Ímynd stjórnmálaflokkanna þegar kemur að velferðarmálum á ÍNN kl. 9

Sjálfstæðisflokkurinn og velferðarmálin eru m.a. umræðuefni
Í nærveru sálar á ÍNN í kvöld kl. 9
Gestur er Stefanía Óskarsdóttir, stjórnmálafræðingur.
Sjálfstæðisflokkurinn var stofnaður 1929. Hugmyndafræði sem hann lagði strax fram og kölluð hefur verið sjálfstæðisstefnan, hefur haft þrjú meginstef:
1. Áherslu á einstaklingsframtak og viðskiptafrelsi
2. Uppbyggingu velferðakerfis til að tryggja samstöðu í þjóðfélaginu
3. Áherslu á fullveldi Íslands í samvinnu við bandalagsþjóðir s.s. með aðild að NATO og annarri alþjóðasamvinnu.

Hver er ímynd stjórnmálaflokkanna þegar kemur að velferðarmálum?
Það er mat margra að velferðarmál hafi löngum verið ofar á málefnaskrám miðju- og vinstriflokkanna fremur en stefnuskrám flokka sem skilgreina sig hægriflokka.
En er það þannig í raun og veru?
Þessum spurningum og fleirum mun Stefanía reyna að svara.

 

Velferðarkerfið verður að virka

Velferðarkerfi verður að virka er hugsun sem margir deila um þessar mundir. Oft var þörf fyrir góðu velferðarkerfi en nú er nauðsyn. Í ljósi þeirra erfiðu aðstæðna sem ríkja í samfélaginu er sennilegt að velferðarmálin verði sá málaflokkur sem muni hafa mikið vægi í komandi kosningum.

Þegar talað er um velferðarmál skal það haft í huga að verið er að vísa til breiðs sviðs, allt frá innsta kjarna manneskjunnar: andlega- og líkamlega líðan hennar yfir í nærumhverfið eins og fjölskylduna og stofnanir sem hana þjónusta. 

Þær kringumstæður sem nú ríkja eru sem betur fer ekki dæmigerðar. Það er því nauðsynlegt að skoða í nýju ljósi þau mál sem lúta með einum eða öðrum hætti að manneskjunni og velferð hennar.

Atvinnuleysi vex með degi hverjum og mörg heimili eru nú þegar sokkin í skuldafen. Gæði þess velferðarkerfis sem hér verður við lýði á komandi misserum byggist á hvort tekst að reka það með hagkvæmum hætti án þess að skerða þjónustuna að heitið geti. 

Meginmarkmiðið er að lyfta undir bagga með þeim einstaklingum sem geta ekki séð sér og sínum farborða, í sumum tilvikum tímabundið en í öðrum tilvikum varanlega. Enginn á að þurfa að líða skort á grundvallarnauðsynjum á borð við öruggt  húsaskjól, fæði og klæði. 

Annað kvöld á ÍNN verður gestur minn Í nærveru sálar, Stefanía Óskarsdóttir, stjórnmálafræðingur. Við munum ræða saman um Sjálfsstæðisflokkinn og velferðarmálin. Ein af þremur meginstefnum flokksins er uppbyggingu velferðakerfis til að tryggja samstöðu í þjóðfélaginu. Gera má ráð fyrir að framsetning stefnunnar hafi þó tekið breytingum í takt við tíðarandann hverju sinni, aðstæður í þjóðfélaginu síðan hverjir vermdu ráðherrastólanna á hverjum tíma.

Hversu mikið vægi velferðarkerfið hefur haft síðustu ár í stjórnartíð Sjálfstæðisflokksins og Framsóknar mun Stefanía leitast við að svara ásamt fleiri spurningum þessu tengdu.

Fyrirhyggja, festa og framfarir. Vöndum valið í Reykjavík í vor

Listi frambjóðenda Sjálfstæðisflokksins í Reykjavík liggur nú fyrir og hef ég ákveðið að vera meðal þátttakenda. Yfirlýsingu þess efnis hef ég sent inn í fjölmiðla en langar líka að setja hana hér á bloggið. Ástæðan fyrir framboði mínu er að af langri reynslu sem sálfræðingur tel ég mig geta komið að gagni í þeirri uppbyggingu sem framundan er. 

Hugmyndafræði mín um verklag gengur út á að heyra hvað fólk er að segja, greina og meta aðstæður, afla upplýsinga og leita samráðs hjá lærðum sem og leikmönnum.
Með framboði mínu í komandi prófkjöri langar mig að styrkja stoðir Sjálfstæðisflokksins með nýjum sjónarhornum og í krafti stefnu hans vil ég leggja mitt af mörkum til að vinna þjóðinni gagn. Greinar og stefnumál í tengslum við framboðið er að finna á www.kolbrun.ws

Ég hef ákveðið að taka þátt í prófkjöri Sjálfstæðisflokksins í Reykjavík fyrir komandi Alþingiskosningar. Ég er sálfræðingur og varaþingmaður Sjálfstæðisflokksins og býð mig fram í 4.-5. sæti.
Ég hef verið löggildur sálfræðingur frá 1992 og hlaut sérfræðileyfi Landlæknisembættisins í klínískri sálfræði 2008. Ég er fædd í Reykjavík 1959, lauk stúdentsprófi frá Verzlunarskóla Íslands 1980 og BA prófi frá Háskóla Íslands 1986. Ég lagði stund á framhaldsnám í sálfræði í Rhode Island fylki í Bandaríkjunum og lauk þaðan tveimur Meistaragráðum á fimm ára tímabili.
Ég hef rekið sálfræðistofu og sinnt kennslu á grunn-, framhalds- og háskólastigi samhliða öðrum störfum frá árinu 1992. Ég starfaði um tveggja ára skeið hjá Fangelsismálastofnun ríkisins, var yfirsálfræðingur á Stuðlum um árabil og í átta ár sálfræðingur í Barnavernd Kópavogsbæjar. Ásamt rekstri sálfræðistofunnar hef ég verið undanfarin þrjú ár skólasálfræðingur í Áslandsskóla.
Ég hef átt sæti í Barnaverndarnefnd Reykjavíkur frá því í febrúar 2008. Ég hef setið í ýmsum nefndum og stjórnum m.a. á vegum Sálfræðingafélags Íslands og Sjálfstæðisflokksins.  Ég var formaður Stéttarfélags sálfræðinga, átti einnig  sæti í stjórn BHM og í stjórn Endurmenntunarstofnunar. Ég er varaformaður í stjórn Íbúasamtakanna Betra Breiðholt þar sem ég hef átt sæti frá árinu 2006.
Ég hef haldið fjölmörg námskeið og fyrirlestra um sálfræðileg málefni, samskipti og samningatækni. Ég stjórna þættinum Í nærveru sálar á ÍNN en það eru þættir um félags- og sálfræðileg málefni.
Upplýsingar um námskeið, greinar og pistla má nálgast á www.kolbrun.ws
Ég er gift Jóni Guðmundssyni, plöntulífeðlisfræðingi, lektor við Landbúnaðarháskóla Íslands og á dæturnar Karen Áslaugu sem er hagfræðingur og Hörpu Rún sem er nemi.
Áhugamál eru mörg og lúta einna helst að hreyfingu af ýmsu tagi og landgræðslu. Ég er meðlimur í Rótarý Reykjavík-Austurbæ og tek við embætti verðandi forseta í sumar 2009.

 

Fjölbreyttur listi frambjóðenda í prófkjöri Sjálfstæðisflokksins í Reykjavík

Það eru 29 manns sem bjóða sig fram í prófkjöri sjálfstæðismanna í Reykjavík. Ég veit ekki hvort listinn hafi nokkurn tímann áður verið svona langur. Hvað það þýðir að svo margir úr ýmsum áttum vilji gefa kost á sér, læt ég hverjum og einum um að meta.

Ég fagna þessum fjölda, finnst það frábært að þetta fólk vilji láta gott af sér leiða núna í því óvenjulega árferði sem við búum við.

Á listanum eru núverandi alþingismenn, fyrrum alþingismaður, alþingismaður sem nýlega er kominn heim eins og formaðurinn tók til orða en var áður í Frjálslynda flokknum og þarna má líka finna einn borgarfulltrúa.

Það eru a.m.k einir fjórir hagfræðingar og álíka margir lögfræðingar ef ekki fleiri, markaðs- og fjármálastjórar, læknir, verkfræðingur, bílasali nú og svo ég sem er sálfræðingur.

Þessi skönnun mín er ekki tæmandi en um er að ræða 17 karla og 12 konur.

Frumskógur tryggingarmála, gáleysi eða stórkostlegt gáleysi?

Ásgeir Jónsson var í Kastljósinu að lýsa samskiptum sínum við tryggingarfélag en sonur hans sem er 100% öryrki eftir að maður sem ók á ofsahraða á röngum vegahelmingi skall á bíl Ásgeirs sem var með börnin sín tvö í aftursætinu. Dóttir hans lést í bílslysinu og einnig farþegi hins bílsins.

Ég ætla ekki að rekja frásögnin hér en hægt er að nálgast hana á Netinu. 

Mín hugsun er eftir að hafa hlustað á þetta, þvílíkt endalaust tryggingarrugl. Tryggingarfélagið karpar um túlkun hugtaka eins og hvort um var að ræða gáleysi eða stórkostlegt gáleysi. Í þessu tilviki eru skerðingar á bótum byggðar á ályktun um hvernig drengnum muni reiða af í framtíðinni en hann er nú bundinn við hjólastól.

Auðvitað á fyrir löngu að vera búið að grandskoða þessi mál, einfalda þau þannig að fólk sem verður fyrir slíkum hörmungum þurfi ekki að ganga í gegnum óskýra túlkun tryggingarfélagsins og jafnvel karp um krónur á sama tíma og það er að syrgja barnið sitt eða ástvin sinn. 

Ég fagna mjög þessari umræðu og vil þakka Ásgeiri fyrir að tjá sig um þessa erfiðu reynslu. Vonandi verður hún til þess að hreinsað verði til í þessu kraðaki, frumskógi tryggingarmála, hvort sem þessi ríkisstjórn muni gera það eða sú næsta?  Þetta á vissulega að vera löngu búið að gera.

Vinnubrögð og verklag á Alþingi

Hvernig er hægt að gera vinnubrögð, verklag og almennt séð starfshætti Alþingis skilvirkari og markvissari?

Sumir þingmenn hafa tjáð sig um hvað ríkir mikill seinagangur í verkháttum á þinginu og að nauðsynlegt væri að einfalda verklag og ryðja burtu óþarfa hindrunum.  Óheyrilegur tími fer í að ræða mál fram og til baka, spyrja, svara, ásaka, verjast, karpa, stundum dag eftir dag.

Vissulega er mjög mismunandi hvað þingmenn fara oft í pontu. Sumir fara ítrekað og sitja ekki þegjandi yfir neinu máli. Aðrir láta heyra í sér endrum og sinnum en sumir sjaldan eða næstum aldrei.

Einstaka harðduglegir þingmenn hafa tjáð óánægju sína með að geta ekki beitt sér meira með  markvissum og skilvísum hætti. Þeir þrá að láta hendur standa fram úr ermum, drífa í að afgreiða mál sem jafnvel eru allt að því borðliggjandi.

Sú staðreynd að þingmannamál sem fara í nefndir, daga flest öll þar uppi. Ég spurði stjórnmálafræðing um þetta atriði og hún sagði að þingmannamál kæmust ekki í gegn vegna þess að dagskrá þingsins er í höndum meirihluta Alþingis, þeirra sem fara fyrir ríkisstjórn. Ríkisstjórn er með ákveðna dagskrá sem hún vill koma í gegn.  Ráherrar hafa ráðuneytin í vinnu fyrir sig og þar liggur sérfræðiþekking og líka vitneskja um hvað þurfi að gera í hverjum málaflokk.

Það er þess vegna erfitt fyrir óbreyttan þingmann að keppa við þessa sérfræðinga. Mikið hefur verið talað um að það þurfi að styrkja Alþingi m.a. með tilliti til þess að þingmenn geti leitað til starfsmanna sem hafa sérfræðiþekkingu í margvíslegum málaflokkum sem geta unnið að úttektum o.fl. sem er forsenda góðs undirbúnings fyrir framlögð þingmál.

Á þessu hlýtur að vera hægt að gera bragarbót. Þarna er margt sem mætti skoða með það í huga að gera á því breytingar svo þingmenn geti nýtt krafta sína að fullu og þurfa ekki að sitja og finnast þeir vera áhrifalitlir.

Kynin og kynlíf, fræðsla og spjall, seinni hluti, á ÍNN í kvöld kl. 9

Seinni þátturinn með Jónu Ingibjörgu Jónsdóttur, kynfræðingi er í kvöld
Í nærveru sálar.
Haldið er áfram umræðunni þar sem frá var horfið síðasta mánudag.
Mismunandi sýn á kynlífsvanda
Helstu kynlífsvandamál kynjanna.

Mál Birgis Páls sem dæmdur var í Færeyjum vegna aðildar að Pólstjörnumálinu stórfurðulegt

Ég var að hlusta á Kastljósið og þar á meðal á umfjöllun um mál Birgis Páls Marteinssonar einn af þeim sem komu við sögu í Pólstjörnumálinu. Saksóknarinn, Linda Margarete Hasselberg krafðist þess að Birgir Páll yrði dæmdur í 10 ára fangelsi.

Með Pólstjörnumálinu er átt við smyglið sem upp komst þegar skúta full af fíkniefnum var tekin á Fáskrúðsfirði. Skútunni var siglt hingað frá Danmörku en hún hafði viðkomu í Færeyjum þar sem Birgir Páll tók við tveim kílóum af amfetamíni frá skipverjum

Af umfjölluninni að dæma í Kastljósinu í kvöld virðist sem Birgir Páll, ungur drengur, hafi unnið það eitt til saka að vera  á röngum stað á röngum tíma.

Margt er mjög furðulegt í þessu máli en það er erfitt að fullyrða nokkuð eða álykta frekar um það, hafi maður ekki kynnt sér málið í hnotskurn.

Eitt virðist liggja skýrt fyrir og það er að Birgir Páll sat í óheyrilega langan tíma í einangrun.  Ef litið er til baka minnist maður þess ekki að hafa heyrt mikið fjallað um hlut Birgis sérstaklega nema í byrjun,  en síðan ekki svo mikið  fyrr en dómur féll yfir honum í Færeyjum.
Minnst var einnig á, á einhverjum tímapunkti, að lögmaður hans væri fremur atkvæðalítill.

Nú beinast sjónir manna að öllu ferlinu og sérstaklega hvernig þetta sneri að þessum unga manni.  

Ég vona í það minnsta að hægt verði að varpa frekara ljósi á t.d. aðkomu saksóknarans og eins ef það reynist rétt, eins og fram kom í Kastljósinu, að þetta hafi átt að vera eitthvað fordæmismál.

Hefði einhver, ríkisvaldi: stofnun að samtök hér á Íslandi, getað beitt meiri þrýstingi eða vakið athygli á stöðu þessa drengs mikið fyrr á tímabili einangrunarsetu hans?

Bara spyr?

 

Að fjölmiðlar gæti jafnræðis

Senn fara prófkjör stjórnmálaflokkanna í hönd. Eins og gefur að skilja munu frambjóðendur vilja koma málum sínum á framfæri og ein hefðbundnasta leiðin er að senda inn greinar í dagblöðin.

Í kjölfar hrunsins hvarf eitt af dagblöðunum af markaði, 24 stundir, þannig að eftir standa Morgunblaðið og Fréttablaðið.

Það segir sig sjálft að þessi tvö blöð hafa ekki tök á að birta allar þær greinar sem streyma að hvort heldur þær séu skoðanir fólksins eða fjalla um málefni frambjóðenda.

Það sem er þó óskandi er að blöðin gæti jafnræðis og forðist að hygla einum umfram annan af einhverjum orsökum. Það er mjög ósanngjarnt og ólýðræðislegt fái einn frambjóðandi greiðari aðgang að einhverjum fjölmiðli.  Það er heldur ekki sanngjarnt gagnvart lesendum/kjósendum sem e.t.v. fara þá á mis við að kynna sér málefni allra frambjóðenda.

Ástvinaþema á ÍNN. Fræðsla og spjall um kynin og kynlíf

Jóna Ingibjörg Jónsdóttir, kynfræðingur er gestur
Í Nærveru sálar
mánudagana 9. og 16. febrúar.

Rætt verður um mismunandi mælikvarða og hugmyndir um kynlíf:
Kynjamismun hvað varðar kynlöngun.
Tvíþættur tilgangur kynlífs.
Mismunandi sýn á kynlífsvanda.
Helstu kynlífsvandamál kvenna og karla. "Afgangskynlíf"...hvað er átt við með því? 

Upplýsandi þættir um mikilvægt málefni.
Hafi einhverjir spurningar sem lúta að þessum málum kann að vera að við þeim komi svör. 
Segja má að eins konar ástvinaþema sé á ÍNN um þessar mundir en nýlega hafa verið sýndir þættirnir Ástvinanudd.

Fannst látin í Kapelluhrauni og var búsett í Breiðholti

Kona fannst látin í dúfnakofa í Kapelluhrauni í gær.
Það hefur verið óskemmtilegt að koma þarna að svo mikið er víst.

Málið er allt hið dapurlegasta. Lítið er vitað en talið er að konan hafi ofkælst.

Það vekur athygli að sérstaklega er tekið fram að maðurinn, sambýlismaður konunar, liggi undir grun og að þau hafi verið búsett í Breiðholti.

Það blasir ekki við, alla vega ekki fyrir mér,  hvað búseta fólksins skiptir máli í þessu fréttaflutningssamhengi.

Eftir því hefur hins vegar verið tekið að fjölmiðlar nefna gjarnan Breiðholtið, komi hverfið við sögu þegar fluttar eru fréttir um málefni sem með einhverjum hætti tengjast glæpsamlegu athæfi.

Þetta hafa Breiðhyltingar margsinnis tekið eftir og tjáð sig um ítrekað.

 Hlúa þarf að ímynd Breiðholtsins

Sjálfhverfa og siðblinda hinn versti kokkteill

Það hafa sannarlega margir komið ár sinni vel fyrir borð ef marka má fréttir af fólki sem í stórum stíl afsalaði sér eignum til maka sinna (eiginkvenna) rétt áður en bankahrunið skall á.  Íbúðarhúsin, jarðir, sumarbústaðir, hesthús og jeppar voru skráðir á konurnar.

Samkvæmt þessu vissu margir greinilega hvað var í aðsigi og ætluðu nú aldeilis ekki að sökkva með þjóðinni í eitthvert skulda- og gjaldþrotafen.

Þetta var vitað árið 2005 og þá alveg ljóst að ekki var við neitt ráðið, heyrði ég mann nokkurn segja sem starfaði á vettvangi þar sem aðgangur var að upplýsingum um raunverulega stöðu og þróun mála. Þetta hafa svo sem fleiri sagst hafa vitað og tjáð sig um.

En þessi mál þarf að skoða. Það er alveg óviðunandi að þeir sem tóku virkan og meðvitaðan þátt í vafasömum viðskiptaháttum og léku sér með sparifé fólksins í landinu takist að koma öllu sínu undan á meðan þeir sem  t.d. hvergi komu nærri sitja uppi með skaðann.

Tíminn vinnur ekki með okkur í að ná til þessara einstaklinga. Eins og Ása Ólafsdóttir, lektor við lagadeild HÍ segir þá er hægt að rifta svona samningum innan tveggja ára.  Ef enginn krefst gjaldþrotaskipta í búi  þessara aðila í 24 mánuði eru þeir sloppnir, segir Ásta.

Tvísýnt um Tónlistarhúsið

Óvís er hvort hægt verði að ljúka byggingu Tónlistar- og ráðstefnuhúss nú í kjölfar efnahagshruns.

Kannski er það óraunhæft að halda að hægt sé að LJÚKA byggingu þess en óskandi er að hægt verði að halda eitthvað áfram með það og loka því þannig að það liggi ekki undir skemmdum. 

Búið er að setja í bygginguna 10 milljarða, eða tæpan helming þess sem áætlað er að það kosti. Að láta þetta standa opið fyrir veðri og vindum og drabbast niður væri sóun á þessu fé. Ef látið standa næstu misseri á því byggingarstigi sem það er á núna ereinnig af því mikil sjónmengun.

Björgunaraðgerðir þyrftu að miðast í það minnsta við að ganga þannig frá húsinu að það liggi ekki undir skemmdum og væri þokkalegt á að líta þar sem það stendur í hjarta borgarinnar.

Þátturinn með Helgu Jónsdóttur á dagskrá í kvöld

Þættinum með henni Helgu Jónsdóttur var frestað í síðustu viku vegna tveggja tíma Hrafnaþings. Hann er nú á dagskrá í kvöld.

Vonbrigði og væntingar bankastarfsmanna á ÍNN í kvöld kl. 9
Í nærveru sálar.
Helga Jónsdóttir er formaður Félags starfsmanna Landsbankans.
Hún segir okkur frá örlagamorgninum 7. október sl. þegar starfsmönnum var tjáð að Landsbankinn hafði verið tekinn yfir.

Hún er sannkölluð Pollýanna hún Helga. Með jákvæðni og bjartsýni hefur hún stutt félaga sína í bankanum. Við ræðum um vonbrigðin og sorgina yfir uppsögnunum.  Svo er það vonin og væntingar um að byggja megi upp nýjan og sterkan banka.

Rétt og eðlilegt að fella niður þingveislur og aðrar móttökur á vegum Alþingis.

Það hefði skotið skökku við hefðu árlegar þingveislur verið haldnar nú eins og áður þegar öldin var önnur ef svo má að orði komast.

Að halda svo kostnaðarsamar skemmtanir sem einungis eru ætlaðar ráðamönnum og mökum þeirra hefði sært siðferðiskennd fólksins í landinu sem margt hvert á nú í hinu mesta fjárhagslegu basli með tilheyrandi fylgifiskum.

Ég er ánægð með að þá ákvörðun að fella þessa árlegu viðburði niður í sparnaðarskyni. Ákvörðun um þetta var að tillögu forseta Alþingis en það er einmitt þingforseti sem stendur fyrir hefðbundnum móttökum á vegum Alþingis.

Framsókn bæði misskilur og misnotar stöðu sína.

Það kemur kannski ekki á óvart að það sem Framsókn bauð í upphafi hefur nú tekið á sig nýjar og flóknari myndir.

Framsókn bauð fram stuðning sinn við þessa minnihlutastjórn til þess að verja hana falli. Í tilboðinu vildi Framsókn að lögð yrði áherslu á: stjórnlagaþing, aukna aðstoð við heimilin og kosningar sem fyrst. 

Þetta er nú þegar komið inn í málefnasamninginn en þá hefur Framsókn bætt við kröfum og heimtar nú að stinga puttunum í fleiri mál. 

Stóð það til að þeir myndu eiga að leggja blessun sína yfir allt sem þessi stjórn hygðist ætla að gera?

Ef svo er hef ég alla vega misskilið tilboð Framsóknar frá upphafi.

Við þetta má bæta þeirri hugsun að þeir gætu allt eins verið aðilar að þessu ríkisstjórnarsamstarfi þar sem þeir ætla hvort eð er að vera með nefið ofan í öllum málum.

Ef Framsókn ætlar að halda áfram að vera þessi hindrun og breyta leikreglunum svona eftir hendinni trúi ég að þeir ríði ekki feitum hesti frá kosningunum í vor.

 

Helsti styrkleiki sérhvers stjórnmálaflokks

Velferðarmál í brennidepli er frétt sem ber að fagna.

Fólk sem stafar að velferðarmálum landans fagnar án efa þeirri frétt að leggja eigi áherslu á velferðarmálin. Velferðarmál hafa verið í brennidepli með einum eða öðrum hætti en vegna erfiðra aðstæðna í samfélaginu núna er gríðarlega mikilvægt að á þau verði lögð sérstök áhersla.

Stefnuskrá flestra flokka tekur á þessum málaflokki enda þótt þau fái mismikið í rými á hverjum tíma.

Til að öllum málasviðum sé sinnt er það óumdeilanlegur styrkleiki sérhvers stjórnmálaflokks að hafa að skipa breiðum hópi, manna og kvenna sem lagt geta lóð á vogarskálar ólíkra málaflokka.

Ákveðin útfærsla persónukjörs gæti verið fýsilegur kostur.

Það eru miklar líkur á að fyrir dyrum séu einhverjar breytingar er viðkoma vali á fulltrúum til að gegna þingmennsku. Sem dæmi þá hugnast mörgum sú breyting að geta kosið menn en ekki flokka. Þannig geti einstaka þingmenn fylgt frekar sinni samvisku og sannfæringu í stefnumálum.

Persónukjör í formi óraðaðs lista sem flokkarnir leggðu fram gæti verið fýsilegur kostur.
Hitt er hvort kjósa eigi persónur óháð flokkum. Til greina kemur auðvitað að flokkar geti boðið fram lista sem er óraðaður og sé það þá í valdi kjósandans að velja þá aðila á listanum sem hann vill setja efsta. Einnig gæti maður hugsað sér hvort sem listinn er raðaður eða óraðaður að kjósandanum sé það í sjálfsvald sett hvort hann merki við einn eða þrjá ef því er að skipta. Þess vegna gæti hann valið einn frambjóðanda og látið þar við sitja.

Kosningarkerfi er eflaust hægt að breyta með ýmsum hætti, bæði á flókinn máta og einfaldan. Ein útfærslan er að hafa einhvers konar einstaklingsframboð þannig að atkvæði kjósandans þurfi ekki að tilheyra neinum flokki heldur einungis persónu. Þessi aðferð held ég að sé sjaldgæf ef nokkurs staðar viðhöfð enda illa farið með atkvæðið. Þeir sem mæla fyrir því að hægt yrði að merkja við nöfn óháð listum segja að aðeins þannig sé hægt að kjósa menn eftir málefnum og með þessum hætti séu skýrari tengsl milli loforða og ábyrgðar.

Á þessu sem öðru eru margar hliðar, mörg sjónarhorn og vinklar. Því er um að gera að ræða þetta í bak og fyrir.

Mikil aðsókn á fund í Breiðholtsskóla vegna umræðunnar um kynferðisofbeldi gegn börnum

Það var mikil aðsókn á fundinn í Breiðholtsskóla í gærkvöldi en hann fjallaði um  hvernig við getum kennt börnum okkar að varast kynferðisafbrotamenn. Fyrir þessum viðburði stóð foreldrafélag skólans.

Lögreglan reið á vaðið og fór yfir sínar vinnureglur. Hún hvatti fólk til að hafa samband yrði það vart við einhvern einstakling í hverfinu sem viðhefði grunsamlegt athæfi.

Það var mér mikil ánægja að vera beðin um að halda fyrirlestur þarna og fór í stórum dráttum yfir með hvaða hætti skólinn og foreldrar gætu sameinast um að ræða við börnin um þessi mál. Einnig að þau börn sem ekki hefðu fengið næga og viðeigandi fræðslu væru í hvað mestri áhættu. Farið var yfir hver væru helstu grunnhugtök fræðslunnar og hvaða lesefni væri fáanlegt os.sfrv.

Í mínu innleggi lagði ég áherslu á að skólinn og foreldrar vinni þetta saman. Ætli skólinn að bjóða upp á fræðslu er mikilvægt að foreldrar séu búnir að kynna sér hana og viti hvenær hún fer fram. Með þeim hætti geta foreldrar fylgt umræðunni eftir á heimilunum og svarað spurningum sem upp kunna að koma í kjölfarið.

Fram kom jafnframt að forvarnir í formi fjölbreytilegrar fræðslu sem byrja snemma gera börnin hæfari í að lesa umhverfið, meta aðstæður og greina muninn á atferli sem telst rétt og eðlilegt og hvenær það er ósiðlegt og ólöglegt. Sterkt innra varnarkerfi er ein besta vörnin sem völ er á gegn ytri vá sem þessari.

Kynferðisofbeldi á sér stað á ólíklegustu stöðum s.s. á heimilum, á heimili ættingja og vina fjölskyldunnar, dæmi er um tilfelli á heimilum vina barna, í hverfinu og í sundlaugum.

Fundinum lauk með því að Sigríður Björnsdóttir frá samtökunum Blátt Áfram sagði gestum frá sinni reynslu en hún var um árabil þolandi kynferðislegs ofbeldis á heimili.