Frönsku ungarnir erfiðir. Mamman, sálfræðingurinn er no good

Átti samtal við dótturina Hörpu sem er au-pair í París og gætir þar tveggja  barna sem henni finnst vera afar óþekk. Við mæðgur erum að reyna að leggja á ráðin í gegnum Skypið hvernig hún getur beislað litlu Frakkana.

Sálfræðingshjarta móðurinnar slær auðvitað nótt sem dag og hef ég spurt hana hvort hún sé búin að reyna að syngja fyrir þau (Harpa hefur nefnilega einstaklega fallega söngrödd), hvort hún hafi prófað að spila við þau eða lesa fyrir þau Dimmalim á frönsku, bók sem hún tók með sér.
Hún kveðst búin að prófa þetta allt en samt sé erfitt að tjónka við börnin. 

Áðan spurði ég hana hvort hún hafi prófað að knúsa þau, taka hinn bálóþekka strák í fangið og segja honum hvað hann sé mikil snilld.  Nei sagði hún,  gekk ekki með drenginn en tókst með stúlkuna. Söngaðferðin gekk heldur ekki sem skyldi. Þegar hún söng, gólaði bara stráksi .

Þá spurði ég hvort hún hafi prófað að hunsa neikvæða hegðun þeirra.  Já, hún hafði reynt það en var ekki viss um árangur þeirrar aðferðar, alla vega enn sem komið er.  Tungumálið er sannarlega ekki til að hjálpa. Sundum skilur hún ekkert sem börnin segja og þau ekki hana. 

Ég hef alltaf verið svo góð með börn, sagði Harpa,  þess vegna skil ég þetta ekki.
Ég sagði; Harpa, þetta er áskorun, verkefni sem þú munt sigrast á. Við vinnum þetta saman í gegnum Skypið. 

Æi, hvað það er annars erfitt að vera svona fjarri og geta ekki komið að meira gagni.
Ég er tóm sem stendur, veit ekki hverju ég á að stinga upp á næst.
Samt á ég víst að þekkja allar aðferðirnar

Athugasemdir

[Marta Gunnarsdóttir, 8.9.2008 kl. 20:39]

Þetta tekst örugglega þegar þau fara að skilja hvort annað betur.

Svo er þetta virkilega skemmtileg frásögn þrátt fyrir allt.

[Jóna Kolbrún Garðarsdóttir, 9.9.2008 kl. 02:29]

Minn frumburður fór líka sem Au-Pair til Ameríku þegar hún var 19 ára og var hún þar í 1 ár.  Sem betur fer gekk henni vel að tjónka börnin sem hún var að passa vegna þess að hún er gribba eins og mamma hennar, enn þann dag í dag fær hún jólagjafir frá fjölskyldunni og er velkomin í heimsókn hvenær sem er. 

[Sunna Dóra Möller, 9.9.2008 kl. 09:54]

[Jenný Anna Baldursdóttir, 9.9.2008 kl. 17:01]

Alveg er ég viss um að þetta kemur. Tekur bara smá tíma.

Gangi ykkur vel.

[Kristín Katla Árnadóttir, 9.9.2008 kl. 17:22]

Þetta kemur hjá henni Kolbrún mín, en ég skil þig vel gangi dóttir þinni vel

[Ásthildur Cesil Þórðardóttir, 10.9.2008 kl. 10:26]

Jamm mér dettur í hug að þarna sé á ferðinni einhvers konar tilfinningahefti.  Að þau hafi orðið útundan í ást foreldrana, að þau hafi ekki haft nægan tíma fyrir þau.  Þess vegna eru þetta varnarviðbrögð, af því að þau vilja ekki láta hana komast inn úr skelinni.  Þess vegna þarf hún bara að sýna þolinmæði, ekki ýta of mikið á, en gefa þeim tíma, og gera eitthvað smálegt til að gleðja þau, án þess að ætlast til neins í staðinn.  Og smátt og smátt brotnar ísinn. 

[Kolbrún Baldursdóttir, 10.9.2008 kl. 10:37]

Þakka ykkur öllum fyrir falleg orð. Þrautseigjan skiptir öllu svo sannarlega.

[Sólveig Kristín Gunnarsdóttir, 10.9.2008 kl. 23:24]

Thad tekur smá tíma ad kynnast børnunum. Thad getur verid ad thau séu af prófa hana, hvernig hún bregdist vid theim. Hljómar eins og thau eigi eftir ad finna fljótlega, ad hún er skynsøm og gód stelpa og thá róast thau ørugglega. Kær kvedja frá sála.