Pálmatré í Vogabyggð, eitt stórt klúður!

Pálmatré í Vogabyggð. Ég spurði hvað væri að frétta af raunhæfismatinu og fékk svar í vikunni sem leið.

Hér eru bókanir Flokkur Fólksins og meirihlutans og gagnbókanir. Ég segi í gagnbókun, hvernig væri bara að viðurkenna að þetta var eitt stórt klúður??!

 

Bókun

Flokkur fólksins spurði hvað væri að frétta af raunhæfismati á útilistaverki í Vogabyggð. Fram kemur að raunhæfismatið er ekki hafið en er á dagskrá. Matið verður unnið af óháðum ráðgjöfum ásamt sérfræðingum umhverfis- og skipulagssviðs. Áætlaður kostnaður við raunhæfismatið liggur ekki fyrir. 

Í raunhæfismatsferlinu á að planta trjám á opnum svæðum og athuga hvort þau lifi. Þetta getur tekið mörg ár og orðið ansi fjárfrekt. Fulltrúi Flokks fólksins vill benda á að nú þegar hafa sterkar vísbendingar komið fram um að þetta gangi ekki, sé ekki aðeins óraunhæft heldur hrein og klár vitleysa. Mörgum finnst það stórt álitamál og jafnvel ábyrgðarhluti að borgarmeirihlutinn ætli að verja bæði tíma og  fjármagni í eitthvað sem er ljóst  að muni ekki ganga. Hér er gott dæmi þess hvernig fé og tíma er eytt í gæluverkefni í stað þess að huga að þarfari hlutum eins og að styrkja grunnþjónustu. Fulltrúa Flokks fólksins finnst að verið sé að teygja málið því meirihlutinn á erfitt með að viðurkenna mistök. En gerði hann það, væri hann maður að meiri!

 

Borgarráðsfulltrúar Samfylkingarinnar, Viðreisnar, Pírata og Vinstri grænna leggja fram svohljóðandi gagnbókun:

Ekki er verið að „teygja“ málið líkt og áheyrnarfulltrúi Flokks fólksins heldur fram heldur kemur beinlínis fram í svarinu eftirfarandi: „Ekki eru tafir á undirbúningsvinnu eða framkvæmdum í Vogabyggð vegna raunhæfismatsins“.

 

Áheyrnarfulltrúi Flokks fólksins leggur fram svohljóðandi gagnbókun:

Það geta öllum orðið á mistök og er tímabært að skipulagsyfirvöld viðurkenni klúður sitt varðandi þetta pálmadæmi í Vogahverfi og spari þar með  borgarbúum óþarfa útgjöld.

Börnum úthýst vegna vanskila foreldra

Eins og fréttist um daginn þá eru dæmi um að nokkur fjöldi barna sem búsett eru í Reykjavíkurborg eigi á hættu að fá ekki boðaða vist í leikskóla vegna vanskila foreldra við sveitarfélagið.

Hér er bókun:

Fulltrúi Flokkur fólksins vill taka undir orð umboðsmanns barna þar sem hún segir að ákvörðun sveitarfélags um að synja foreldrum í erfiðri stöðu um vistun fyrir barn í leikskóla er eingöngu til þess fallin að auka á erfiðleika viðkomandi heimilis með því að gera foreldrum síður kleift að stunda vinnu utan heimilis og framfæra börn sín. Þannig minnka sömuleiðis líkurnar á því að skuldir foreldra við sveitarfélagið verði greiddar. Tilefni bréfsins er að fram hefur komið í fjölmiðlum að nokkur fjöldi barna sem búsett eru í Reykjavíkurborg eigi á hættu að fá ekki boðaða vist í leikskóla vegna vanskila foreldra við sveitarfélagið.

Dæmi eru um að foreldrar hafi fengið tilkynningar um uppsögn á vistunarsamningi við leikskóla af sömu ástæðum. Í mannréttindastefnu og Barnasáttmálanum segir að börn skuli hafa jafnan rétt án tillits til m.a. efnahagsástands foreldra. Börn eiga aldrei að þurfa að líða fyrir fátækt. Huga þarf einmitt sérstaklega að börnum í aðstæðum þar sem fátækt ríkir en ekki útiloka þau með því að meina þeim vist í leikskóla af því að foreldrar þeirra geti ekki borgað. Nú er aðstæður vegna COVID að koma skýrar í ljós. Róður er þungur hjá mörgum foreldrum og á eftir að þyngjast enn.

Hverfisskipulag Breiðholts, samráðsþátturinn

Tillögum Flokks fólksins um að auka aðgengi Breiðhyltinga að skipulagsyfirvöldum vegna hverfisskipulags Breiðholts var felld á fundi skipulags- og samgönguráðs í morgun. Aðallega var tillagan lögð fram til að tryggja að þeir sem halda sig heima nú vegna COVID fái tækifæri til að eiga samtal um hverfisskipulagið. En skipulagsyfirvöld telja ekki þörf á fjölgun viðveru eða frekari fundum þar sem mikil þátttaka hefur verið í samráðsferli eftir því sem segir í bókun þeirra.

Fulltrúi Flokks fólksins lagði til að viðverudögum verði fjölgað í Mjódd og Gerðubergi vegna COVID ástandsins. Einnig fannst Flokki fólksins mikilvægt að beðið verði eftir að COVID aðstæður verði öruggari svo hægt er að halda almennilega íbúaráðsfundir í hverju hverfi og fyrir hverfið í heild.

Í því COVID ástandi sem nú ríkir treysta sumir sér ekki út úr húsi af ótta við smit. Sumir eru einnig  í sóttkví eða einangrun vegna COVID.

Hér þarf að gæta að jafnræði og sjá til þess að aðstæður séu með þeim hætti að allir hafi jöfn tækifæri til að kynna sér hugmyndirnar og koma skoðunum sínum á framfæri með beinum hætti.  

Með því að fella þessa tillögu er verið að loka fyrir þann möguleika að það fólk sem er fast heima vegna COVID geti komið til skrafs og ráðagerðar um hverfisskipulagið.
Fyrir þá sem eru fastir heima þeim þarf að bjóða aðrar leiðir til að fá kynningu og koma ábendingum sínum á framfæri. Vel má hugsa sér að starfsmaður fari í heimsóknir til fólks sem óska eftir að ræða málin.

 

 

 

Heima sem lengst

Flokkur fólksins hefur barist fyrir bættum kjörum og aðstæðum eldri borgara og öryrkja bæði á Alþingi og í Reykjavíkurborg. Til þess að það geti verið raunverulegur kostur fyrir eldri borgara að vera sem lengst heima þá er mikilvægt að gera nokkrar breytingar á verkferlum þjónustunnar og taka inn fleiri þjónustuþætti. Þjónustuþörf er mismunandi eins og gengur en stundum vantar ekki mikið upp á til að viðkomandi geti búið lengur á heimili sínu.

Fulltrúi Flokks fólksins lagði fram í velferðarráði 19. ágúst 14 tillögur sem sneru að bættri þjónustu við eldri borgara í heimahúsum og fjölgun þjónustuþátta. Öllum nema fjórum var hafnað. Frávísun var m.a. á grundvelli þess að verklagsreglur og framkvæmdaferill væru settar af starfsmönnum velferðarsviðs en ekki velferðarráði. Hvatinn að gerð tillagnanna var frétt um að matarsending til eldri borgara hefði verið skilin eftir á hurðarhúni eftir að sendill hafði hringt dyrabjöllu sem ekki var svarað.

 

Til þess að draga úr hættu á misskilningi milli þjónustuveitanda og þjónustuþega er greinilegt að breyta verður verkferlum. Hvað viðkemur þessum þjónustuþætti sérstaklega, lagði fulltrúi Flokks fólksins einnig til að maturinn væri sendur út sama dag og hann er framleiddur og að umbúðum verði breytt til að auðvelda þjónustuþegum að opna þær. Eins og umbúðir eru núna er erfitt að rífa plastið af bakkanum. 

Meðal tillagna var einnig ein tillaga sem laut að hlutverki sendilsins. Ef enginn skilaboð eða fyrirmæli liggja fyrir um annars konar afhendingu matarins þá er hægt að ganga út frá því sem vísu að þjónustuþegi taki á móti matnum úr hendi sendils. Ef þjónustuþegi svarar hvorki dyrabjöllu eða síma ætti sendill að hringja í ættingja og upplýsa um stöðuna. Ef enginn ættingi er til staðar þarf að upplýsa þjónustumiðstöð. Með símtali sendils til ættingja (eða þjónustumiðstöðvar) er ættingi kominn með upplýsingar um að þjónustuþegi svari hvorki dyrabjöllu né síma þrátt fyrir að hann viti að matarsending sé væntanleg. Ættingi (þjónustumiðstöð) getur þá tekið ákvörðun byggða á þessum upplýsingum um hvað skuli gera í stöðunni. Þetta gæti verið vísbending um að þjónustuþegi sé í vanda og kalla þurfi á lögreglu/sjúkrabíl.

 

Þegar eldri borgarar eru annars vegar eru allir þeir sem hafa við þá samskipti hluti af öryggisneti. Safnist sem dæmi matur upp hjá þjónustuþega sem óskað hefur eftir að hann sé skilinn eftir fyrir utan dyr hlýtur sendill að láta ættingja eða þjónustumiðstöð vita sem myndu í framhaldi leita orsaka.

Í öllu falli þarf matarsendingin að komast til skila enda vara sem búið er að greiða fyrir. Ekki er boðlegt að fara aftur til baka með matarsendinguna og ætlast til að þjónustuþegi sæki hana sjálfur, sendi leigubíl eftir henni eða fái hana daginn eftir. Þegar ekki er komið til dyra til að taka við matnum er heldur ekki réttlætanlegt að skilja matinn eftir á hurðarhúninum og láta þar við sitja nema fyrirmæli hafi komið um að það sé í lagi.

Fjölga þjónustutilboðum

Það er mat fulltrúa Flokks fólksins að útvíkka þurfi einnig ákveðna þjónustuþætti og bæta fleirum við þá þjónustu sem nú býðst til þess að auka möguleikana á að viðkomandi geti búið lengur heima. Létta þarf fjárhagslega undir með mörgum eldri borgurum. Lagt var til að þeir sem búa í öðru húsnæði en þjónustuíbúð ættu að fá niðurgreiðslur á þeim þáttum sem eru að jafnaði innifaldir í þjónustuíbúð s.s. rafmagn, húsgjald og þrif í görðum.

 

Einnig var lagt til að velferðaryfirvöld taki þátt í kostnaði við öryggishnapp. Rök meirihlutans í velferðarráði fyrir að fella þá tillögu voru "að það sé varasamt að setja það fordæmi að borgin fari að fyrra bragði og óumbeðin inn á verksvið ráðuneytis og sendi þar með þau skilaboð að kostnaðarþátttaka ráðuneytis sé óþörf“.

En hver er eiginlega forgangsröðunin hér? Hvort er það þjónustuþeginn eða hræðsla velferðaryfirvalda við að gefa fordæmi?

Ekki ábyrgð velferðarráðs?

Það er sérkennilegt að vísa frá og fella tillögur með vísan í að verklagsreglur og framkvæmdaferill séu settar af starfsmönnum velferðarsviðs en ekki velferðarráði. Auðvitað kemur það velferðarráði við ef verklagsreglur og framkvæmdaferill þjónustu velferðarsviðs við eldri borgara í heimahúsi þarfnast betrumbóta eða er ábótavant.

Mannlegi þátturinn má aldrei gleymast þegar verið er skipuleggja þjónustu fyrir borgaranna. Velferðaryfirvöld ættu ávallt að hafa fullt samráð við þjónustuþega og hugsa hvert skref út frá þörfum hans. Hlusta þarf á þjónustuþegana og aðstandendur þeirra. Það er á ábyrgð velferðarráðs sem er yfir velferðarsviði að tryggja að allir þessir þættir séu í lagi.

 

Birt í Morgunblaðinu 31.8.2020

Greinilega eldfimt og ofurviðkvæmt

Af óskiljanlegum ástæðum var tillögu Flokks fólksins um að borgin kynnti sér starfshætti t.d. Þjóðverja í aðgerðum er varða rakaskemmdir vísað frá á fundi borgarráðs í morgun.
Málið var greinilega eitthvað eldfimt því ekki fengust neinar skýringar á frávísuninni.
Tillagan var einföld og mild í sjálfu sér og sneri að því að hvetja umhverfisráð/svið að kynna sér starfshætti frá fleiri þjóðum svo sem Þjóðverjum eða Dönum en þessar þjóðir hafa náð góðum árangri í aðgerðum sem varða myglu- og rakaskemmdir í opinberum byggingum. 

Ég reiddist því ég hafði lagt vinnu í þessa tillögu og rætt við marga. Staðgengill formanns borgarráðs sem stýrði fundi fleygði þessari tillögu út eins og óhreinni tusku án skýringa nema bara af því að hún hafði valdið. Hvað á maður að halda þegar svona brútal vinnubrögð eru viðhöfð? Af hverju mátti þessi tillaga ekki fara í skoðun? 

 

Hér er bókun við frávísuninni:

Tillaga Flokks fólksins að umhverfis- og skipulagssvið kynni sér starfshætti frá fleiri þjóðum t.d. Þjóðverjum og Dönum sem hafa náð góðum árangri í aðgerðum sem varða rakaskemmdir hefur verið vísað frá á fundi borgarráðs án nokkurra raka. Staðgengill formanns borgarráðs segir við frávísun tillögunnar að henni beri ekki skylda til að rökstyðja eitt eða neitt. Af einhverjum ástæðum virðist málið ofurviðkvæmt og eldfimt, svo eldfimt að ekki er einu sinni hægt að senda tillöguna til frekari skoðunar eða umsagnar hjá umhverfissviði?

Fulltrúi Flokks fólksins á því ekki annarra kosta völ en að leggja tillöguna fyrir borgarstjórn. Tillagan var um að bæta loftgæðamál vegna rakaskemmda og annarra ástæðna í skólum en það er stórt vandamál víða. Afleiðingar hafa verið skelfilegar fyrir marga. Víða í þeim löndum sem náð hafa hvað mestum árangri í aðgerðum sem varða rakaskemmdir t.d. í Þýskalandi eru notuð sérhæfð loftefnahreinsitæki til að bæta loftgæði tímabundið í skólastofum og öðrum rýmum sem eru loftmenguð. Þessi tækni hefur ekki verið mikið notuð hér nema í kannski einum skóla og gafst það vel. Flokkur fólksins lagði til að umhverfisyfirvöld kynntu sér aðferðir í öðrum leiðandi löndum í stað þess að trúa í blindni á aðferðir einstakra verkfræðistofa hér á landi.

 

 

Tillagan í heild

Tillaga Flokks fólksins að umhverfis- og skipulagsráð Reykjavíkurborgar kynni sér starfshætti frá fleiri þjóðum í aðgerðum sem varða myglu- og rakaskemmdir.

Tillaga Flokks fólksins að umhverfis- og skipulagsráð/svið Reykjavíkurborgar kynni sér starfshætti frá fleiri þjóðum  t.d. Þjóðverjum og Dönum sem hafa náð góðum árangri í aðgerðum sem varða rakaskemmdir í opinberu húsnæði. Loftgæðamál  vegna rakaskemmda og annarra ástæðna er stórt vandamál í sumum skólum og vinnustöðum Reykjavíkurborgar og fer stækkandi. Afleiðingar hafa verið skelfilegar fyrir marga. Víða í þeim löndum sem náð hafa hvað mestum árangri í aðgerðum sem varða rakaskemmdir t.d. í Þýskalandi eru notuð  sérhæfð loftefnahreinsitæki  til að bæta loftgæði tímabundið í skólastofum og öðrum rýmum sem eru loftmenguð og þegar verið er að vinna í menguðum rýmum við hlið rýma sem eru í notkun, til þess að bæta líðan nemenda og starfsfólks og gefa sérfræðingum meira svigrúm til að meta skemmdir og grípa til aðgerða. Þá eru menguðu rýmin innsigluð og aðskilin frá öðrum rýmum og loftefnahreinsitækin notuð til aðstoðar. Fulltrúi Flokks fólksins leggur til að Reykjavíkurborg skoði þessar aðferðir með opnum hug. Eftir því sem fulltrúi Flokks fólksins hefur kynnt sér þá var þessi leið farin í einum af skólum borgarinnar og tókst vel til. Loftefnahreinsitækin virkuðu og ættu því að virka samhliða viðgerðum í öðrum skólum Reykjavíkurborgar til að bæta líðan  og minnka kostnað.

Greinargerð

Loftgæðavandinn í skólum og öðrum byggingum í eigu borgarinnar er ekki nýr. Vandinn er mikið tilkominn vegna áralangs vanrækslu borgaryfirvalda að viðhalda húsakosti skóla og fleiri bygginga borgarinnar. Afleiðingar hafa verið slæmar fyrir fjölda nemenda og starfsfólks. Nemendur hafa mátt dúsa of margir í litl­um loft­gæðum og jafnvel þótt skólastjórnendur hafi ítrekað kvartað hefur verið brugðist seint og illa við í mörgum tilfellum. Nemendur og starfs­fólk hafa kvartað yfir slapp­leika, höfuðverk, auknu mígreni og ann­arri van­líðan vegna ástands­ins í sumum skólum. Spurning er hvort bestu aðferðum hefur verið beitt í glímunni við raka og myglu. Fulltrúi Flokks fólksins leggur til hér  að fulltrúar Fasteignasvið Reykjavíkurborgar kynni sér starfshætti frá fleiri þjóðum  t.d. Þjóðverjum  sem hafa náð góðum árangri í aðgerðum sem varða rakaskemmdir í opinberu húsnæði.
Hér er um að ræða aðferðir sem skilað hafa góðum árangri í öðrum löndum eins og Danmörku og Þýskalandi. Einnig hafa þessar aðferðir verið notaðar hér á landi í öðrum sveitarfélögum og á vegum Ríkiseigna eftir því sem borgarfulltrúi Flokks fólksins kemst næst. Ekki þarf að rýma heilu byggingarnar, heldur er hægt að einangra ákveðin skemmd svæði og halda starfsemi áfram með sem minnstu raski. Þessar aðferðir bæta líðan nemenda og starfsfólks fyrir og á framkvæmdatíma og getur minnkað kostnað.

Auðvitað koma loftefnahreinsitæki aldrei í staðinn fyrir viðgerðir, en virka vel sem aðstoð á framkvæmdatíma og einnig fyrir mjög næma einstaklinga þó loftgæði teljist almennt í lagi. Sérfræðingar Fasteignasviðs Reykjavíkurborgar verða að kynna sér aðferðir í öðrum leiðandi löndum og ekki trúa í blindni á aðferðir einstakra verkfræðistofa hér á landi. Fulltrúi Flokks fólksins óskar eftir að borgaryfirvöld skoði þetta með opnum hug. Hér eru á ferðinni aðferðir sem skila árangri og kosta minna.

Er ellikerling mætt?

Flokkur fólksins berst fyrir bættum kjörum og aðstæðum eldri borgara og öryrkja bæði á Alþingi og í Reykjavíkurborg. Það fréttist á dögunum að matarsending til eldri konu hefði verið skilin eftir á hurðarhúni hennar og sú skýring gefin að hún hefði ekki heyrt í bjöllunni. Þetta er óásættanlegt. Ég ákvað því sem fulltrúi Flokks fólksins í Reykjavík að rýna í hvernig þjónustu velferðarsviðs við eldri borgara í heimahúsum væri háttað. Í þeirri vinnu sem ég vann með þjónustuþegum og aðstandendum kom ýmislegt í ljós sem betur mætti fara. Afraksturinn voru 14 tillögur sem lagðar voru fram í velferðarráði 19.8. Allar nemar fjórar voru felldar eða vísað frá.

Öll eigum við eftir að eldast en á meðan ellikerling er ekki farin að hrjá þá sem komnir eru af besta skeiði þá er fátítt að hún valdi manni hugarangri. Við megum hins vegar ekki gleyma þeim sem báru okkur á höndum sér, sem núna vilja njóta ævikvöldsins áhyggjulaus. Einn góðan veðurdag verðum við í þessum sömu sporum.

 

Til þess að heimadvöl sé raunverulegur kostur fyrir eldri borgara þarf ýmislegt fleira að koma til í þjónustuþáttum velferðarsviðs og auðvitað ríkisins þar sem það á við. Mannlegi þátturinn má aldrei gleymast þegar verið er skipuleggja þjónustu. Velferðaryfirvöld ættu ávallt að hafa fullt samráð við þjónustuþega og hugsa hvert skref út frá þörfum hans.

 

Að búa heima með reisn

Þær tillögur sem Flokkur fólksins lagði á borð velferðarráðs í gær lutu m.a. að breyttum verklagsreglum hvað varðar heimsendingar á mat og hlutverk sendils, framleiðslu matar og næringargildi hans. Einnig var lagt til að matarsendingar til eldri borgara sem mælast undir framfærsluviðmiði velferðarráðuneytisins verði gjaldfrjálsar. Jafnframt að auka þurfi þjónustu sjúkraþjálfunar og heimahjúkrunar.

Flokkur fólksins lagði einnig fram tillögur um ýmsar þjónustunýjungar þ.m.t. útvíkkun á þjónustu heimilisþrifa sem tekur til þvottar, skipta á rúmi, flokkun sorps og sorphirðu. Í tillögupakkanum er einnig lagt til að stöðumat á færni verði tíðar og að dregið verði úr ábyrgð ættingja. Ekki allir eldri borgarar í heimahúsi eiga ættingja sem getur sinnt þessum þáttum. Þá ætti að bjóða eldri borgurum sem búa heima aðstoð með hár og neglur.

 

Hádegismatur á hurðarhúni

Breyta þarf verklagsreglum og framkvæmdaferli Vitatorgs varðandi matarsendingar til eldri borgara í heimahúsi. Senda ætti matinn út sama dag og hann er eldaður og breyta þarf umbúðum til að auðvelda þjónustuþegum að opna þær. Auðvitað á ekki að skilja hádegismatinn eftir á hurðarhúni nema móttakandi hafi gefið sérstök fyrirmæli um það.

Gera ætti ráð fyrir að móttakandi matarskammta ætli sér að taka sjálfur við matnum sínum nema annars konar fyrirmæli liggja fyrir um afhendingu. Ef móttakandi opnar ekki til að taka við matnum sínum er góð regla að hringja í viðkomandi. Ef síma er ekki heldur svarað er hægt að hringja í tengilið (ættingja) sem tekur ákvörðun um framhaldið. Ef ekki er skráður ættingi getur verið ástæða til að upplýsa viðkomandi þjónustumiðstöð.

 

Heima er best

Þeir eldri borgarar sem búa í eigin íbúðum mæta annars konar hindrunum en þeir sem búa í þjónustuíbúð. Þeir ættu að eiga þess kost að sækja um niðurgreiðslu á þeim þáttum sem eru að jafnaði innifaldir í íbúð í þjónustukjarna. Til dæmis má nefna afslátt af fasteignagjöldum og rafmagni. Einnig væri sanngjarnt að velferðaryfirvöld tækju þátt í húsgjaldi og niðurgreiddu þjónustu sem snýr að garðhirðu, flokkun á sorpi og sorphirðu. Sumir eldri borgarar treysta sér einfaldlega ekki út úr húsi og allra síst ef hálka er og ófærð.

 

Að lokum

Það er að mörgu að hyggja þegar hugsað er um okkar elstu einstaklinga. Öll munum við örugglega eftir dæminu um eldri borgara sem kom heim eftir legu á sjúkrahúsi og hreinlega gleymdist. Hann átti aðeins malt og lýsi í ísskápnum. Með framlagningu þessara tillagna var það von fulltrúa Flokks fólksins að þær fengju flestar framgang svo skoða mætti innihald þeirra frekar. Allar tillögurna voru unnar með eldri borgara og aðtandendum. Afgreiðsla þeirra fór hins vegar þannig að allar nema fjórum var ýmist vísað frá eða þær felldar.

 

 

Er rafbíll ekki vistvænn ferðamáti?

Það er verið að ræða hverfisskipulag Breiðholts á Morgunvaktinni á RÚV. Nú hefst viðvera á morgun í Gerðubergi og í næstu viku í Mjódd til að ræða þetta skipulag.

Áhersla er lögð á að gera vistvænum ferðamátum hátt undir höfði við borgargötur og að aðgengi allra sé tryggt, óháð hreyfigetu segir í nýju hverfisskipulagi Breiðholts.

Helstu samgöngutengingar ásamt hjólreiðarstígakerfi og gönguleiðir á að festa í sessi.

En hvergi í þessu skipulagi er minnst á raf- eða metanbílinn þegar talað er um vistvænar samgöngur í hverfisskipulagi Breiðholts.

En er ekki rafbíll vistvænn ferðamáti?

Flokkur fólksins lagði fram tillögu í síðustu viku um að skipulagsyfirvöld borgarinnar setji rafmagns- og metan bíla á lista yfir það sem þau kalla vistvænan ferðamáta. Nú eru aðeins 10 ár þangað til að bannað verður að flytja inn bensín- og dísilbíla.
Ég og við í Flokki fólksins vinnum fyrir eldri borgara og öryrkja.

Eldri borgarar og hreyfihamlaðir nota frekar bíl en hjól til að ferðast um. Samhliða þessum hugmyndum verður að fara að taka raf- og metanbíla inn í flokk vistvænna ferðarmáta.

Í Reykjavík vil ég hvíla

Það styttist í að jarða þurfi Reykvíkinga í Kópavogi.

Ég er borin og barnfæddur Reykvíkingur og þegar ég er öll vil ég vera jarðsett í Reykjavík og hvergi annars staðar. Eftir að hafa hlustað á viðtal við forstjóra Kirkjugarða Reykjavíkurprófastdæma í þættinum Morgunvaktinni í vikunni varð ég hugsi. Þar kom fram að lengi hefur verið ljóst að grafarsvæði í Reykjavík munu brátt klárast og ekki verði til skiki til að jarða í Reykjavík. Leita verður á náðir Kópavogsbæjar til að fá pláss þegar tilvistin á þessari jörðu lýkur.

Ástæðan er sú að borgar- og skipulagsyfirvöld hafa dregið lappirnar í að fullklára nýjan kirkjugarð við Úlfarsfell. Útsvarsfé borgarbúa hefur farið í aðrar framkvæmdir en að byggja nýjan kirkjugarð. Í máli forstjórans kom fram að lengi hafi verið uppi áform um að byggja nýjan kirkjugarð við Úlfarsfell en að brösuglega hafi gengið að fá Reykjavíkurborg til að setja verkefnið í forgang.

Það er bagalegt að borgin skuli hunsa þetta tímabæra verkefni þegar ljóst er hve skammur tími er til stefnu þar til grafarsvæði í borginni klárast. Einnig kom fram í viðtalinu að mikið vanti af fjármunum til að viðhalda eldri kirkjugörðum og þá sérstaklega Hólavallakirkjugarði. Eftir hrun hafi verið skorið hressilega niður hjá kirkjugarðsumdæmunum og aldrei hafi sá niðurskurður gengið til baka þrátt fyrir góðærisárin undanfarið. Hætta er á að Hólavallakirkjugarður fari að drabbast niður og eldri leiði að skemmast ef ekki verði gripið inn í.

 

Til að vekja athygli á þessu og ýta við borgar- og skipulagsyfirvöldum lagði Flokkur fólksins fram tillögu á fundi skipulags- og samgönguráðs Reykjavíkur í vikunni sem hljóðar svo:

 

Í Reykjavík hafa borgar- og skipulagsyfirvöld sýnt getuleysi þegar kemur að þessum málaflokki. Það líður að því að plássin fyrir kistur í Gufuneskirkjugarði klárist en reiknað er með plássi fyrir kistur í mesta lagi 3-4 ár í viðbót og þá þarf að fara að jarða Reykvíkinga í kirkjugarðinum í Kópavogi.

 

Kirkjugarðurinn við Úlfarsfell hefur lengi verið í undirbúningi. Skipulagsyfirvöld hafa dregið það árum saman að hefja framkvæmdir. Ítrekað hefur skipulagsyfirvöldum verið gert ljóst að brýn þörf er á nýjum grafarsvæðum og að hraða þurfi framkvæmdum á kirkjugarðinum við Úlfarsfell en skipulagsyfirvöld hafa látið málið sem vind um eyru þjóta. Það er miður að borgaryfirvöld sjái ekki nauðsyn þess að fullklára kirkjugarð þar sem Reykvíkingar sem óska þess að vera jarðaðir í kistu fái að hvíla.

 

Fulltrúi Flokks fólksins leggur auk þess til að gert verði átak í Hólavallagarði en honum þarf að halda betur við en gert hefur verið. Aðeins hluti garðsins hefur verið tekinn í gegn en annar hluti hans er að grotna niður. Skipulagsyfirvöld borgarinnar hafa til margra ára ekki sýnt Hólavallagarði nægjanlega virðingu og ekki úthlutað til hans nauðsynlegum fjármunum til að halda honum við.

 

Ég vona innilega að tillaga þessi verði hvatning fyrir skipulagsyfirvöld Reykjavíkur að bretta upp ermarnar og setja framkvæmdir á kirkjugarðinum við Úlfarsfell í forgang.

 

Kolbrún Baldursdóttir, borgarfulltrúi Flokks fólksins

Grein birt á visi.is 14.8.  

Skipulagsyfirvöld telja það ekki þeirra að efla göngugötuna í Mjódd

Tillaga Flokks fólksins um að efla göngugötuna í Mjódd var felld á fundi skipulagsráðs í morgun. Hér má sjá tillöguna og bókun meirihlutans og bókun Flokks fólksins.

BORGARRÁÐ 23. júlí 2020: Tillaga áheyrnarfulltrúa Flokks fólksins um eflingu starfsemi í Mjódd.

Flokkur fólksins leggur til að skipulagsyfirvöld leggi sitt að mörkum til að efla starfsemi í Mjódd. Úr göngugötunni í Mjódd er aðkoma í fjölmargar verslanir og þangað koma margir. Gera mætti fjölmargt fyrir götuna til að gera hana meira aðlaðandi. Stundum er þar götumarkaður en fjölmargt annað mætti koma til sem laðaði að aldna sem unga. Yfirbyggð gata eins og göngugatan í Mjódd og það útisvæði sem er þar í kring s.s. litlu torgin við innganga til norðurs og suðurs bíður upp á ótal tækifæri. Þar mætti sem dæmi spila tónlist, söng, dans og annað sem gleðja myndu gesti og gangandi. Þá er einnig ónotuð lóð við Álfabakka 18. Ekki er séð að nein sérstök stefna ríki um Svæðið í Mjódd. Vel mætti vinna markvisst að því að gera þetta svæði að helsta kjarna Breiðholtsins. Með því að glæða götuna lífi mun það auka aðsóknina og breikka hóp viðskiptavina. Takist vel til myndu fleiri fyrirtæki og verslanir vilja vera á svæðinu sem er sérstaklega vel staðsett því aðkoma er góð úr mörgum áttum. Gera ætti göngugötuna í Mjódd að afþreyingarmiðaðri göngugötu og er þá átt við göngugötu sem fólk sækir í ýmist til að versla, fá sér kaffi og/eða upplifa viðburði.

Tillögunni fylgir greinargerð.

Fellt með fjórum greiddum atkvæðum, fulltrúa Samfylkingarinnar, Viðreisnar og Pírata. Fulltrúa Sjálfstæðisflokksins sitja hjá.

Fulltrúar Samfylkingarinnar, Viðreisnar og Pírata leggja fram svohljóðandi bókun:

Reykjavíkurborg heldur ekki viðburði í verslunarkjörnum í einkaeigu en meirihlutinn hefur á þessu kjörtímabili lagt vinnu við að fegra ásýnd svæðis í kringum Mjóddina og er sú vinnan enn þá yfirstandandi. Vinna við Borgalínu mun fara í gang þegar annar áfangi fer í vinnu og þá gefst tækifæri til að skipuleggja svæðið í heild sinni. Tillagan er því felld.

Áheyrnarfulltrú Flokks fólksins leggur fram svohljóðandi bókun:

Tillaga áheyrnarfulltrúa Flokks fólksins um eflingu starfsemi í Mjódd hefur verið felld af skipulagsyfirvöldum. Það er mat fulltrúa Flokks fólksins þegar bókun meirihlutans er skoðuð að skipulagsyfirvöld hafi ekki mikinn áhuga á öðrum göngugötum en þeim sem tilheyra miðbænum. Á göngugötum í miðbænum halda borgaryfirvöld oft viðburði. Á þeim götum eru verslanir líka í einkaeigu fjölmargra. Reykjavíkurborg hefur reyndar haldið viðburð í göngugötunni í Mjódd svo fyrir því er fordæmi, því miður eru þeir allt of fáir. Borgin á eignir í Mjóddinni og ber ákveðna ábyrgð ásamt fleirum á bílastæðunum, aðgengi og öryggi þar. Hvernig á að túlka þetta öðruvísi en skipulagsyfirvöld hafi minni áhuga á úthverfum en miðbænum? Vinna við borgarlínu þarf ekki að koma í veg fyrir að lífga megi upp göngugötunni í Mjódd. Eitt útilokar ekki annað í þessum efnum. Fulltrúi Flokks fólksins fagnar endurgerð torga. Ef lífgað yrði upp á göngugötuna myndu fleiri ganga um torgin.

 

 

Dýrkeypt bið

Það styttist í skólabyrjun. Stundum er eins og stjórnvöld geri sér ekki grein fyrir hversu dýrkeypt það getur verið fyrir börn að bíða lengi eftir þjónustu fagaðila s.s. skólasálfræðinga. Í febrúar voru 674 börn á biðlista eftir fyrstu og frekari þjónustu, af þeim biðu 429 börn eftir fyrstu þjónustu. Ákall foreldra og skóla má sjá í fjölmörgum greiningum sem gerðar hafa verið á þörfum skólasamfélagsins. Kallað er eftir auknum stuðningi við bæði nemendur og starfsfólk og markvissari og aukinni þverfaglegri samvinnu. Skólastjórnendur hafa kallað eftir að fá fagfólk skólaþjónustunnar meira inn í skólana til að létta álagi á kennara. Það hlýtur að vera flestum ljóst að skólasálfræðingum þarf að fjölga til að möguleiki verði á að taka á áralöngum kúfi og nýjum kúfi sem spáð hefur verið að komi í haust vegna áhrifa og afleiðinga COVID-19.

Dýkeyptar afleiðingar biðar

Börn sem fá ekki aðstoð með vandamál sín þróa oft með sér djúpan sálrænan vanda sem vex og getur allt eins orðið óviðráðanlegur. Sagt er að málum sé forgangsraðað og að þau mál sem ekki þoli bið séu tekin framar á biðlistann. En þola einhver mál bið? Hér er verið að tala um börn en ekki fullorðna. Þau mál sem fá forgang eru oft komin á alvarlegt stig. Börn sem eru jafnvel farin að skaða sjálfa sig og eru jafnvel með sjálfsvígshugsanir. Vandi af því tagi skellur ekki á á einum degi heldur er hann jafnvel búinn að krauma mánuðum saman. Börn sem hafa ekki fengið faglega greiningu á vanda sínum líða kannski sálarkvalir alla skólagönguna. Þetta eru oft börnin sem láta lítið fyrir sér fara í skólanum, eru e.t.v. með athyglisbrest, eru feimin og óörugg. Smám saman laskast sjálfsmatið og sjálfsöryggið hverfur. Þetta eru stundum börnin sem lögð hafa verið í einelti sem ýmist hefur farið dult eða ekki náðst að taka á. Hvað er að gerast í huga barns sem beðið hefur mánuðum saman eftir aðstoð til að létta á vanlíðan og leysa vanda þess? Vanlíðan sem fær að krauma og grafa um sig getur á einni svipstundu orðið bráðavandi sem ekki hefði orðið ef fullnægjandi hjálp hefði verið veitt fyrr. Margra mánaða bið eftir aðstoð getur reynst dýrkeypt og jafnvel kostað líf.

Oft eru íslensk börn borin saman við börn í nágrannalöndum. Þar eru ekki svona margar greiningar segja yfirvöld. En munurinn er sá að í þeim löndum sýna kannanir einnig að börnum líður mun betur en á Íslandi. Skóla- og velferðaryfirvöld bera íslensk börn gjarnan saman við börn nágrannalanda okkar þegar hentar t.d. þegar þarf að rökstyðja að ekki þurfi að láta meira fé í málaflokkinn. Miklu fé er vissulega varið í sérkennslu en hún er hvorki samræmd milli skóla né árangursmæld. Vanlíðan barna á Íslandi og þróun í þeim efnum má sjá m.a. í niðurstöðum PISA, skýrslum landlæknisembættisins og fleiri rannsóknum. 

Tilvísunum hefur fjölgað

Af einhverjum orsökum hefur fjölgun beiðna eftir þjónustu fagfólks skólaþjónustu aukist um 23% á milli ára. Þetta er áhyggjuefni og er það á ábyrgð skóla- og velferðaryfirvalda Reykjavíkurborgar að komast að hverju þetta sætir. Þessari fjölgun þarf að mæta með öðru en að láta börn dúsa á biðlista.

 

Flokkur fólksins hefur lagt fram tillögur til lausna sem ýmist hefur verið vísað frá eða felldar. Nýlega lagði Flokkur fólksins fram tillögu um að leitað verði eftir formlegu samstarfi við Þroska- og hegðunarstöð (ÞHS) í þeim tilgangi að stytta biðlista. Um væri að ræða mál þar sem t.d. aðkoma barnalæknis er nauðsynleg. Af þessu er nú þegar kominn vísir en mikilvægt er að formgera samstarfið til að gera það gegnsætt og skilvirkara. Með samstarfinu er börnum hlíft við lengri bið á biðlista eftir sérfræðiþjónustu. Þessari tillögu var vísað í vinnuhóp.

 

Tillögur sem Flokkur fólksins hefur lagt fram og hafa verið felldar eða vísað frá eru:

1. Að fjölga stöðugildum sálfræðinga 
2. Að færa aðsetur skólasálfræðinga frá þjónustumiðstöðvum inn í skólana 
3. Að börn skulu ávallt hafa biðlistalaust aðgengi að fagfólki skólaþjónustu 
4. Að skólasálfræðingar heyri undir skóla- og frístundarráð í stað velferðarráðs 

Einnig hafa verið lagðar fram fyrirspurnir, m.a. um samsetningu biðlista, ástæður tilvísunar og hvað sé verið að gera fyrir börnin og foreldrana á meðan á biðinni stendur.

 

Til að uppræta biðlista eða stytta þá þarf að fjölga stöðugildum sálfræðinga. Málum hefur fjölgað en ekki stöðugildum sálfræðinga. Ef horft er til fjölda stöðugilda má gróflega áætla að hver sálfræðingur/stöðugildi þjónustar 1000 börn. Í raun má því segja að það sé útilokað fyrir sálfræðing að sinna þessum fjölda barna svo vel sé, jafnvel þótt megnið af þessum börnum þurfi aldrei á þjónustu sálfræðinga að halda. Dæmi eru um að einn sálfræðingur sinni þremur skólum. Fyrir þann sálfræðing fer einnig tími í að fara á milli skóla og þjónustumiðstöðvar sem hann hefur aðsetur á. Þessi staða og skortur á úrræðum og almennum bjargráðum hafa ekki síður alvarlegar afleiðingar fyrir tvítyngd börn í leik- og grunnskólum.

Grein birt í Morgunblaðinu 8.8. 2020

Að miða niðurgreiðslu við fæðingardag er ósanngjarnt

Ég lagði fram tillögu í borgarráði 14. maí að niðurgreiðsla vegna dagforeldra miðist við afmælismánuð barns en ekki afmælisdag. Ekkert hefur spurst af henni. Ég bað fjármálastjóra að taka saman fyrir mig hver yrði kostnaðurinn við þessa breytingu. Hann vísaði fyrirspurninni til skóla- og frístundaráðs en þaðan hefur heldur ekki heyrst múkk.

 

Þetta skiptir heilmiklu máli ef barn er fætt seint í mánuðinum.

 

Hér er tillagan:

Lögð fram svohljóðandi tillaga áheyrnarfulltrúa Flokks fólksins að niðurgreiðsla vegna dagforeldra miðist við afmælismánuð barns en ekki afmælisdag

Fulltrúi Flokks fólksins leggur til að niðurgreiðsla vegna dagforeldra miðist við afmælismánuð barns en ekki afmælisdag. Það e.a.s. að niðurgreiðslan miðist við mánuðinn sem barn er níu mánaða, (sex mánaða hjá einstæðu foreldri), en ekki afmælisdag barnsins.

 

Fordæmi eru fyrir þessu í öðrum sveitarfélögum í nágrenni Reykjavíkur sem miða niðurgreiðslu vegna dagforeldris við fæðingarmánuð barns en ekki fæðingardag. Að miða niðurgreiðslu við fæðingardag er ósanngjarnt. Foreldrar þeirra barna sem fædd eru seint og jafnvel síðustu daga mánaðar sitja ekki við sama borð og foreldrar barna sem eru fædd fyrr í mánuðinum. Samkvæmt þessari tillögu skulu framlög hefjast í þeim mánuði sem barn er 9 mánaða en ekki skal miða við afmælisdag barns. Ástæða er sú að ef barn er fætt seint í mánuðinum fá foreldrar enga niðurgreiðslu á þeim mánuði. Um þetta munar hjá langflestum foreldrum. R20050146

 

Vísað til meðferðar skóla- og frístundaráðs.

Það er sko líka göngugata í Mjódd

Það er sko líka göngugata í Mjódd! Segi nú þetta til að minna skipulagsyfirvöld á ef það skyldi hafa farið fram hjá þeim í öllum þessum hamagangi þeirra að gera varanlegar göngugötur í miðbænum. Það var gert án viðunandi samráðs við kaupmenn sem starfað hafa við Laugaveginn í áratugi með þeim afleiðingum að verslun þar hefur skaðast.

Stundum finnst mér sem fátt hafi komist að hjá skipulagsyfirvölum á þessu kjörtímabili annað en göngugötur í miðbænum eins og þar komi til með að vera nafli alheimsins.

Það lítur út sem það hafi verið einhvers konar lífsspursmál fyrir þeim að loka götum í miðbænum varanlega og gera þær að göngugötum. Nú hefur verið miklu fé í að skreyta þær, mála glaðlegum litum, kaupa í þær stóla og borð og sjá til þess að um leið og sólin skín eru viðburðir á hverju horni. 

En það er alla vega ein göngugata í borginni sem fengið hefur mun minni athygli hjá skipulagsyfirvöldum ef þá nokkra og það er göngugatan í Mjódd.

Kannski skipulagsyfirvöld geti nú gefið sér tíma til að snúa sér að henni, mála hana með glaðlegum litum og blása í svæðið lífi?

Í Fréttablaðinu í dag er grein um Mjóddina. Meira líf í Mjódd, en Flokkur fólksins hefur lagt fram í borginni þrjár tillögur sem lúta að endurgerð og betrumbótum á göngugötunni í Mjódd og á umhverfi Mjóddar. 

 

 

Bíll að láni

Í viðtali á Útvarpi Sögu í vikunni ræddi ég heilmikið um lífið og tilveruna í borgarstjórn. Auðvitað hef ég, sem sálfræðingur, oft verið að reyna að greina samskiptin milli meiri- og minnihlutans. Allir vita að þau hafa stundum verið skrautleg en færri vita kannski að einnig eru dæmi um ágæt samskipti.

Eftir auglýsingahlé leiddi Magnús Þór Hafsteinsson sem stýrði þættinum talið í umræðuna um borgarlínu og samgöngur í borginni. Í þættinum á undan var nefnilega formaður skipulags- og samgönguráðs í viðtali. Spyrillinn hafði spurt hana hvernig hún hafði komið á staðinn og svaraði hún því til að hún hafi þurft að fá lánaðan bíl til að aka börnum sínum í pössun til að hún kæmist í viðtalið. Þau hjónin hafa ákveðið að komast af án bíls og hjóla allar sínar ferðir. En svo koma stundir sem ekki er hægt að hjóla og þá þarf að fá lánaðan bíl.

Ég get vel skilið að það geti verið snúið að eiga ekki bíl ekki síst þegar börn eru á heimilinu sem stundum þarf af hinum ýmsu ástæðum að skutla hingað og þangað. Ég vorkenni formanni skipulagsráðs að eiga ekki bíl og býðst til að lána henni minn þegar svona aðstæður koma upp.  

En aftur að umræðunni um borgarlínu. Í þessum sama þætti sagði formaðurinn að með tilkomu borgarlínu væri verið að auka val.
Vissulega er hér um nýjan valkost að ræða svo fremi sem ekki annar valkostur verði á sama tíma tekinn af. 

Í öllu þessu kappi skipulagsyfirvalda að fækka þeim stöðum þar sem koma má á bíl upplifa ekki allir að verið sé að auka val. Mörgum finnst sem nú þegar sé farið að handstýra fólki, jafnvel með afli, í að losa sig við bíla sína og nota einungis borgarlínu og almenningsvagna og gildir þá einu hvort það henti lífsstíl fólks. Samt er borgarlína aðeins framtíðarsýn og er aðeins til sem líkan enn sem komið er.

Staðreyndin er sú að búið er að loka stóru svæði fyrir bílaumferð og fækka verulega götustæðum. Gjaldið hefur verið hækkað og það svæði sem er dýrast að leggja á hefur verið stækkað. Einnig er farið að krefjast stæðisgjalds á sunnudögum. Allt eru þetta skilaboð um að "ekki koma hingað á bíl".

Formaður samgöngu- og skipulagsráðs segir þetta gert í góðu samráði við borgarbúa og með þarfir þeirra, t.d. öryrkja og hreyfihamlaðra að leiðarljósi. Við þetta er hins vegar ekki kannast nema síður sé. Hvernig kemur borgarlína til með að henta hreyfihömluðu fólki þegar ekki enn er vitað hvernig fólk á að komast frá heimilum sínum á kjarnastöð borgarlínu. Hreyfihamlaðir hljóta að koma akandi á kjarnastöð? Geta þeir geymt bíla sína þar? Þegar á áfangastað er komið, hvernig kemst hinn hreyfihamlaði frá borgarlínustöðinni og til áfangastaðar? Í strætó?  
Ég er að reyna að sjá þetta fyrir mér. Spyrja má hvort skipulagsyfirvöld hafi útfært þessar tengingar með hagsmunasamtökum hreyfihamlaðra? 

Formaðurinn sagði einnig að borgarlína myndi gagnast fátæku fólki því ódýrara er að ferðast með borgarlínu en að reka bíl. Eitthvað kann að vera rétt í þessu en samt er málið flóknara en þetta. Foreldrar sem þurfa að fara með börn í leik- og grunnskóla og tómstundir í borgarlínu og koma sér svo sjálfir í vinnu getur orðið snúið. Tími er líka peningar. 

En alla vega, það er ekki hikað við að draga inn í umræðuna viðkvæmustu hópa samfélagsins til að sýna fram á réttmæti aðgerðanna. Borgarlínuverkefnið er komið af stað, búið er að setja í það mikið fjármagn nú þegar. Þetta risaverkefni á eftir að koma verulega við pyngju skattgreiðenda. Það eru nokkur ár í að 1. áfanga verði lokið og kannski 10-15 ár þar til borgarlína hefur tekið á sig einhvers konar lokamynd.

Það er því alveg óþarfi að ráðast svo harkalega að útrýmingu bíla núna. Mikið nær væri að styðja við aðgerðir sem flýta myndu orkuskiptum bíla enda aðeins 10 ár þangað til bannað verður að flytja inn bensín og dísil bíla. Það þarf að setja kraft í orkuskiptin og það er hlutverk skipulagsyfirvalda að koma með hvatana. Setja mætti aftur inn á lista vistvænna bíla tvinnbíla sem dæmi. Svo er það allt metanið, græna afurðin okkar sem er sóað því SORPU hefur ekki tekist að markaðssetja það. Borgaryfirvöld gætu ákveðið að allir strætisvagnar skuli vera metanvagnar. Síðast en ekki síst geta borgaryfirvöld styrkt enn frekar þá sem vilja setja upp hleðslustöðvar.

  

Mótsagnir meirihlutans

Dagur vill flýta Borgarlínu – Verðum að komast úr skotgrafahernaði um ferðamáta

Við þurfum líka að flýta orkuskiptum. Eftir 10 ár verður bannað að flytja inn bensín og dísil bíla. Af hverju leggur borgarmeirihlutinn ekki áherslu á að hvetja til orkuskipta frekar en að hamast við að útrýma einkabílnum?

Í grein eftir Sigurborgu Ósk, formann skipulags- og samgönguráðs í Morgunblaðinu í dag talar hún um útblástursvanda. Í nýjum reglum sem tóku gildi 1.1. 2020 um hverjir eiga rétt á visthæfum skífum eru hvorki metanbílar né tvinnbílar á listanum. Það eru þessar mótsagnir hjá meirihlutanum sem fara hvað mest fyrir brjóstið á mér sem borgarfulltrúa og manneskju.

Borgarbúar eiga fleiri málsvara nú

Það gengur ekki allt illa í borgarstjórn eins og fram kemur í pistli Björn Jóns Bragasonar og fjallað er um á dv.is. Flokkur fólksins samþykkir og styður mál meirihlutans sem falla innan stefnu flokksins og lúta að því að auka og bæta þjónustu við fólkið. Sjálfstæðismenn voru í fyrra, í borgarstjórn með áskorun til Alþingis um endurskoðun fjölda borgarfulltrúa og þá lagði ég fram þessa bókun:

Fjölgun borgarfulltrúa var tímabær og af hinu góða. Ótalmargt hefur breyst til hins betra. Minnihlutinn er fjölbreyttari og fleiri sjónarmið komast að. Eldra fyrirkomulagið var gallað og kostnaðarsamt. Sem dæmi, fólk sem var jafnvel lítt tengt pólitíkinni tók sæti í hinum ýmsu nefndum því borgarfulltrúar gátu ekki annað þeirri vinnu. Núna sjá kjörnir fulltrúar um mestu vinnuna. Það er lýðræðislegra en vissulega óhemju álag fyrir litla flokka. Kosturinn við fjölgunina er að nú eru fleiri mál, fyrirspurnir, tillögur, dýpri og lengri umræða sem er allt af hinu góða. Öflugur minnihluti getur stuðlað að bættum rekstri í borginni, aukins aðhalds og gegnsæi. Borgarbúar eiga fleiri málsvara nú. Fleiri eyru hlusta og meðtaka skilaboð frá borgarbúum. Ef borgarfulltrúar eru fáir falla mörg greidd atkvæði dauð sem kemur verst niður á litlum flokkum. Stórir flokkar nýta atkvæði sín best við þessar aðstæður og því kom þessi tillaga Sjálfstæðismanna ekki á óvart.

Má nefna að sá flokkur hélt oft meirihluta í Reykjavík fyrr á árum með minnihluta atkvæða. Það eru minni líkur á slíku þegar borgarfulltrúar eru 23 en ekki 15. Álit Alþingis er að borgarfulltrúar í Reykjavík eigi að vera 23-31. Lægsti mögulegi borgarfulltrúafjöldi er í Reykjavík eins og er.

Hver á að borga skemmdir á skólabyggingum?

Fram kemur í skýrslu starfshóps um öryggismál í skólum er rætt um rúðubrot í skólum. Tekið er dæmi úr einum skóla en þar voru alls 73 rúður brotnar á 12 mánaða tímabili víðs vegar um húsnæði. Dæmi eru einnig um skóla þar sem engin rúða er brotin. Ef horft er á þennan eina skóla fer mikill kostnaður í að hreinsa upp glerbrot og skipta um gler í gluggum skólans.

Kostnaður fyrir árið í þessum skóla var 12.023.000 m.kr. Hér er aðeins um einn skóla að ræða í borginni en Reykjavíkurborg rekur 36 grunnskóla. Í sumum skólum líður árið án þess að framin séu skemmdarverk af þessu tagi. 

Í engum tilfellum þar sem vitað erum gerandann greiða foreldrar kostnað vegna skemmda. En þannig er það víst að ef barnið er í skólanum á skólatíma þá er það á ábyrgð skólans. Ef það er utan skólatíma geta foreldrar verið skaðabótaskyldir gagnvart skólanum.

Hvað varðar öryggismyndavélar tek ég undir mikilvægi þeirra í mörgu tilliti. Öryggismyndavélar eru dýrar og viðhaldskostnaður án efa mikill. Vega þarf og meta ávinninginn, hvar öryggismyndavélar koma að mesta gagni og í hvaða skólum uppsetning þeirra er sérstaklega mikilvæg t.d. hvað varðar fælingarmátt sem öryggismyndavélar sannarlega hafa.

Á mbl. segir:

Veru­leg­ur kostnaður er af skemmd­ar­verk­um af ýmsu tagi á bygg­ing­um skóla- og frí­stunda­sviðs Reykja­vík­ur­borg­ar að því er fram kem­ur í skýrslu starfs­hóps um ör­ygg­is­mál í skóla- og frí­stund­a­starfi. Nem­ur kostnaður við viðgerðir á brotn­um rúðum í skól­um um 50 millj­ón­um króna á ár­un­um 2016-2019. Í þeim þrem­ur skól­um þar sem kostnaður er hæst­ur er ekki ör­ygg­is­mynda­véla­kerfi. Kostnaður vegna rúðubrota reynd­ist 5,2 millj­ón­ir í ein­um skóla á um­ræddu tímabili

 

Flokkur fólksins lætur sig hagsmuni dýra og dýraeigenda varða

Baráttan mín í borginni gegn hundaeftirlitsgjaldinu heldur áfram. Í gær lagði ég fram enn eina tillöguna, að þessu sinni að afnema skuli hundaeftirlitsgjaldið, eða "hundaskattinn" eins og sumir kalla gjaldið.
En hér er tillagan sjálf og bókanir í málinu.

 

Tillaga Flokks fólksins að afnema hundaeftirlitsgjaldið sem innheimt er af hundaeigendum borgarinnar.

Flokkur fólksins hefur áður verið með allmargar fyrirspurnir og tillögur um umrætt gjald sem er að engu leiti notað í þágu hunda og eigenda þeirra. Innheimta hundaeftirlitsgjalds er ósanngjörn innheimta, fétaka og ekki er alveg ljóst í hvað það er notað þar sem umfang verkefna borgarinnar er varða hunda hefur minnkað svo um munar.

Bæði tölur frá borginni og frá félögum hundaeigenda sýna mikla fækkun verkefna. Sem dæmi voru fjöldi hunda í hundageymslum árið 2010, 89 og 209 í lausagöngu en árið 2016 voru 11 í geymslu og 62 í lausagöngu. Í fyrra, 2019, voru þessar tölur enn lægri.

Í fjárhagsáætlun Reykjavíkurborgar fyrir árin 2021-2025 kom fram að lækkun verður almennt á eftirlitsgjaldi vegna minna eftirlits í fyrirtæki sem veita þjónustu. Þar er ekki minnst á hundaeftirlitsgjaldið. Nú er yfirvöldum í borginni ekki lengur stætt á þessu gjaldi. Engin sanngirni er í því að halda áfram að innheimta gjaldið lengur þar sem ekki er sama þörf fyrir þjónustuna og verkefnin sárafá.

Greinargerð

Eftir því sem best er vitað er starfandi stýrihópur sem endurskoðar reglur um dýrahald. Ekkert bólar á vinnu frá þeim hópi þrátt fyrir að nú sé borgarstjórn komin í sumarfrí. Ítrekað hefur komið fram hin megna óánægja sem ríkir með árlegt hundaeftirlitsgjald. Flokkur fólksins hefur margoft spurt um í hvað þessi gjöld fara nákvæmlega. Svörin eru ekki fullnægjandi og manni finnst sem gæti varna í umsögnum og viðbrögðum Heilbrigðiseftirlitsins. Greiðendur hundaeftirlitsgjalds telja margir að dæmið gangi ekki upp sama hvaða reikningskúnstir eru notaðar. Sífellt er vísað á heimasíðu en þar er ekkert sem fær dæmið til að ganga upp. Hundaeigendur greiða um 35 milljónir á ári í hundaleyfisgjöld en samt er það staðfest af Heilbrigðiseftirlitinu að verkefnum eftirlitsins hefur fækkað til muna og umfang starfs hundaeftirlistmanna þar með. Flokkur fólksins hefur óskað eftir að fá upp á borð vinnuskýrslur til að sjá verkefni og umfang verkefna þeirra en því hefur verið hafnað. Svo virðist sem þöggun ríki um þessi mál. Ef litið er nánar á tölur frá Heilbrigðiseftirliti Reykjavíkur sést að kvörtunum vegna hunda hefur fækkað. Árið 2000 voru kvartanir um 1300. Árið 2012 voru kvartanir milli 600 og 700, árið 2018 um 80 og árið 2019 um 84. Eins og segir í tillögunni hefur fjölda lausagönguhunda og hunda í hundageymslum stórfækkað og eru nú örfá tilfelli skráð.

Tillagan er felld.

Borgarráðsfulltrúar Sjálfstæðisflokksins sitja hjá við afgreiðslu málsins.

 

Áheyrnarfulltrúi Flokks fólksins leggur fram svohljóðandi bókun:

 

Tillaga Flokks fólksins að afnema hundaeftirlitsgjaldið sem innheimt er af hundaeigendum borgarinnar hefur verið felld á sama fundi og hún er lögð fram. Það á greinilega að halda áfram að innheimta sérstakt hundaeftirlitsgjald af hundaeigendum, gjald sem engan vegin er ljóst í hvað verið er að nota. Það er alla vega ekki verið að nota það í þágu hunda svo mikið er víst, hvað þá hundaeigenda. Ákveðið hefur verið að lækka almennt eftirlitsgjald vegna minna eftirlits í fyrirtækinu. Þetta var staðfest í fjárhagsáætlun Reykjavíkurborgar fyrir árin 2021-2025. Viðhorf og menning borgarinnar til hundahalds er fornaldarlegt og má skynja neikvæðni einstaka embættismanna í svörum við fyrirspurnum Flokks fólksins til heilbrigðiseftirlitsins. Þetta er upplifun fulltrúa Flokks fólksins. Svör og umsagnir hafa verið litaðar af pirringi og skilningsleysi embættiskerfisins og meirihlutans á að borgarfulltrúi er kjörinn til að gæta hagsmuna borgara og í þessu máli er verið að brjóta á rétti hundaeigenda.

Í bókun meirihlutans kemur m.a. fram:

Gjöldum fyrir hundaleyfi er samkvæmt samþykktum Reykjavíkurborgar um hundahald nr. 478 og er ætlað að standa undir kostnaði borgarinnar af hundahaldinu. Engin þöggun á sér stað um störf hundaeftirlitsins enda má finna allar upplýsingar á vef borgarinnar eins og ítrekað hefur verið bent á í svörum við fyrirspurnum borgarfulltrúa Flokks fólksins. Nú er verið að leggja lokahönd á stefnu um dýraþjónustu í borginni og vænta má breytinga og betrumbóta fyrir dýraeigendur í borginni.

Vísað er að öðru leyti í fundargerð borgarráðs 25. júní

Tillaga að nýrri vinnureglu á starfsstöðvum velferðarsviðs

Ég lagði fram þessa tillögu að nýrri vinnureglu á starfsstöðvum velferðarsviðs á fundi velferðarráðs í dag. Hún gengur út á að starfsmenn velferðarþjónustu/þjónustumiðstöðva yfirgefi ekki vinnustaðinn í lok dags fyrr en þeir eru búnir að svara með einum eða öðrum hætti innkomnum erindum (skeytum/skilaboðum ) sem borist hafa. Vissulega gætu komið dagar sem þetta er ekki hægt en í það minnsta muni starfsmenn leitast við af öllum mætti að gera þetta.

Hér er  ekki átt við að öll erindi fá fullnaðarafgreiðslur enda slíkt ekki raunhæft heldur að þeim sem sent hafa skeyti eða skilaboð verði svarað sem dæmi:  „erindið er móttekið/málið er í skoðun/ haft verður samband hið fyrsta“, eða eitthvað á þessa leið.
Fólk sem hringir á þjónustumiðstöðvar eru með ákveðin erindi, misáríðandi eins og gengur. Í flóknari málum skilja flestir að afgreiðsla getur tekið einhvern tíma. Hins vegar skiptir það máli að fá vitneskju um að erindi þeirra er móttekið og haft verði samband. Þær upplýsingar hjálpa.

Við sem erum í þjónustustörfum eigum ávallt að gera allt til að létta skjólstæðingum okkar lífið, milda álag og draga úr streitu og kvíða.  Móttökuskeyti getur skipt þjónustuþega þjónustumiðstöðva máli.

Og fékk þetta svar

Í lögunum segir: "Umferð vélknúinna ökutækja um göngugötu er óheimil. Þó er umferð vélknúinna ökutækja akstursþjónustu fatlaðra, handhafa stæðiskorta fyrir hreyfihamlaða, lögreglu, slökkviliðs og sjúkraflutninga heimil." Hvort að borginni sé heimilt að setja niður keilur er atriði sem lögreglan tekur ekki afstöðu til, enda ekki lögreglu að taka afstöðu til skipulagsmála. Borgin ber ábyrgð á sínum framkvæmdum.

Kv.ÞI