Saman um áramót

Nú fer í hönd sá tími ársins, áramótin , þar sem unglingarnir þurfa hvað mest á stuðningi og aðhaldi foreldra sinna að halda.
Um áramót hefur sú þróun orðið í íslensku samfélagi að nýju ári er fagnað fram á nótt og sumir hverjir eru enn að fagna þegar birtir af nýjum degi, þeim fyrsta á nýju ári.
Eðlilega leyfa því margir foreldrar börnum sínum að vaka lengi og taka þátt í gleðinni.

Eins og mörg fyrri áramót mun alltaf einhver hópur ungmenna safnast saman um og eftir miðnætti og neyta áfengis og sumir jafnvel annarra vímugjafa. Einhverjir þessara krakka langar til að vera hluti af félagahópnum en hafa ekki í hyggju að drekka.  Þá reynir á þá að standast allan hópþrýsting og segja nei takk við öllum vímugjöfum hvaða nafni sem þeir kunna að nefnast.
Fyrir marga unga og ómótaða unglinga getur þetta reynst erfitt. Þeir velta vöngum yfir því hvort ákvörðun þeirra um að vilja ekki taka þátt í neyslunni hafi áhrif á stöðu þeirra innan hópsins.

Þeir foreldrar sem taka þá ákvörðun að vera með, eða í það minnsta að vera nærri unglingunum sínum á þessum tímamótum eru með því aðhaldi að veita þeim mikinn stuðning á þessu viðkvæma tímaskeiði þeirra. 

Með því að segja við unglinginn sinn, „við viljum fagna nýju ári með þér og að við séum öll saman “ eru foreldrarnir jafnframt að gefa börnum sínum til kynna hversu vænt þeim þykir um þau og að ekkert skipti þau meira máli en velferð þeirra.

Fögnum nýju ári í návist barnanna okkar og gerum þannig nýja árið að þeirra ári.  

Athugasemdir

[Steinunn Helga Sigurðardóttir, 30.12.2007 kl. 14:56]

Kæra kolbrún ! mikið rétt sem þú skrifar og á erindi til margra !

Gleðileg áramót til þín og þinna. vonandi farið þið í rólegheitum inn í hið nýja ár

Mahatma Gandhi sagði svo rétt Kærleikurinn er sterkasta aflið sem til er í heiminum og jafnframt hið hógværasta sem unnt er að hugsa sér.

Megir þú vera í Kærleikanum nú og alltaf.

AlheimsKærleikur til þín

Steina 

[Gunnlaugur B Ólafsson, 31.12.2007 kl. 01:05]

Góður pistill, félagslegur þrýstingur getur leitt ungmenni og aðra að niðurstöðu, ákvörðun, sem þau vita að er ekki góð. - Áramótakveðjur.

[Marta B Helgadóttir, 31.12.2007 kl. 11:13]

Vil bara óska þér gleðilegs árs og þakka fyrir frábær bloggsamskipti á árinu.