Bloggið er öflugt og spennandi leikfang sem við erum í óða önn að læra á

Það eru ýmsir áhugaverðir punktar sem koma fram í viðtalinu við þá Egil Helgason og Össur Skarphéðinsson en þeir ræða um „Miðil augnabliksins“ í Mbl. í tilefni þess að mbl.is er 10 ára.

Það líður satt að segja ekki sá dagur að blogg eða bloggarar eru ekki meðal þess sem rætt er milli manna.  Þetta fyrirbæri sem við köllum blogg hefur sannarlega blásið út og tekið sér bólfestu í tilverunni og er jafnvel hægt og sígandi að þoka einhverjum öðrum miðlum til hliðar.
 
Það eru þó ekki allir hrifnir.  Til er sá hópur sem vill ekkert með blogg hafa, segist hvorki fara inn á bloggsíður né kæmi þeim til hugar að blogga. Þeir segja þetta hreina tímasóun, hugsanlega ávanabindandi og á blogginu sé að finna æði mikið af lélegu efni.

Það kann vel að vera margt til í þessu og verður hver og einn að hafa sinn háttinn á.  Þó hef ég nú hvatt þá sem tala með þessum hætti að leyfa sér að kíkja inn á bloggið og vera einfaldlega duglegir við að vinsa úr efni, sortera frá það sem þeim þykir lélegt og kanna hvort ekki sé eitthvað að finna sem höfðar til þeirra.
Að lesa bloggsíður er bara eitt af mörgu sem hægt er að velja og hafna.

Áhugaverður punktur í viðtalinu við Egil er þegar hann segir að bloggið sé fyrir fljótfæra einstaklinga, hættulegur miðill.  Þetta er alveg rétt hjá honum að mínu mati. Ég er þeirrar skoðunar að margir sem hafa stundað það að blogga að einhverju marki hafi einhvern tímann bloggað í fljótfærni og af hvatvísi, efni sem þeir  e.t.v. síðar skammast sín fyrir og óska að það hefði aldrei verið birt á blogginu undir þeirra nafni. 

Hér er ég ekkert endilega að tala um einstaklinga sem eru hvatvísir í eðli sínu. Þetta getur allt eins hent fólk sem er þekkt fyrir yfirvegun og nákvæmni. Það sem gerist er að einhver umræða eða frétt hefur á viðkomandi gríðarleg tilfinningarleg áhrif, kannski vegna þess að umræðan snertir hann persónulega eða kemur við kaunin á siðferðis- og réttlætiskennd, trú,- eða stjórnmálaskoðun viðkomandi. Tilfinningarlegt uppnám grípur um sig og áður en náð er að gefa sér tíma til að hugsa málið frekar eða sanka að sér ýtarlegri upplýsingum hefur texti verið birtur sem bloggarinn e.t.v. síðar meir, þegar tilfinningaröldurnar hafa lægt og vitsmunirnir náð yfirhöndinni á ný, sér eftir.

Fyrir okkur bloggara þá er bloggið öflugt og spennandi leikfang sem við erum í óða önn að læra á.  

Fleiri punkta er að finna í þessu spjalli við Egil t.d.  hve margir stjórnmálamenn nýttu sér bloggið og blogguðu af krafti fyrir síðustu kosningar bæði til að kynna sjálfan sig og málstað sinn.  Fljótlega eftir kosningarnar hurfu sumir þessara stjórnmálamanna af vettvangi og frá einstaka þeirra hefur lítið heyrst síðan hvorki á blogginu né annars staðar ef því er að skipta.

Að blogga getur skapað álag og streitu.
Það getur verið talsvert álag að blogga og tengist það m.a. því hversu erfitt það getur verið að fá ómálefnalegar athugasemdir, sendar í árásarskyni á þann sem heldur úti bloggsíðunni og sem beinlínis eru ætlaðar til að rægja og svívirða síðuhaldarann. 

Þeir sem hafa bloggað í einhvern tíma og blogga um umdeild málefni t.d. eins og stjórnmál kannast margir við að hafa fengið framan í sig einhvern skít oftar en ekki frá nafnlausum bloggurum.  Eins og Egill segir þá dæma þessir aðilar sig sjálfa úr leik. Það er þó alveg ljóst að slíkar bloggfærslur höfða til einhverra sem finna greinilega í þessu persónulega næringu.
Dæmin eru fjölmörg þar sem hraunað hefur verið yfir þekkta sem óþekkta einstaklinga.

Þetta tel ég m.a. vera ástæða fyrir því að sumt fólk sem svo gjarnan vildi halda úti bloggsíðu treystir sér hreinlega ekki til þess.  Aðrir hafa gripið til þess ráðs að nota stillingar bloggsins til að getað síað frá óþverrann og ómálefnalegar athugasemdir og enn aðrir bjóða alls ekki upp á að hægt sé að skrá athugasemdir inn á síðuna.

Að lokum vil ég bara óska mbl.is til hamingju með afmælið.

Athugasemdir

[Marta B Helgadóttir, 16.3.2008 kl. 12:07]

Góður pistill hjá þér að vanda.

Það eru helst þeir sem skrifa um umdeild dægurmál og stjórnmál sem fá til sín leiðindakomment.

Á blogginu eru sumir að skrifa sem nota þennan miðil til að "liðka pennann" fyrir ýmis skrif á öðrum vettvangi. Bloggið er ágæt þjálfun fyrir fólk í að setja frá sér efni á skipulegan vel læsilegan hátt. 

Helgarkveðja til þín

[Heimir Lárusson Fjeldsted, 16.3.2008 kl. 13:06]

Tek undir hvert orð Mörtu

[Gunnar Th. Gunnarsson, 16.3.2008 kl. 16:41]

Góður pistill og sammála ykkur öllum.

Ég varð fyrir óskemmtilegri lífsreynslu í gær. Sjá HÉR Fyrirfram hefði ég ekki búist við að svona lagað hefði mikil áhrif á mig, en það gerði það.

[Steingerður Steinarsdóttir, 16.3.2008 kl. 18:23]

Frábær pistill og orð í tíma töluð.

[Júlíus Valsson, 16.3.2008 kl. 21:18]

Góð greinargerð um bloggið. Þetta með hvatvísina er nú ekki alslæmt. Hins vegar mættu menn vera ögn umburðarlyndari við náungann á báða bóga og gefa mönnum oftar kost á því að draga skrif sín til baka án eftirmála. Einnig ætti að taka alveg fyrir nafnlaust blogg, það er vita gagnslaust verkfæri.

[Ágúst H Bjarnason, 16.3.2008 kl. 21:53]

Góður pistill. Við erum öll að læra. Yfirleitt reyni ég að sofa amk. eina nótt  áður en ég opna fyrir pistil til að minnka líkur á að mér verði á í messunni. Suma pistla dunda ég við í lengri tíma, jafnvel dögum saman og er þá gjarnan með fleiri en einn í takinu. Forðast að blogga um pólitík.

Ég held það væri til bóta ef þessar breytingar væru gerðar á Moggablogginu: 

1) Ekki leyfa bloggsíður þar sem rétt nafn bloggarans kemur ekki fram í blogghaus.

2) Krefjast þess að allir aðrir en skráðir Moggabloggarar staðfesti athugasemdir sínar með því að staðfesta uppgefið netfang. Það netfang verði síðan birt undir athugasemdinni.

[Margrét Össurardóttir (IP-tala skráð) 17.3.2008 kl. 10:31]

Vissulega getur bloggið verið áhrifaríkt "ef" þú nærð athygli. En oft nær maður ekki athygli  þó maður sé með málefni sem varða okkur öll. Ég held að allir bloggarar hafi fengið skít yfir sig frá nafnlausum bloggurum. Knús á þig Kolbrún mín og gleðilega páska

[Herbert Guðmundsson, 17.3.2008 kl. 11:05]

Þetta er mikilvæg umræða, því bloggið getur skipt miklu máli sé það rétt notað. Ég vek athygli á færslu á bloggsíðu minni frá 15.03. sl., um þetta efni. Samkvæmt upplýsingum netstjóra mbl.is eru núna 13.000 notendur að moggablogginu. Gagnlegt væri að netstjórinn flokkaði þá niður eftir notendahópum, ekki síst þeim sem sýna sig eða fela sig ...

[Birna Dis Vilbertsdóttir (IP-tala skráð) 17.3.2008 kl. 20:53]

Góð færsla

[Ásdís Sigurðardóttir, 18.3.2008 kl. 22:18]

Ég elska mína bloggvini, fín færsla hjá þér