Ég nenni ekki að vera að halda hári á meðan verið er að æla

Þetta voru orð ungrar stúlku sem sagðist vera búin að gefast upp á að skemmta sér með sumum skólasystrum sínum.  Þau tilvik hafi ítrekað átt sér stað að einhver úr hópnum fór yfir strikið, varð ofurölvi og þurfti að æla.  Eins var ekki óalgengt að undir áhrifum áfengis átti dramatíkin það til að ná hæstu hæðum.  Þar sem stúlkan notaði ekki áfengi sjálf tók hún það að sér að hjálpa öðrum stúlkum sem drukkið höfðu meira en þær réðu við. Hjálpin fólst í að styðja, hugga þær sem grétu og halda hári frá andliti þeirra ef þær þurftu að æla.

Þessi stúlka er ein af þeim unglingum sem hefur tekið ákvörðun að neyta ekki áfengis hvorki nú né síðar á ævinni.  Í umræðu um málefni unglinga og forvarnir er ekki nógu oft minnst á þá krakka sem hafa ákveðið með sjálfum sér að neyta ekki áfengis, hvorki í náinni framtíð né þegar þeir verða sjálfráða eða enn síðar þegar þeir verða löggildir áfengiskaupendur. Ákvörðunin felst í því að áfengi verði ekki hluti af þeirra lífstíl.

Huga þarf að þessum krökkum  því margir eiga í heilmikilli baráttu við sjálfa sig og umhverfið.  Annars vegar eru þeir að reyna að halda sínu striki þrátt fyrir félagaþrýsting en á sama tíma vilja þau eðlilega vera hluti af hópnum.  Mikilvægt er að samfélagið styðji við bakið á þeim t.d. með því að minnast oftar á þau í almennri umræðu, hvetja þau til að halda ótrauð sínu striki og einnig að hvetja aðra unglinga til að taka þau sér til fyrirmyndar.

Það er mikið álag að vera í sporum þessarar stúlku í þeim aðstæðum sem hún lýsti.  Henni fannst hún verða að taka ábyrgð og fara í hlutverk aðstoðarkonu séi hún á annað borð á staðnum.  Nú var hins vegar svo komið að hana langaði ekki lengur að vera viðstödd ef átti að hafa áfengi um hönd. Með þeirri ákvörðun fannst henni jafnframt sem félagsleg staða hennar kynni að vera í uppnámi. Hún óttaðist að einangrast og velti fyrir sér hvar hún gæti fundið félagsskap sem hún taldi sig passa betur inn í.

Athugasemdir

[Guðrún Helgadóttir, 21.4.2008 kl. 14:35]

Þetta er flott stelpa, hún kemur beint að kjarnanum um að vera ekki alltaf í þessari meðvirkni að láta sem okkur finnist allt í lagi að löngu er búið að ganga fram af okkur. Hættum að halda hárinu fyrir heiminn - hann getur bara ælt á eigin vegum!

[Kristín Katla Árnadóttir, 21.4.2008 kl. 15:36]

Góð færsla hjá þér ég ætla að leyfa ungling að skoða þessa færslu en hann er búinn að lofa mér því að dekka ekki áfengi og ég treysti honum mjög vel. Takk fyrir þetta Kolbrún mín

[Ásthildur Cesil Þórðardóttir, 21.4.2008 kl. 17:57]

Frábær hugvekja hjá þér Kolbrún.  Og svo sannarlega orð í tíma töluð.  Auðvitað á að hampa svona krökkum miklu miklu meira er gert er.  Þau geta þá ef til vill fundið hvort annað. 

[Margrét Össurardóttir (IP-tala skráð) 21.4.2008 kl. 18:04]

Ég á í smá baráttu við minn mann þar sem hann á dóttur frá fyrra sambandi og er hún 18 ára. Oft hefur mér fundist ég vera kannski gamaldags en mér finnst ekki rétt þegar foreldrar kaupa áfengi fyrir börnin sín sem margir gera og þ.á.m. minn maður fyrir sína dóttur. En honum finnst það réttlætanlegt þar sem hún er orðin 18 ára gömul sem mér finnst ekki.

Oft byrja foreldrar að kaupa vín fyrir börn sín við 16 ára aldur heyri ég og þá finnst mér sem þau séu að leyfa þeim að drekka sig dauðadrukkin líkt og þú lýsir sem er að sjálfsögðu ekki í lagi þannig að fólk er oft að skjóta sig í fótinn með þessu.

[Sigurbjörn Friðriksson, 21.4.2008 kl. 18:35]

Ég er af "68 kynslóðinni".  Þessi stúlka sem þú skrifar um er til mikillar fyrirmyndar.  Hinsvegar man ég eftir því að ég átti þó nokkra kunningja sem á seinni hluta síðustu aldar, sem fóru helst ekki á böll einfaldlega til að vera lausir við tóbakssvæluna sem fylgdu slíkum samkomum.  En þetta fór yfirleitt ekki hátt, því þá þótti "fínt" að reykja og hallærislegt að reykja ekki.  Eitthvað annað en nú, þessi síðustu árin.

[Harpa Rún Glad (IP-tala skráð) 21.4.2008 kl. 20:28]

Flott færsla =D

[Ásdís Sigurðardóttir, 21.4.2008 kl. 21:16]

Ánægð með þessa færslu. Algjörlega sammála því að það þarf að styrkja krakka sem taka svona góðar ákvarðanir. Fyrirmynd   

[Jóna Kolbrún Garðarsdóttir, 22.4.2008 kl. 02:07]

Frábær færsla, ég á 6 börn 4 þeirra eru yfir 18 ára og ekkert þeirra hefur átt í áfengisvandamálum.  Ég þakka fyrir hvern dag sem börnin mín drekka ekki. 

[Steinn Hafliðason, 22.4.2008 kl. 11:13]

Ein af mínum fyrirmyndum er yngsti bróðir minn sem drekkur ekki og hefur aldrei gert.

[Sigríður Sigurðardóttir, 22.4.2008 kl. 13:15]

  Var sjálf "aðstoðarkona" á mínum unglingsárum.  Huggaði, hélt uppi hári til að forða ælu, þvoði ælu úr hári í vöskum á skemmtistöðum, kældi brunasár af völdum sígarretta " ( oftast "bruni" á enninu) og kom nær meðvitundarlausu liðinu upp í leigubíla og heim.

  Var alltaf álitin skrítin af kunningjahópnum, en þó gott að hafa mig með til að redda málunum.  Á fáar góðar minningar af böllum unglingsára minna, en þó líklega fleiri, en þeir sem ég aðstoðaði.

  Frábært hjá þér að vekja athygli á þessum unglingum, sem ekki drekka og vilja ekki drekka.

[Dagný Einarsdóttir (IP-tala skráð) 24.4.2008 kl. 09:13]

Sammála. Það er alltof lítið gert af því að fjalla um unglinga sem hafa heibrigð áhugamál og eru að gera fína hluti út um allt. Því miður virðist viðhorf flestra fjölmiðla vera, að góðar fréttir eru engar fréttir, og helst bara notaðar til uppfyllingar ef ekki finnst neinn hasar til að fjalla um. Umburðarlyndi gagnvart ofdrykkju er allt of mikið í þjóðfélaginu almennt, ekki bara gagnvart unglingadrykkju og of lítið gert til að vekja athygli á þeim fína valkosti að lifa lífinu með meðvitund og njóta þess í botn að gera eitthvað skemmtilegt og muna eftir því á eftir.

[Marta B Helgadóttir, 24.4.2008 kl. 11:35]

Gleðilegt sumar Kolbrún mín og takk fyrir samskiptin í vetur.

[Birna Dis Vilbertsdóttir (IP-tala skráð) 24.4.2008 kl. 15:24]

Flott stúlka og snilldar setning.Gleðilegt sumar

[Sunna Dóra Möller, 24.4.2008 kl. 17:37]

Gleðilegt sumar

[Steingerður Steinarsdóttir, 24.4.2008 kl. 18:34]

Frábær pistill Kolbrún. Þetta er svo satt. Gleðilegt sumar og takk fyrir veturinn.

[Ólína Kjerúlf Þorvarðardóttir, 24.4.2008 kl. 21:16]

Gleðilegt sumar bloggvinkona - takk fyrir bloggsamskiptin í vetur.

[Bragi Þór Thoroddsen, 24.4.2008 kl. 21:33]

Feginn að vera ekki unglingur í dag - ansi mikið lífstílsáreiti vegna auglýsinga.  Allt neyslumiðað og hundraðfalt meira en maður þurfti að höndla fyrir 20 árum.

Finnst frábært þegar finnast svona staðföst eintök af ungu fólki - á eigin forsendum.

Annars,

Gleðilegt sumar.

vcd

[Gúnna, 24.4.2008 kl. 22:32]

Gleðilegt sumar Kolla mín.

Mjög fínn þessi pistill hjá þér. Þörf og góð umræða sem vissulega á að halda á lofti eftir því sem kynslóðirnar endurnýjast. Ræddi þessi mál síðast í dag við Heiðdísi dóttur mína. Vildi óska þess að ekki væri þörf á að ræða þessi mál við 12 ára barn - en því miður er aldurinn alltaf að lækka. Hann er líka vandrataður meðalvegurinn - hvenær á að byrja að byrgja brunninn? Sem fyrst segja sumir, en svo má heldur ekki "skemma fyrir" áhyggjuleysi æskunnar of fljótt. 

[Kolbrún Baldursdóttir, 25.4.2008 kl. 13:18]

Takk kaeru vinir fyrir allar thessar frabaeru athugasemdir, gledilegt sumar.
Med kvedju fra Mikka Mus i Orlando