Fjölmiðlafólk og viðtalstækni

Að minnsta kosti tvö mjög erfið og viðkvæm mál hafa verið til umfjöllunar í fjölmiðlum nú síðustu vikur. Viðtöl hafa verið tekin bæði í sjónvarpi og útvarpi við þolendur ofbeldis og einnig meinta gerendur. Í slíkum viðtölum skiptir öllu máli að spyrlarnir séu með viðtalstækni á hreinu. Borið hefur mikið á því í þessum viðtölum að spurðar eru verulega leiðandi spurningar. Þeir sem sitja fyrir svörum eiga það skilið að spurningum sem til þeirra er varpað um svo viðkvæm og eldfim mál sem þessi séu þannig úr garði gerðar að viðmælendur hafi fullt vald á að svara þeim á þeirra eigin persónulegu forsendum. Séu spurningar leiðandi rýrir það gildi upplýsinga sem fram kemur, gefur falska mynd af svörunum og lýsa oft mikið frekar skoðunum og hugsunum spyrilsins en viðmælandans. Ég legg til að annað hvort fari fjölmiðlafólk á viðtalstækninámskeið og læri samhliða smávegis í sálfræði eða að þau einfaldlega fái fagaðila til að taka viðtölin. Viðtal sem tekið er með leiðandi spurningum, hvort sem það fjallar um viðkvæ,m persónuleg málefni eða önnur almennari málefni eru bæði rýrari af gæðum og hvimleitt á að hlusta.

Svifryksmengun og nagladekk

Í allri þessar umræðu um svifryksmengun þá óttast ég mest að það komi að því að nagladekk verði bönnuð með öllu. Svifryksmengun er vissulega vandamál og eflaust þarf að finna leiðir til að draga úr því. En tilhugsunin um að geta ekki ekið á negldum dekkjum um hávetur (alla vega slitnum nagladekkjum) er skelfileg. Við sem búum  í efra Breiðholti vitum hvernig Breiðholtsbrautin er þegar hálka myndast. Þeir sem ekki eru á annað hvort sérlega góðum vetrardekkjum eða negldum dekkjum, drífa einfaldlega ekki upp Brautina í hálku og þvílíkt öngþveiti sem þá myndast.

 

Stjórnarmyndun í vor.

Mér fannst áhugaverð lesning Birgis Hermannssonar, stjórnmálafræðings  í Fréttablaðinu 4. febrúar en hann spáir í valkosti þegar kemur að myndun ríkisstjórnar í vor. Einn af punktum hans er á þá leið að líklegasta ríkisstjórnin verði annað hvort Samfylking, vinstri græn og Framsóknarflokkur eða Sjálfstæðisflokkur og Samfylking. Hið síðarnefnda er erfitt að sjá fyrir.. og þó, kannski eru engir aðrir valkostir betri eftir allt saman.

Gróði bankanna

Nú er það stöðugt í fréttum hvað viðskiptabankarnir moki inn gríðarlegu féi í gegnum þjónustugjöld og vexti. Kúnnar njóta lítils góðs af þessu á meðan eigendur bankanna hlaða undir sig fjámagni og laun yfirmanna eru ekki í neinum takt við raunveruleikann. Þarna er fámennur hópur sem verður æ ríkari og ríkari á kostnað kúnnanna. Í allri þessari evru umræðu hafa heyrst raddir að hinn almenni borgari sem á einhvern aur í banka geti allt eins sett fé sitt á reikninga erlendis. Þetta er sérstaklega í ljósi þess að framtíðin hér.. þetta með sveiflukennda krónu og allt það sé bara verulega ótrygg. Seðlabankinn mun náttúrulega ekki endalaust getað hækka stýrivexti.
Hvað myndi gerast ef hópur fólks tæki peningana sína úr bönkum landsins, skiptir þeim yfir í evrur eða dollara og stofnar reikninga í bönkum erlendis. Er það raunhæfur möguleiki? Er það sniðugur möguleiki? 

Atvinnuauglýsing í Mbl. í dag á erlendu tungumáli

Mér þótti skrýtið að sjá atvinnuauglýsingu í Morgunblaðinu í dag á erlendu tungumáli frá fyrirtækinu Lauffell sem að mér skylst  staðsett í Hafnarfirði. Ætli þetta fyrirtæki sé erlent og vilji einungis ráða til sín erlenda starfsmenn eða er þetta fyrirtæki íslenskt sem vill ekki ráða til sín íslenska starfsmenn?

Góður pistill hjá Ellerti í Fréttablaðinu 3. febrúar

Ég get ekki annað en dáðst að skrifum Ellerts Schram í Fréttablaðinu í dag þar sem hann skrifar um sérframboð og sjálfseyðingarhvötina. Hann hittir naglann akkúrat á höfuðið og dregur upp raunhæfa mynd af því sem er að gerast nú í aðdraganda kosninganna. Maður á ekki til orð yfir því hvað allir þeir flokkar, öfl og hópar sem er uppsigað við stefnu og vinnubrögð Sjálfstæðisflokksins klúðra miklu og eyðileggja fyrir sjálfum sér. Fyrir sjálfstæðimenn er þetta eins og að horfa á skemmtilegt leikrit, farsa. Á tímabili hélt maður t.d. að einhver alvara gæti orðið úr þessu hjá öldruðum og öryrkjum en viti menn nú gátu þessir hópar ekki einu sinni komið sér saman og blasir nú við að framboðin verði tvö. Þvílík ringulreið. Ég spyr bara ef þessi ringulreið einkennir þessa hópa eða forystumenn þeirra, hvernig yrðu þeir þá í ríkisstjórn. Það eitt sem þetta fólk, já góða fólk, virðist vera sammála um, er að vera ósátt við ríkisstjórnina og vilja koma henni frá. En að standa saman í einu liði er þeim greinilega um megn. Fyrirsjáanlegt er að mörg lítil sérframboð munu líta dagsins ljós næstu vikurnar, já svona  litlar grúppur á við og dreif sem líklega munu engu ná fram.  Gott fyrir sjálfstæðismenn því þetta eykur líkurnar á því að Sjálfstæðisflokkurinn muni koma vel út úr kosningunum  í vor.

Matur í grunnskólum og á sjúkrahúsum misjafn að gæðum?

Í Fréttablaðinu 2. febrúar er pistill um hvernig matur á leikskólum er hvað gæði varðar. Anna Sigríður Ólafsdóttir segir að matur á leikskólum sé misjafn að gæðum. Í þessu sambandi velti ég fyrir mér hvernig gæðum er háttað á matseðli grunnskólanna og einnig á sjúkrahúsunum. Ég var á tímabili tíður gestur á LSH að heimsækja veikan ættingja og varð mér þá stundum litið á bakkelsið sem þar var í boði með sídegiskaffinu. Þar mátti sjá randalínur og kex, já og stundum minnir mig kleinur. Ég veit reyndar ekki hvort nú sé eitthvað annað í boði en fyrir mér var þetta afar ókræsilegt. Hvað varð um heilkornabrauðið og hrökkbrauð með osti? Ég hugsa meira að segja það sé ódýrari valkostur heldur en sætabrauð og kex nema LSH fái alveg sérlega góðan magnafslátt af slíkum vörum.

Fyrsta bloggfærsla

Þessi færsla er búin til af kerfinu þegar notandi er stofnaður. Henni má eyða eða breyta að vild.