnskólaárin betri !

Ljós frá Lejre

Steina