Af afli og ábyrgð ...gegnsæ vinnubrögð og heiðarleiki

Ég vil leggja lóð á vogarskálina við endurreisn og uppbyggingu íslensku þjóðarinnar.

Ég vil nýta menntun mína, reynslu og þroska til að tryggja hagsmuni fólksins

Ég vil vera hluti af þeim hópi sem af afli og ábyrgð leitar leiða til að almenningur geti búið við stöðugleika og öryggi í framtíðinni.

Með réttsýni og innsæi að leiðarljósi vil ég vinna með þjóðinni. 

Sjá stefnumál á www.kolbrun.ws og www.profkjor.is

Þátturinn kominn á Netið. Hvað er hægt að gera strax til að bæta efnahagsástand þjóðarinnar?

Þátturinn með Vilhjálmi Egilssyni framkvæmdarstjóri Samtaka Atvinnulífsins kominn á Netið.

Hvað er það fyrsta sem Vilhjálmur Egilsson myndi gera væri hann Seðlabankastjóri?

Um reiðina í samfélaginu og líðan barnanna

Mig langar að birta hér glefsu úr hugvekju sem ég hélt um síðustu jól í Kópavogskirkju. Hugvekjan fjallaði um reiðina í samfélaginu og líðan barnanna í kjölfar efnahagshrunsins.

Hugvekjuna má sjá í heild sinni bæði á www.profkjor.is og www.kolbrun.ws

...Vissulega langar okkur til að létta lund þeirra sem tapað hafa sparifé sínu og til þess reynum við að benda þeim á að horfa nú raunsætt á málið. Þetta voru jú bara peningar, pappírssneplar. En gleymum ekki mitt í allri umhyggjunni að í hinum tapaða aur voru e.t.v. fólgnir draumar og væntingar.  Draumar um eitthvað gott, eitthvað nýtt  og öðruvísi. Nýjar aðstæður, nýjar upplifanir sem aðeins var hægt að öðlast með því að hafa fjárhagslegt svigrúm. Fyrir þessum væntingum ber okkur að sjálfsögðu að bera virðingu.

Síðustu vikur höfum við orðið vitni af mikilli reiði í samfélaginu. Sjálf finnum við mörg fyrir þessari sammannlegu tilfinningu.  Reiðin er ekki síður mikilvæg en gleðin. Þetta eru meðal grunntilfinninga sem hverjum manni er nauðsynlegt að geta upplifað ef lifa á að fullu.  Reiðin er sérstaklega mikilvæg sem liður í persónulegu varnarkerfi sérhvers einstaklings gagnvart ytri áreitum.  Einstaklingur sem ekki getur fundið til reiði í einhverjum mæli getur síður varist þeim sem geta eða vilja skaða hann.

En eins mikilvæg og reiðin er sem hluti af tilfinningarsviði manneskjunnar líður hinum reiða einstaklingi sjaldnast vel. Flestir vita hvernig það er þegar reiðin kraumar innra með manni, vöðvar herpast, blóðþrýstingur hækkar og taugar eru spenntar.  Fæstir óska sér slíks ástands, alla vega ekki til lengri tíma. Óbeisluð reiði sem tekur völdin getur auk þess valdið miklum usla, gert skaða og skilið eftir sig sviðna jörð. Öll vitum hversu sárt það er að horfa upp á þá sem okkur þykir vænt um líða illa, vera svekktir og reiðir. Þá kemur þessi ríka þörf og löngun að vilja laga, reyna að bæta, hjálpa og benda á leiðir til betri líðan.

En áður en við byrjum að sá hvatningu og uppbyggjandi tali er vert að kanna hvort í jarðveginum séu nauðsynleg skilyrði fyrir hin góðu fræ að spíra. Séu skilyrðin ekki fyrir hendi er eins og hvatning og jákvæðni nái ekki í gegn.  Reiðin bara situr sem fastast.  Fyrir svo öflugar tilfinningar eins og reiði og sorg, dugar lítið að ætla að reka á eftir þeim, að ætla að henda þeim út í einu vettvangi eða strika yfir þær með einu pennastriki. Þessi tilfinning eins og önnur þarf sitt svigrúm, hún þarf að fá að renna sitt skeið....
meira á profkjor.is  

Hvað þarf að gera strax í efnahagsmálum þjóðarinnar?

Það vefst ekki fyrir framkvæmdarstjóra SA en hann er gestur Í nærveru sálar, í kvöld kl. 21.30 á ÍNN.

 

Þátturinn með Ragnhildi Helgadóttur endursýndur í dag og er einnig kominn á vefinn.

Þátturinn Í nærveru sálar með Ragnhildi Helgadóttur, fyrrv. alþingismann og ráðherra er endursýndur á ÍNN í dag, sunnudag kl. 17.30

Einnig má sjá hann á vef ÍNN með því að smella hér.

 

Ofsa- og ölvunarakstur rússnesk rúlletta

Enn berast fréttir af ofsaakstri, framúrakstri og ölvunarakstri.  Sem betur fer endar slíkur áhættuakstur ekki alltaf með ósköpum.

Það er þó ekki hinum ölvaða ökumanni að þakka eða þeim sem ekur á ofsahraða heldur frekar einhverju allt öðru þar á meðal forsjóninni.

Þeir sem sleppa með skrekkinn í þetta sinn verða ekki endilega jafn heppnir næst, haldi þeir áhættuhegðun sem þessari áfram. 

Hvar svo sem við erum í störfum okkar staðsett í samfélaginu verðum við að snúa bökum saman og spyrna við þeirri vá sem skapast af áhættuhegðun í umferðinni.  Á þessu sviði megum við ekki sofna á verðinum. Ásamt viðunandi umferðareftirliti er brýnt að hamra stöðugt á því við fólk og þá sérstaklega ungt fólk að sýna fyrirhyggju og varkárni í umferðinni. 

Vanhugsuð ákvörðun í umferðinni getur leitt til óbætanlegs andlegs og líkamlegs tjóns.

Þeirra sem valdir eru að slysum, hafi þeir þá sjálfir lifað af til að upplifa afleiðingar gjörða sinna, býður síðan að búa við byrði sektarkenndar e.t.v. um aldur og ævi.  

 

Vil benda á vefinn www. profkjor.is. Þar er að finna stefnumál og greinar

Ég vil benda á vefinn profkjor.is en á hann hef ég reynt að setja inn texta svo kjósendur eigi betur með að átta sig á hvort þeim finnst ég vera frambærilegur frambjóðandi.

Ég hef í aðdraganda þessa prófkjörs verið, eins og aðrir frambjóðendur, spurð ýmissa spurninga er lúta að helstu þjóðmálum líðandi stundar. Mér finnst mjög mikilvægt að svara þessum spurningum eins samviskusamlega og ég get því ég tel að kjósendur eigi rétt á að vita hvar frambjóðendur standa hvað viðkemur knýjandi málefnum sem taka þarf föstum tökum. 

Ég hvet þá sem hafa frekari spurningar eða langar til að kynnast mér betur sem frambjóðanda að hika ekki við að hafa samband við mig í síma eða með tölvupósti. Einnig skoða vefinn www.kolbrun.ws en inn á hann hef ég undanfarin ár sett fjölmargar greinar og pistla um sálfræðileg og stjórnmálaleg málefni .
Hafið það gott í dag öllsömul.

Í KALLFÆRI á ÍNN. Þátturinn endursýndur um helgina 7. og 8. mars

Jón Kristinn Snæhólm bauð mér að setjast hinum megin við borðið á ÍNN og vera viðmælandi sinn. Það var sérkennileg tilfinning enda á þeirri góðu sjónvarpsstöð þekki ég einungis hitt hlutverkið þ.e. að vera í hlutverki spyrils.

Við förum í gegnum helstu þjóðmálin í kvöld, hann spyr og ég svara:

Skuldir heimilanna, atvinnuleysið, peningastefnan, krónan og hvað mér finnst um aðild að ESB. Einnig hvaða málaflokkur ég vil helst tengja mig við starfaði ég á Alþingi, vinnubrögð og fleira.

Allar skoðanir og hugsanir upp á borð. Það er krafa kjósenda að vita hvar frambjóðendur standa og hvernig þeir hyggjast vinna. Ég er hins vegar andvíg ofurloforðum en get lofað einu og það er að vinna vel og samviskusamlega, vakin og sofin yfir velferð samlanda minna.

Minni jafnframt á vefinn profkjor.is en þar er að finna ýmsar upplýsingar er tengjast persónunni Kolbrúnu, viðhorfum, skoðunum og framtíðarsýn á sviði stjórnmála.

Þátturinn er endursýndur um helgina. 

Ekki hægt að hækka skatta við þessar aðstæður

Ég var spurð að því í gær á fundi hvort mér fyndist að ríkið ætti að skapa störf nú og þá hvernig?

Sannarlega er það forgangsverkefni að leita leiða til að blása lífi í atvinnulífið. Manneskja sem er atvinnulaus og sér ekki í hendi sér að hann/hún fái vinnu innan tíðar býr ekki einungis við fjárhagslegt óöryggi heldur finnst einnig sjálfstraustið hafa beðið hnekki. Fátt er meira niðurdrepandi en að hafa ekki verkefni til að takast á við daglega. Rútína af einhverju tagi er flestum mikilvæg ef ekki nauðsynleg. 

Til að leiðir hverjar svo sem þær eru leiði til viðunandi lausna hvað þetta varðar þarf að ná verðbólgunni niður og lækka vexti til þess að fyrirtæki hafi aðgang að lánsfjármagni og geti fjármagnað rekstur.  Hversu mikil og á hvaða sviði afskipti ríkisins eiga að vera tengist þessari umræðu. Á ríkið að gangast í það að skapa störf eða ætti sem fyrst að losa það við fyrirtæki eins og t.d. bankana?  

Ef ríkið á að skapa störf nú í einhverjum mæli, hvar á að taka til þess fjármagn?  Ríkið hefur stuðlað að aukningu starfa  t.d. þegar farið er í stóriðjuframkvæmdir. Stóriðjuframkvæmdir geta varla verið ofarlega á forgangslistanum nú enda þótt störfin væru vissulega vel þegin. Eigi ríkið að fara í stórframkvæmdir mitt í björgunaraðgerðum og endurreisn er víst að hækka þurfi skatta. Að auka skattabyrði á fólkið nú er aðgerð sem fylla mun mælinn. Almenningur ræður ekki við hærri álögur.

Störf geta hins vegar orðið til með ýmsum hætti. Sem dæmi má nýta mannauðinn, hugvitið til nýsköpunar og styðja við lífvænleg vel rekin sprotafyrirtæki. Einnig má skapa störf eða hindra að störfum fækki með hagræðingu og skipulagningu innan fyrirtækja.  Eins og nú árar gæti verið nauðsynlegt alla vega tímabundið að skipta störfum upp og deila þeim milli manna. Lítil vinna er betri en engin vinna. Æskilegt væri að um þetta næðist sátt. Sátt um aðgerðir sem þessar eykur samkennd meðal manna og löngun til að róa þennan lífróður saman.

Afsökunarbeiðnir

Það er gott að geta beðist afsökunar, það geta alls ekki allir. Stundum er engin krafa um afsökunarbeiðni en einstaklingur getur fundið það í hjarta sínu að hann eigi að gera það, finnist honum hann hafa gert mistök, gert eitthvað á hlut annars.

Nú eru afsökunarbeiðnir, frá ráðamönnum sem finnst þeir eiga sinn þátt í andvaraleysi sem þingmenn þjóðarinnar, farnar að birtast.

Stundum eru mál þannig að afsökunarbeiðni er krafist og viðkomandi einstaklingur eða hópur ákveður að biðjast afsökunar jafnvel þótt hann finni það ekki endilega í hjarta sínu að honum beri að gera það en vill samt sem áður gera það til að svara kalli þeirra sem finnst á sér brotið.

Það að fullorðið fólk geti beðið afsökunar, hvort heldur þjóðina, vini, maka eða börn sín allt eftir eðli málsins, er góður kostur. Foreldrar eiga að geta beðið börn sín afsökunar hafi þau með einhverjum hætti sýnt þeim neikvæða hegðun t.d. skeytt á þeim skapi sínu eða gert eitthvað á hlut barnsins sem því líður illa yfir. Foreldri sem sýnir barni sínu að það er ekki hafið yfir að geta beðið afsökunar er góð fyrirmynd.

Ragnhildur Helgadóttir, fyrrv. alþingismaður og ráðherra fjallar um viðmót þingmanna og starfshætti á Alþingi

Í nærveru sálar í kvöld kl. 9.30 ræðir Ragnhildur Helgadóttir, fyrrv. alþingismaður og ráðherra við Kolbrúnu Baldursdóttur, sálfræðing um viðmót og framkomu þingmanna fyrr og nú. Einnig um starfshætti á þingi, breytingar á starfsreglum eins og styttingu ræðutíma við aðra umræðu og af hverju þingmannamál eiga það til að daga uppi í nefndum.

Tillaga Framsóknar um niðurfellingu hluta skulda ekki nógu vel ígrunduð

Tillaga Framsóknar um að fella niður tuttugu prósent af skuldum landsmanna er samkvæmt Þórólfi Matthíassyni hagfræðingi ekki nógu vel ígrunduð. Eins og hann orðar það þá er með þessu verið að færa fé frá þeim tekjulægri yfir til þeirra tekjuhærri. Fyrir hrunið voru það þeir tekjuhæstu/tekjuhærri sem skulduðu meira en þeir sem voru með lægri tekjur. 

Dæmi, ef þessi tillaga næði fram að ganga þá myndi sá sem skuldar 500 milljónir fá 100 milljónir niðurfelldar á meðan sá sem skuldaði 5 milljónir fengi eina milljón niðurfellda. Sá sem skuldar ekki neitt greiðir skatta til Ríkisins sem tekur á sig að greiða þetta.  Ef eitthvað á að fella niður kemur það í hlut einhvers annars að greiða það. 

Hrói Höttur með öfugum formerkjum sagði sérfræðingurinn um þessa aðgerð yrði hún að veruleika.

Eitthvað þarf greinilega að skoða þetta betur og vonandi kemur hugmynd að lausn sem er sanngjörn og framkvæmanleg. En hvort sú lausn felur í sér niðurfellingu eða að létta með einhverjum hætt enn frekar  á greiðslubyrðinni á eftir að koma í ljós.

Sjálfstæðisflokkurinn og velferðarmálin, þátturinn endursýndur í kvöld.

Viðtal við Stefaníu Óskarsdóttur er endursýnt á ÍNN í kvöld kl. 11.30 í þættinum
Í nærveru sálar.

Sjálfstæðisflokkurinn var stofnaður 1929. Hugmyndafræði sem hann lagði strax fram og kölluð hefur verið sjálfstæðisstefnan felur í sér:
1.  Áherslu á einstaklingsframtak og viðskiptafrelsi
2.  Uppbyggingu velferðakerfis til að tryggja samstöðu í þjóðfélaginu
Það er þetta síðarnefnda sem við Stefanía ræðum sérstaklega um.

Hver er ímynd Sjálfstæðisflokksins þegar kemur að velferðarmálum?

 

Starfshættir á Alþingi og viðmót þingmanna í þingsal

Á mánudaginn ætla ég að hitta hana Ragnhildi Helgadóttur, fyrrv. alþingismann og ráðherra og taka upp viðtal við hana um starfshætti Alþingis og hvernig henni lítist á framkomu og viðmót þingmanna í þingsal.

Karp, þras og gagnkvæmar ásakanir hafa verið talsvert áberandi á þinginu að undanförnu og langar mig að spyrja Ragnhildi hvað henni finnst um það og hvort þetta hafi verið svipað þegar hún var á þingi.

Eins langar mig að heyra hennar skoðun á breytingum um þingsköp sem tóku gildi á síðasta ári þar á meðal nýjum reglum um ræðutíma.

 Þátturinn verður sýndur á ÍNN á mánudagskvöld.

Nú erum við komin með norskan seðlabankastjóra

Það er margt sem íslendingar þurfa að aðlagast þessa dagana. Fæstir hafa undan því að meðtaka hvað þá skilja þær öru breytingar sem eiga sér stað frá einum degi til dags.

Nú erum við komin með útlendan seðlabankastjóra og hvað segja lögin við því?

Eins og svo oft í flóknum málum og málum sem engin fordæmi eru fyrir er spurning með hvernig túlka beri lögin. Þannig er því farið með þennan seðlabankastjóra og ráðningu hans í embættið en um er að ræða mann sem er ekki íslenskur ríkisborgari.

Sigurður Líndal spyr hvort hægt sé að setja hann því ekki sé hægt að skipa hann. Við fyrstu sýn telur hann að það sama eigi að gilda um skipun og setningu.

En það er við fyrstu sýn, hvað kemur svo í ljós þegar farið er að rýna í lögin er ómögulegt að vita. 

Ég vil bjóða þessum nýja seðlabankastjóra velkominn til starfa og vona að hann beri gæfu til að gera góða hluti í þágu íslensku þjóðarinnar á meðan hann er við störf í Seðlabankanum.

Ég vil einnig þakka fráfarandi seðlabankastjórum fyrir sín störf og óska þeim velfarnaðar í framtíðinni.

Stóri Dani hættulegur, getur allt eins ráðist á barn?

Stóri Dani réðst á litla tík í Reykjanesbæ og beit hana þannig að það þurfti að svæfa hana. Svona frétt fær á flesta og ekki síst þá sem eiga litla hunda. Ég er nýkomin í þann hóp og hugsa með skelfingu til þess ef hún litla Smuga mín yrði fyrir svona árás. 

Eru eigendur Stóra Dana ekki áhyggjufullir?

Heyrst hafa svipaðar sögur t.d. að Stóri Dani hafi ráðist á og drepið lömb.  Fram kemur hjá hundaþjálfara að ekki sé hægt að alhæfa um skaðgerð Stóra Dana. Samt sem áður hlýtur fólk að verða að hugsa þetta lengra t.d. hvað ef Stóri Dani réðist á barn?

Frambjóðandi sem ekki er háður neinum fjárhagslega heldur persónulegu sjálfstæði sínu

Frambjóðandi sem er engum háður fjárhagslega og þiggur hvorki framlög né styrki heldur fullu persónulegu sjálfstæði sínu. Hafi hann þennan háttinn á segir það sig sjálft að hann þarf að gæta hófs og aðhalds i fjárútlátum vegna prófkjörsbaráttunnar nema að hann sé þess betur fjárhagslega stöndugur.

Ég hef sjálf tekið þá ákvörðun að taka ekki við neinum frjálsum framlögum/peningastyrkjum frá einstaklingum eða fyrirtækjum til mín persónulega í tengslum við þetta framboð heldur greiða þann kostnað sem af því hlýst af mínu eigin sparifé. Ég mun þar af leiðandi verða að gæta hófs í fjárútlátum vegna baráttunnar og reyna að vinna eins mikið sjálf og ég get á sem hagkvæmastan máta. Kosturinn við þetta er sá að með því að gera þetta með þessum hætti finnst mér ég, sem frambjóðandi halda bæði persónulegu og stjórnmálalegu sjálfstæði og þannig líður mér best gagnvart kjósendum.

Frambjóðendur birti yfirlit yfir fjármál sín

Ég vil taka undir með Sigríði Andersen um mikilvægi þess að frambjóðendur, þeir sem eru að sækjast eftir umboði til að starfa á Alþingi, upplýsi kjósendur um fjármálastöðu sína. Þetta er að sjálfsögðu aðeins í ljósi undangenginna atburða, og umræðu um fjárhagsleg tengsl og hagsmuni kjörinna fulltrúa. Þetta hefur Sigríður nú sjálf gert.

 Það kemur ekki á óvart þótt einhverjir fleiri frambjóðendur vilji í núverandi ástandi sýna fram á að þeir hafi allt sitt á hreinu hvað þessi mál varðar. Mér finnst það heldur ekki óeðlilegt að kjósendur vilji vita einmitt þennan bakgrunn frambjóðenda áður en þeir ákveði endanlega hvernig þeir vilja verja atkvæðum sínum. 

Ég vil þess vegna hvetja frambjóðendur til að fylgja í fótspor Sigríðar Andersen. Það hyggst ég gera sjálf.

Samgleðst fyrrverandi seðlabankastjóra

Ég samgleðst fyrrverandi seðlabankastjóra Ingimundi Friðrikssyni en honum hefur verið boðið starf hjá norska seðlabankanum.

Þarna er á ferðinni maður sem býr yfir mikilli þekkingu á sínu sviði og rekstri seðlabanka. Mér finnst ánægjulegt að vita til þess að kraftar hans fái notið sín og Norðmenn eru heppnir að fá svo hæfan fagmann í sínar raðir.