Mótmælum ofbeldi hvort heldur á Austurvelli eða inn á heimilum

Ofbeldi er aldrei réttlætanlegt.

Öll tjáning og samskipti geta komist til skila án þess að beita þurfi ofbeldi að nokkru tagi.

Sá sem beitir ofbeldi fær hvorki hlustun né skilning á málstað sinn.
Hann hefur með ofbeldishegðun sinni dregið athyglina frá málstaðnum yfir á ofbeldið.

Hlúum að og virðum rétt okkar til að mótmæla. Ofbeldisseggir á mótmælafundum skemma fyrir öllum hinum sem vilja koma viðhorfum sínum og skoðunum á framfæri.

Ofbeldi á heimilum.
Heimilisofbeldi er vandamál sem fer gjarnan leynt. Því fylgir skömm fyrir alla sem málið varðar.

Heimilisofbeldi getur birst í ýmsum myndum:
-líkamlegt ofbeldi
-andlegt ofbeldi
-kynferðislegt ofbeldi

Enda þótt karlar séu ekki þeir einu sem beita ofbeldi stendur þeim til boða sérmeðferð sem ber yfirskriftina KARLAR TIL ÁBYRGÐAR

Um er að ræða einstaklingsmeðferð og hópmeðferð hjá sálfræðingum.

Upplýsingar og viðtalsbeiðnir eru í síma 555-3020

Engan barnaníðing í mitt hverfi, takk fyrir.

Engan barnaníðing í mitt hverfi dugar skammt því þeir leynast og okkur tekst aldrei að góma alla.
Þess vegna verðum við að kenna börnunum að þekkja aðstæður sem kunna að vera hættulegar og hvar mörkin liggja. Engar aðferðir eða nálganir eru skotheldar en allt verður að reyna. Ef einhver aðferð eða nálgun verður til þess að bjarga þótt ekki væri nema einu barni frá því að þola kynferðisofbeldi er það sigur.

Ein öruggasta vörnin felst í því að kenna börnunum fáeinar mikilvægar samskiptaleikreglur og brýna fyrir þeim hvar mörkin liggja hvað varðar þeirra eigin líkama og þeirra sem kunna að verða á vegi þeirra.

Staðreyndin er sú að það er óraunhæft að halda að hægt sé að fría samfélagið af veikum einstaklingum svo sem þeim sem misnota og áreita börn og unglinga kynferðislega.  Stundum tekst að upplýsa þessi mál, sakfella og dæma en einn góðan veðurdag hefur viðkomandi lokið afplánun og stígur út úr fangelsinu. Í fangelsinu gæti hafa tekist að hjálpa aðilanum upp að einhverju marki en fyrir liggur að rannsóknir sem lúta að árangri meðferðar á kynferðisafbrotamönnum gefa ekki tilefni til nægjanlegrar bjartsýni.

Hafi viðkomandi lokið afplánun að fullu er hann frjáls maður og þarf einhvers staðar að vera.
Það besta og raunhæfasta sem við getum gert er að kenna börnunum snemma ákveðnar leikreglur í samskiptum, fræða þau um hvar mörkin liggja og þjálfa þau í að lesa og meta aðstæður. Jafnframt að kenna þeim viðbrögð þ.e. hvað eigi að gera hafi þau lent í aðstæðum eða samskiptum sem þeim líður illa með.

Börn þurfa kennslu og leiðbeiningu um kynferðislega hegðun eins og aðra hegðun.
Til dæmis, hvernig snerting er í lagi?
Hvaða staðir eru mínir einkastaðir?

Ítreka jafnframt við þau:
Þú átt þinn líkama og enginn má snerta þína einkastaði. Ef einhver vill gera það, hvort heldur hann er kunnugur eða ókunnugur átt þú að flýta þér í burtu og segja frá. Leyndarmál sem láta manni líða illa eru vond leyndarmál.

Skólinn, fagaðilar og grasrótarsamtök geta stutt foreldra í því að ræða um kynferðislegt ofbeldi við börn sín og hvernig þau geta kennt þeim að verjast slíkum árásum.

Vilji skólinn taka inn fræðslu um þessi mál er mikilvægt að hún sé í samstarfi og samvinnu við foreldra.   Í kjölfar fræðslu um þessi viðkvæmu mál vakna oftar en ekki spurningar hjá börnunum sem foreldrar, eftir að skóla lýkur,  þurfa að geta svarað.  Fylgja þarf fræðslu sem þessari eftir og þar eru þeir í aðalhlutverki.

Sheikinn greiddi ekki af láninu. Hver botnar annars í þessum viðskiptaháttum?

Satt að segja botna ég ekkert í þessum viðskiptaháttum Ólafs Ólafssonar, eins stærsta hluthafa Kaupþings og Sheiks bin Khalifa Al-Thanis af því sem ég hef heyrt og lesið.

Hvers konar viðskiptahættir voru þetta eiginlega?
Er hér um ólöglega viðskiptahætti að ræða eða siðlausa nema hvortveggja sé?
Eða er þetta bara allt í lagi?

Ólafur segist hafa viljað styrkja Kaupþing.  Sheikinn fékk lán fyrir helmingi kaupanna frá Kaupþingi og rest frá félagi í eigu Ólafs á Jómfrúreyjum. 
Kaupþing seldi Sheiknum eigin bréf og því hafi engir fjármunir farið úr bankanum.
Greiðsla vegna lánsins til Sheiksin skilaði sér hins vegar aldrei til Kaupþings sem sat uppi með 12.8 milljarða tap.
Skýrsla úr höndum Skilanefndar telur mörg hundruð blaðsíður en verður að því er segir í fréttum ekki gerð opinber í bráð.

Skilur nokkur eitthvað í þessu?

Kynning á RÉTTLÆTI

Opinn fundur vegna Peningabréfa Landsbankans.

Réttlæti.is, samtök sem berjast fyrir réttlátu uppgjöri á Peningabréfum Landsbankans, boðar til opins fundar fimmtudaginn 22. janúar n.k. kl. 20:00.
 
Fundarstaður er í Laugardalshöll, inngangur A, salur 1. 
Efni fundarins er eftirfarandi:
1.   Kynna að RÉTTLÆTI.is hefur fengið til liðs við sig Hilmar Gunnlaugsson hrl. hjá Regula lögmönnum, en hann hefur tekið að sér málssókn fyrir okkar hönd á hendur Landsvaka dótturfélags Landsbankans sem nú er í eigu NBI. Hilmar mun á fundinum fara yfir stöðuna.
2.   Öflun umboða til að lögmaðurinn geti unnið fyrir sem flesta umbjóðendur.
3.   Farið yfir framgöngu RÉTTLÆTIS.is í baráttu samtakanna og hvað er framundan. 

Nánar um RÉTTLÆTI.is á www.rettlaeti.is

Bæjartjóri í nærmynd

Þessi tvö ætla að spjalla saman í kvöld á ÍNN kl. 9.

 

Í nærveru sálar í kvöld segir Gunnar okkur frá sjálfum sér, fjölskyldu sinni og starfsferli.

 

Kynnumst eilítið innri manni bæjarstjórans í Kópavogi í kvöld á ÍNN.

Fæðingarþunglyndi og fjárplógsstarfsemi

Hvað skyldi fæðingarþunglyndi og fjárplógsstarfsemi mögulega geta átt sameiginlegt?
Jú þetta er efni þátta sem nú er hægt að sjá á Netinu (inntv.is Í nærveru sálar).

Fæðingarþunglyndi hér:

Fjárplógsstarfsemi gömlu bankanna hér:

Gleymum ekki að snerta hvort annað.

Nú þegar hart er í ári, dimmt og hráslagalegt úti er lag að huga að innihaldi sambanda.  Þau sambönd/hjónabönd sem innihalda snertingu og hlýlega framkomu standa betur að vígi í  erfiðleikum og undir álagi. Þessi vegna eru þessi sambönd einnig líklegri til að vara ef samanborið við sambönd þar sem parið hefur einhverra hluta vegna ekki tekist að gera snertingu og hlýlega framkomu í garð hvors annars að venju í sambandinu. 

Gildi snertingar í samböndum er margþætt.

1. Snerting í samböndum minnir á hvers eðlis sambandið er.
2. Snerting er smyrsl á streitu, uppnám, vonbrigði og reiði.  
3. Snerting er spennulosandi bæði fyrir þann sem snertir og þann sem er snertur.
4. Snerting er huggandi og græðandi.
5. Snerting er merki um væntumþykju. 
6. Sá sem snertir maka sinn er að tjá honum að hann óski eftir nálægð við hann.
7. Snerting er könnun á viðbrögðum, upplýsingar um hvernig hinum aðilanum líður. Til dæmis í þeim tilvikum þar sem fólk hefur verið að deila þá má með því að snerta maka sinn athuga hvort það séu móttökuskilyrði fyrir umræðu eða sættir
8. Snerting gefur yl og hlýju í bókstaflegri merkingu. Ylur slakar á spennu í vöðvum og hefur því mildandi áhrif ef viðkomandi er í uppnámi.
9. Fyrir þann sem er lokaður að eðlisfari kemur snerting og ástúðleg tjáning oft í staðinn fyrir orð. Snerting er mjög öflugt tjáningarform og segir oft allt sem segja þarf
10. Snerting getur einnig virkað hvetjandi á talfærin. Snerting og ástúðleg orð haldast gjarnan hönd í hönd.  

Sambönd sem eru rík af snertingu eru oft farsæl. Parið er fljótar að vinna úr ágreiningsmálum því það langar til að komast sem fyrst aftur í snertingu við hvort annað. Ferli togstreitu, reiði og pirrings er oft styttra en í samböndum þar sem parið snertist sjaldan eða aldrei. Þeir sem eru vanir daglegri snertingu við maka sinn vilja ekki lengi vera án hennar. Fráhvarfseinkenni gætu auðveldlega gert vart við sig.

Reykjavíkurborg ætti að taka Akureyrarbæ til fyrirmyndar og bjóða upp á ókeypis heilsurækt

Hreyfing og útivist í kreppunni er yfirskrift verkefnis sem ýtt hefur verið úr vör á Akureyri. Akureyringum er boðið upp á ókeypis heilsurækt. Helstu íþróttamannvirki standa þeim opin part úr degi og boðið er upp á ýmis námskeið fólki að kostnaðarlausu.

Allir vita að árskort í líkamsrækt kostar talsverða peningar.  Ódýrasti kosturinn er hjá Nautilus, af því er ég kemst næst, en þar kostar árskortið með aðgang að sundlauginni innan við 30.000 á ári. Sambærilegt kort í Sporthúsinu er á rúmlega 50.000 og enn dýrara er kortið í Laugum.

Ég skora á ráðamenn Reykjavíkurborgar og annarra sveitarfélaga að skoða þennan möguleika fyrir sitt fólk.

Ekki þarf að fara mörgum orðum um hvað hreyfing af öllu tagi gerir fólki gott andlega sem líkamlega. Á þessum síðustu og verstu tímum er sannarlega ástæða til að skoða þennan kost.

Sveitarfélög víðsvegar um landið geta boðið upp á frían aðgang þótt ekki væri nema part úr degi án mikils tilkostnaðar.  Með því skapast möguleiki fyrir marga að nota fjölbreytta aðstöðu íþróttahúsanna þeim að kostnaðarlausu.

Fjárplógsstarfssemi gömlu bankanna á ÍNN í kvöld

Undirgefnir eða óupplýstir starfsmenn Landsbankans?
Vissu einhverjir starfsmenn þegar þeir hringdu í viðskiptavini bankans rétt fyrir hrunið að bankinn væri á leiðinni á hausinn innan fárra daga?
Eða var þetta bara undirgefið og hlýðið starfsfólk sem haldið var fyrir utan allan raunveruleika og sannleika?
Vísbendingar eru um að starfsfólk bankans hafi rétt áður en bankinn hrundi, fengið fyrirmæli frá yfirboðurum sínum um að hringja í fólk sem átti fé á innlánsreikningum og hvetja það til að leggja peningana inn á Peningamarkaðssjóði. 

Hörður og Ómar eru gestir þáttarins í kvöld og segjast ekki hafa lagt öll spilin á borðið enn. Þeir félagar eru í forsvari fyrir hreyfingu einstaklinga (réttlaeti.is) sem hefur það að markmiði að endurheimta tap sem hlaust af einhliða uppgjöri á Peningamarkaðssjóðum Landsbankans.

 

 

Traustvekjandi rannsóknarnefnd

Rannsóknarnefnd Alþingis er tekin til starfa. Nefndina skipa Tryggvi Gunnarsson, umboðsmaður Alþingis, Páll Hreinsson, hæstaréttardómari og Sigríður Benediktsdóttir, kennari við hagfræðideild Yale-háskóla.

Hlutverk nefndarinnar er að rannsaka aðdraganda og orsakir falls íslensku bankanna árið 2008 og tengdra atburða. Nefndinni er einnig ætlað að leggja mat á hvort um mistök eða vanrækslu hafi verið að ræða við framkvæmd laga og reglna um fjármálastarfsemi á Íslandi og hverjir kunni hugsanlega að bera ábyrgð á því.

Allir þessir aðilar virka traustvekjandi og held ég að ferill þeirra sé að öllu leyti glæstur.
Nefndin er sjálfstæð, óháð og tekur ekki við fyrirskipunum.
Frábært

Forðast að eiga viðskipti við fasteignasala sem ekki munu starfa samkvæmt siðareglum. Samtengja má löggildingu og siðareglur

Viðskiptaráðherra mælir fyrir frumvarpi sem felur í sér afnám skylduaðildar að Félagi fasteignasala. Fasteignasalar sem gerast ekki aðilar að Félaginu þurfa þar með ekki að fylgja siðareglum.

Ef litið er til annarra stétta og er þá nærtækast fyrir mig að tala um stétt löggildra sálfræðinga þá felur löggilding Landlæknisembættisins í sér þá kröfu að viðkomandi sálfræðingur skuli fylgja þar til gerðum siðareglum. Þetta er án tillits til hvort viðkomandi sálfræðingur hyggst gerast aðili að Sálfræðingafélagi Íslands.

Með sama hætti mætti tengja siðareglurnar við löggildinguna hjá sýslumanni í tilviki fasteignasala. Svo er það hverjum og einum í sjálfsvald sett hvort hann gangi til liðs við Félag fasteignasala.

Allir þeir sem fara með viðskipti fyrir almenning ættu skilyrðislaust að fara eftir siðareglum.  Allt of oft hafa menn brennt sig á því að skapast hafa aðstæður í viðskiptageiranum þar sem skortir eftirlit, leiðbeiningu og aðhald.

Verði þetta frumvarp að lögum með þessum agnúa hvet ég alla þá sem ætla að eiga fasteignaviðskipti að sniðgagna þá fasteignasala sem ekki eru skuldbundnir til að starfa samkvæmt ákveðnum siðareglum fasteignasala.

Það fóru ekki allir á fyllerí

Það er ekki rétt þegar sagt er að öll þjóðin hafi farið á neyslufyllerí og þá er átt við að hafa eytt um efni fram, tekið mörg og stór lán og fengið yfirdrætti eða með öðrum hætti hagað sér með óábyrgum hætti í fjármálum.

Þetta gerðu margir en ekki allir. Hópur Íslendinga tók að engu leyti þátt í þessu heldur lifði lifi sínu af hógværð og skynsemi. Sem dæmi má nefna marga sem komnir eru á miðjan aldur og þar yfir sem lærði í sínum uppvexti að fara vel með peninga.

Þetta fólk hefur í engu breytt sínum lífsstíl undanfarin ár. Það hélt áfram að vinna sína vinnu, borga sína reikninga, veita sér hluti og munað eftir því sem fjárráð leyfðu hverju sinni.
Þetta er fólkið sem vildi eiga fyrir því sem það keypti.

Margir af þessum einstaklingum settu það í forgang að leggja fé til hliðar til efri áranna. Það er einmitt þetta sparifé sem nú er tapað en eins og kunnugt er voru margir hvattir til að geyma fé sitt í peningamarkaðssjóðum gömlu bankanna og þeim talin trú um að áhættan væri engin. Nú er allt að þriðjungur sparifjárins fólkinu líklegast með öllu tapaður.

Í þessum hópi fólks sem ekki voru þátttakendur í ruglinu er einnig ungt fólk sem ætlaði ekki að drekkja sér strax í skuldaklafa og hagaði lífi sínu samkvæmt því.

Þess vegna er það hvorki rétt né sanngjarnt að segja að ÞJÓÐIN, allir sem einn, hafi misst sig í neyslugleðinni þegar verið er að tala um það fólk sem skuldsetti sig langt umfram greiðslugetu eða þá sem tóku stórar áhættur á hlutabréfamarkaði í því skyni að ætla að græða.

Fæðingarþunglyndi, áhrifa- og áhættuþættir, á ÍNN í kvöld

Fæðingarþunglyndi, áhrifa- og áhættuþættir verður umræðuefnið
Í nærveru sálar í kvöld.
Marga Thome, professor í hjúkrunarfræði við Háskóla Íslands er gestur þáttarins.
Við ræðum um algengi fæðingarþunglyndis, helstu áhættuþætti og nýjustu rannsóknir.
Einnig hvernig þunglyndi á meðgöngu og eftir fæðingu getur haft áhrif á tengslamyndun móður og barns sé það ekki meðhöndlað.

Fróðlegur þáttur sem vert er að fylgjast með.
Myndin er úr myndasafn Morgunblaðsins.

Á alla skal hlusta, unga sem aldna. Átta ára stúlka tjáði sig opinberlega á Austurvelli í gær.

Átta ára stúlka fór í ræðustól á mótmælafundi á Austurvelli í gær og flutti ræðu af miklu öryggi sérstaklega ef tekið er mið af ungum aldri hennar.

Auðvitað eiga allir rétt á að tjá sig án tillits til aldurs og gildir þá einu hvert málefni er.  Á börnin eigum við einnig sérstaklega að hlusta.  Dagný Dimmblá sem fór í ræðustól á Austurvelli í gær sagðist hafa fylgst með þessu málum, hún hafi mætt á mótmælafundi, væri reið og vildi halda ræðu um eitthvað annað en rugl eins og hún orðaði það sjálf.

Að sjálfsögðu hljóta börnin okkar að verða fyrir einhverjum áhrifum og dragast inn í allt þetta tal um kreppu. Sum láta sér þetta í léttu rúmi liggja en önnur hlusta, hugsa um þetta og hafa jafnvel af þessu áhyggjur. Þau kunna að velta því fyrir sér hvort fólkið í landinu sé að verða fátækt.

Það er eðlilegt að foreldrar hafi það sjónarmið að vilja halda börnum sínum frá þessu en spurning er hversu raunhæft það er.  Börn eru vissulega misjöfn í eðli sínu og eftir því á hvaða þroskastigi þau eru en flest eru forvitin, athugul og sum þeirra vilja vita um það sem fullorðnir eru að stússast í.

Ekki voru allir á eitt sáttir um að blanda ætti svo ungu barni í kreppumótmælin með þessum hætti.

Mitt mat í þessu ákveðna tilfelli er að hafi stúlkan stigið í ræðustólinn af fúsum og frjálsum vilja án nokkurs ytri þrýstings eða þvingunar er ekkert við það að athuga. Hafi hún hins vegar verið beitt þrýstingi af einhverjum toga eða hvött umfram það sem eðlilegt gæti talist horfir málið öðruvísi við.

Eins er það með öllu óásættanlegt ef einhverjir hafi viljað beita henni sérstaklega vegna ungs aldurs fyrir málstaðinn í því skyni að vekja á honum enn frekari athygli.

Í tilfelli Dagnýjar hefur það komið fram að hún segist sjálf hafa beðið um að fá að halda ræðu á Austurvelli.

Dagný var spurð hvort hún hefði orðið vör við að krakkar á hennar aldri væru uppteknir af ástandinu eins og hún en hún svaraði þeirri spurningu neitandi.  Það er að mestu í samræmi við mína upplifun af líðan þeirra barna sem ég hef umgengist í mínu starfi eftir að efnahagshrunið dundi yfir með öllum sínum fylgifiskum. 

Enginn fór í sjóinn árið 2008

Það gladdi að lesa að enginn lét lífið í sjóslysi á árinu 2008. Skýringarnar eru margar og má rekja þær flestar til ýmis konar framfara í björgunarmálum, til hærri öryggisstaðla en einnig til þess að fækkað hefur í stétt sjómanna.  

En stundum er það þannig að slysin gera ekki nein boð á undan sér og gildir þá einu aðgát, varkárni, björgunarútbúnaður eða háir öryggisstaðlar.  Tilviljanir og heppni eða óheppni spila nefnilega sína rullu líka í þessu sem öðru.

Þessi frétt vekur fögnuð því það var einmitt sjórinn sem tók jafnan stærsta tollinn hér á árum áður.

 

Ólík sjónarmið álitsgjafa Kastljóss í gærkvöldi

Það voru sannarlega ólík sjónarmið álitsgjafa Kastljóss í gærkvöldi en þeir voru spurðir um skoðanir og viðhorf sín er varðar eitt og annað sem lýtur að efnahagsviðburðum ársins.

Sitt sýnist hverjum þegar kemur að því að benda á eins og helstu ummæli ársins, helsta hneykslið og annað  sem þessum aðilum fannst standa upp úr.

Ómar Valdimarsson fannst mér vera sá sem virtist vera nálægt raunveruleikanum, alla vega eins og ég sé hann og sama má segja um fleiri sem spurðir voru.  Ég var reyndar ekki sátt við það sem einn álitsgjafinn sagði um Dorrit forsetafrú.

Þeir sem vilja gera svokallaða útrásarvíkinga að helstu ábyrgðarmönnum alls þessa stóra vandamáls tel ég að séu ekki alveg að sjá heildarmyndina. En það er vissulega bara mín skoðun.

Álitsgjafarnir sem töluðu um viðvörunarbjöllurnar sem löngu voru farnar að hringja og spurðu af hverju ekki var brugðist við, fannst mér vera með fingurinn á púlsinum.

Mikið vildi maður að hlustað hefði verið á þessar bjöllur og á þeim tekið fullt mark.
En svo er alltaf hægt að segja svona eftir á og spurningin er hvort aðrir stjórnmálamenn/stjórnmálaflokkar hefðu verið frekar vakandi?

Það mun náttúrulega aldrei fást staðfest.

Fært undir Óflokkað | Breyta| Engin

Vill Sigmundur Davíð í formannsslaginn?

Af hverju finnst mér eins og Sigmundur Davíð Gunnlaugsson sé ekki heill í þessari ákvörðun sinni með að bjóða sig fram til formanns Framsóknarflokksins?
Nógu margir eru svo sem um hitunina.

 

Hann hefur nú loks tilkynnt þessa ákvörðun sína og ætlar að taka slaginn.

 

Annað hvort hefur hann viljað láta ganga á eftir sér eða að hann hefur einfaldlega ekki verið viss um að hann vildi þetta.

 

Þetta með að vera að íhuga og íhuga virkar fremur neikvætt (alla vega á mig). Annað hvort vill hann þetta eða ekki.

 

Sumir í þessum kringumstæðum segja síðan...

það hafa margir skorað á mig....osfrv og þess vegna hef ég ákveðið að gefa kost á mér.

 

En hvað vitum við um hvort margir hafa skorað á hann eða einhvern annan sem þetta fullyrðir, ef því er að skipta?

 

Annars er Sigmundur Davíð hinn efnilegasti frambjóðandi, það er ekki málið. Og sjálfsagt hefur hann verið framsóknarmaður í húð og hár alla tíð enda sonur Gunnlaugs Sigmundssonar, fyrrverandi þingmanns Framsóknarflokksins.

 

Leið mistök í bókinni um Sigurbjörn biskup

Það hafa orðið mistök á bls. 346 í bókinni um Sigurbjörn biskup en þar er sálmur 391 sagður vera eftir Sigurbjörn Einarsson en hið rétta er að hann er eftir afa minn Sigurð Einarsson.

Sálmur 391
Það húmar, nóttin hljóð og köld
í hjarta þínu tekur völd,
þar fölnar allt við frostið kalt,
- en mest er miskunn Guðs.

Er frostið býður faðminn sinn,
þér finnst þú stundum, vinur minn,
sem veikur reyr, er megni' ei meir,
- en mest er miskunn Guðs.

En vit þú það, sem þreyttur er,
og þú, sem djúpur harmur sker,
þótt hrynji tár og svíði sár,
að mest er miskunn Guðs.

Og syng þú hverja sorgarstund
þann söng um ást, þótt blæði und,
og allt sé misst, þá áttu Krist.
Því mest er miskunn Guðs.

Hin ljúfa hlið Kristins H. á ÍNN í kvöld kl. 9

Persóna Kristins H. Gunnarssonar kortlögð í kvöld kl. 9 á ÍNN
Í nærveru sálar.

Kristinn sýnir ljúfa og einlæga hlið.
Eitt og annað úr stjórnmálaferlinum er dregið fram til að varpa enn skýrara ljósi á manngerð hans.

Hver verður sá sem hann leggur síðan til að verði næsti gestur?
Leitar hann langt um skammt?