Gullnáma fyrir njósnara og aðra óprútna aðila

Það er mjög kostnaðarsamt að stilla upp myndavélum um allan bæ til að innheimta veggjöld. Þetta er sennilega dýrasta aðferð sem hægt er að nota. Eigi að innheimta t.d. 20 milljónir þá trúi ég að innheimtubúnaðurinn og allt í kringum hann og annað utanumhald kosti sennilega annað eins. Þetta fer allt í sjálfa sig.

 

Stríðir gegn persónuverndarlögum

 

Dagur og meirihlutinn eiga frumkvæði af veggjöldum. Það hefur komið fram að veggaldarhugmyndin er ekki komin frá Sigurði Inga eða Framsókn Veggjöld verða innheimt með því að greina bílnúmer bifreiða því ekki er hægt að hafa greiðsluhlið. Það myndi tefja umferðina mikið.  Þannig verða allar okkar ferðir raktar. Aldrei mun ég vilja samþykkja þetta. Ef einhver óprúttinn aðili kæmist í þessi gögn er hægt að vita hvar hver er á hvaða tíma. Mjög óaðlaðandi og vanhugsað dæmi allt saman tel ég. Þetta er gullnáma fyrir njósnara.

 

Finna verður aðrar leiðir til að fjármagna borgarlínu það sem upp á vantar, t.d. selja byggingar, selja land, hætta við skrautframkvæmdir og byrja bara að spara. Þingmenn og miðlæg stjórnsýsla borgarinnar geta t.d. dregið verulega úr ferðum til útlanda, nota í fjarfundabúnað meira og fundarstreymi, leggja niður dagpeningakerfið og taka upp viðskiptakort í staðinn og áfram mætti telja?

Setja sjoppuna í sorpið

Hugmynd um að varðveita gamla sjoppu við Langholtsveg er með ólíkindum ekki nema einhver auðkýfingurinn vildi fjármagna það og gefa borginni. Ég ætla rétt að vona að borgarmeirihlutinn fari ekki að taka upp á þeirri vitleysu að setja 50 milljónir í að endurbyggja ónýtt biðskýli. Í ljósi sögunnar kæmi það ekki endilega á óvart að skipulagsyfirvöld í borginni teldu að þetta væri merkilegt til varðveislu og verðugt verkefni að setja í nokkra tugi milljóna.
Nota má 50 milljónir til margra annarra hluta en að endurbyggja þetta hús ef hús skyldi kalla jafnvel þótt það sé hannað af einhverjum frægum arkitekt.
Fólkið fyrst!

Ég er himinlifandi

Ég er himinlifandi, trúi þessu varla. Þetta er sko ekki á hverjum degi, Tillaga Flokks fólksins um lækkun hámarkshraða á Laugarásvegi hefur verið samþykkt í skipulags- og samgönguráði.
Sjá má í fundargerð:

Tillaga áheyrnarfulltrúa Flokks fólksins, um lækkun hámarkshraða á Laugarásvegi.

Tillagan:

Vísað er til skipulags- og samgönguráðs frá Borgarráði dags. 5. september 2019 þar sem borgarfulltrúi Flokks fólksins leggur til að hámarkshraði á Laugarásvegi verði lækkaður úr 50 km/klst. í 30 km/klst. Nauðsynlegt er að lækka hámarkshraða á Laugarásvegi úr 50 km/klst. í 30 km/klst. í samræmi við aðrar götur í hverfinu þar sem íbúðarhúsnæði er þétt. Ökumenn aka jafnan vel yfir 50 km/klst. á Laugarásvegi sem skapar mikla hættu en mikið af börnum búa í götunni og leika sér fyrir framan húsin. Gatan er löng og þ.a.l. eiga ökumenn það til að auka hraðann verulega. Íbúar við Laugarásveg eru uggandi um börn sín og telja að það auki öryggi þeirra til muna verði hámarkshraði lækkaður í 30 km/klst.

Samþykkt
Vísað til Umhverfis- og skipulagssviðs, skrifstofu samgöngustjóra og borgarhönnunar til endanlegrar útfærslu. Athygli er vakin á því að endanlegt samþykki er háð samþykki Lögreglustjóra.

 

 

 

 

Almennir verslunareigendur í miðbænum eiga alla mína samúð

Það vita það allir sem hafa fylgst með þessari umræðu um lokanir í miðbænum að þegar formaður skipulags- og samgönguráðs segir að göngugötur efla samskipti og auka lífsgæði borgarbúa þá er það fátt nema síendurtekin klisja enda verið að framkvæma þetta allt í óþökk fjölda manns. Þrír minnihlutaflokkar í borgarráði hafa ekki atkvæðarétt þar. Borgarmeirihlutinn samþykkir sín eigin mál oftast með eins manns meirihluta. Svo er send út fréttatilkynning frá upplýsingafulltrúa meirihlutans sem segir „borgarráð samþykkti“. En það er nú aldeilis ekki. Standa ætti frekar „hinn eins manns meirihluti sem er með minna atkvæðamagn að baki sér en minnihlutinn samþykkti sína eigin tillögu um að loka miðbænum fyrir bílaumferð“.En reynt er að slá ryki í augun á fólki í þessu máli, reynt að plata borgarbúa. Enn fleiri verslanir eiga nú eftir að hörfa þar sem viðskipti hafa hrunið samhliða þessum aðgerðum. Eftir standa lundabúðir og veitingastaðir sem gefa ferðamönnum að borða og jú vissulega er skemmtanalíf í bænum sem alltaf einhverjir munu sækja. Þetta allt væri ekki svona ömurlegt nema vegna þess að hinn eins manns meirihluti sagðist ætla að hafa samráð, brandarasamráð.  

Af hverju er Reykjavík svona oft eftirbátur smærri sveitarfélaga?

 

14. febrúar 2019 lagði ég til að Reykjavíkurborg innleiddi Heimsmarkmið Sameinuðu þjóðanna með formlegum hætti og hugað yrði sérstaklega að innleiðingu þeirra í leik- og grunnskólum. Þessi tillaga var felld. Nú hefur Kópavogur samþykkt að innleiða Heimsmarkmiðin og verður fyrsta sveitarfélag á Íslandi til þess að að gera það formlegum hætti.

 

Af hverju er Reykjavík svona oft eftirbátur smærri sveitarfélaga?
Maður hefði haldið að stærsta sveitarfélagið ætti að vera fyrirmynd og í krafti fjöldans vera í forystu með fjölda mála. En það er nú eitthvað annað. Í það minnsta fór þessi tillaga mín í tunnuna en hefði hún verið samþykkt hefði Reykjavík verið fyrsta sveitarfélagið til að innleiða Heimsmarkmiðin um sjálfbæra þróun með formlegum hætti.

 

Tillagan um innleiðingu Heimsmarkmiðana með formlegum hætti

Lagt er til að borgaryfirvöld samþykki að innleiða Heimsmarkmið Sameinuðu þjóðanna um sjálfbæra þróun sem snúa að borgum og með formlegum hætti. Sérstaklega skal hugað að innleiðingu heimsmarkmiðana í allt leik- og grunnskólastarf borgarinnar. Heimsmarkmiðin eiga erindi til nemenda á öllum skólastigum og ekki síst til leikskólabarna. Mikilvægt er að borgaryfirvöld samþykki að hefja markvissa vinnu að uppfærða börnin um Heimsmarkmiðin strax í leikskóla. Allt efni er hægt að fá að kostnaðarlausu hjá Félagi Sameinuðu þjóðanna og á netinu. Grunnskólar eru hvattir til að nýta sér þetta og að leggja áherslu á Heimsmarkmiðin í sinni almennu kennslu, starfi og leik. Nú þegar ættu að vera komin veggspjöld með Heimsmarkmiðunum í alla skóla landsins, á öllum skólastigum. Hægt er að nýta veggspjöld til að gera markmiðin sýnilegri og þannig verði þau nýtt í auknum mæli til að leggja áherslu á mikilvægi hvers einasta heimsmarkmiðs enda eiga þau erindi inn í alla okkar tilveru. Það er von Flokks fólksins að skólar finni fyrir hvata úr öllum áttum til að innleiða Heimsmarkmiðin og að sá hvati komi þá allra helst frá Reykjavíkurborg.

 

Greinargerð

 

Í þessari tillögu er lagt til að borgarstjórn samþykki að stefna borgarinnar samanstandi af hlutverki, framtíðarsýn, gildum og yfirmarkmiðum sem eru fengin úr Heimsmarkmiðum Sameinuðu þjóðanna. Lagt er til að borgarstjórn samþykki að setja starfseminni yfirmarkið og hvetja alla skóla borgarinnar til að innleiða þau í kennslu, starf og leiki með formlegum hætti. Eins og kveðið er á um í Heimsmarkmiðum Sameinuðu þjóðanna á að vera skýrt í stefnu borgarinnar að hlutverk hennar sé að tryggja lífsgæði íbúanna með góðri og fjölbreyttri þjónustu. Grunnreglur eiga að miða að því að allir hafi tækifæri til áhrifa. Leggja skal áherslu á gott mannlíf, skilvirkan og ábyrgan rekstur ásamt öflugu atvinnulífi. Í framtíðarsýn felst að veita skal framúrskarandi þjónustu þar sem hugsað er vel um líðan, heilsu og velferð íbúa á öllum aldri.

 

Í Heimsmarkmiðunum er áhersla á að ákvarðanir skulu vera lýðræðislegar. Tryggja þarf að borgarbúar hafi fullt tækifæri til að hafa áhrif á eigin mál og eigið líf. Gildi og siðferði skal í öndvegi. Til að þessi hugmyndafræði skili sér sem best er mikilvægt að hefja innleiðingu strax í leikskóla. Með þeim hætti geta börnin byrja að taka þátt á eigin forsendum allt eftir aldri, getu og þroska. Þau eru framtíðin og koma til með að halda áfram þeim verkefnum sem hafin eru nú.

Tillagan er felld. Skóla- og frístundaráðsfulltrúar Sjálfstæðisflokksins og Sósíalistaflokks Íslands sitja hjá.

 

Skólahljómsveitir í öll hverfi borgarinnar

Það eru aðeins 4 skólahljómsveitir í Reykjavík sem tilheyra 5 hverfum. Hverfi borgarinnar eru hins vegar 10 í allt. Í borgarráði hef ég lagt fram tillögu um að stofnaðar verði skólahljómsveitir í öllum hverfum borgarinnar. 

Á sjöunda hundrað nemendur stunda nám í fjórum skólahljómsveitum. Nemendur í grunnskólum borgarinnar eru tæp 15 þúsund. Vel má því gera því skóna að mun fleiri nemendur hefðu áhuga á að sækja um aðild að skólahljómsveit. Eins og staðan er í dag er ekki boðið upp á tónlistarkennslu í öllum grunnskólum. Nám í einkareknum tónlistarskóla er dýrt og ekki á færi allra foreldra að greiða fyrir tónlistarmenntun barna sinna. Tónlistarskólinn á  Klébergi, Kjalarnesi er eini tónlistarskólinn sem er alfarið rekinn af Reykjavíkurborg.

Borgin er með þjónustusamninga við 17 einkarekna tónlistarskóla. Þeir njóta styrkja frá Reykjavíkurborg en setja sína eigin gjaldskrá. Á meðan grunnskólar bjóða ekki upp á tónlistarnám og á meðan það er ekki á allra að stunda slíkt nám vegna mikils kostnaðar gæti þátttaka í skólahljómsveit verið góður valmöguleiki. Með því að hafa skólahljómsveit í öllum hverfum er tækifæri til tónlistarnáms flutt í nærumhverfi barnanna. Reykjavíkurborg tryggir með þessu að börnum sé ekki mismunað á grundvelli efnahags foreldra þegar kemur að tækifæri til að stunda tónlistarnám.

Hafa hvorki til hnífs né skeiðar

Á fundi borgarstjórnar í gær óskaði ég eftir umræðu um ábyrgð borgarinnar á þeim sem þiggja mataraðstoð frá frjálsum félagasamtökum, Í sumar myndaðist neyðarástand þegar 3600 manns sem ekki áttu peninga til að kaupa mat fékk ekki að borða vegna þess að frjáls félagasamtök sem eru með matargjafir lokuðu.

Með umræðunni vildi ég kalla eftir ábyrgð borgarinnar á fólki sem vegna fjárhagserfiðleika hefur orðið að setja allt sitt traust á félagasamtök. Á sama tíma og staða hagkerfisins er góð og borgin státar af hagnaði er engu að síður á fjórða þúsund manns sem ekki fær grunnþörfum sínum mætt eins og að fá að borða og þarf að treysta á matargjafir

Eftirfarandi var bókað:

Meirihlutinn í borgarstjórn setti á dagskrá lið um fjölmenningu, svona sjálfshrós fyrir að virða frelsi og fjölmenningu sjá. 1. lið á dagskrá fundar borgarstjórnar. Vissulega á að hrósa fyrir góða hluti en ég vildi minna á að í sumar stóðu 3600 manns fyrir framan lokaðar dyr frjálsra félagasamtaka þar sem þeir treystu á að fá mat.

Meirihlutinn í borginni virðist ekki hafa vitað af lokununum og ekki vitað um stöðu þessa stóra hóps fátæks fólks sem átti ekki til hnífs og skeiðar þegar félagasamtökin gátu ekki lengur veitt matargjafir.

Flokkur fólksins minnir á lögin að: „Sveitarfélag skal sjá um að veita íbúum þjónustu og aðstoð samkvæmt lögum og tryggja að þeir geti séð fyrir sér og sínum. Aðstoð og þjónusta skal jöfnum höndum vera til þess fallin að bæta úr vanda og koma í veg fyrir að einstaklingar og fjölskyldur komist í þá aðstöðu að geta ekki ráðið fram úr málum sínum sjálf“.

Af hverju virðir meirihlutinn í borgarstjórn ekki þessi lög? Hér er kallað eftir ábyrgð borgarmeirihlutans og að borgin sinni lögbundnum skyldum sínum. Ekki liggur fyrir hvort velferðarkerfið hafi athugað með þennan stóra hóp nú þegar vetur gengur í garð. Enginn á að þurfa að eiga lífsviðurværi sitt undir frjálsum félagasamtökum. Hér þarf greinilega að endurreikna fjárhagsaðstoð, í það minnsta þannig að hún dugi fólki fyrir mat.

Smá viðbót frá persónulegri hlið en ég þekki það alveg að það var ekki alltaf til matur heima hjá mér. Móðir mín, fjögurra barna einstæð kona sem vann í tvöfaldri vinnu til að ala önn fyrir fimm manns gat ekki alltaf séð til þess að matur væri á borðum.

Í aðdraganda sveitarstjórnarkosninga skrifaði ég grein Tómatsósa og smjörlíki sem byggð er á minningum um skort á mat. Í þá daga voru ekki frjáls félagasamtök þar sem hægt var að fá matargjafir eftir því sem ég man. Það voru frekar nágrannar og ömmur og afar sem reyndu að redda málum.

Tómatsósa og smjörlíki

Reykjavík segir já en Seltjarnarnes segir nei

Bæjarráð Seltjarnarness neitaði að gangast í ábyrgð fyrir láni til Sorpu vegna 1,6 milljarða króna framúrkeyrslu. Öðru máli gegnir um borgarstjórann í Reykjavík sem hefur lagt fram tillögu um viðauka við fjárhagsáætlun vegna Sorpu fyrir árið 2019. Tillögunni er vísað áfram til borgarstjórnar. Á þeim vettvangi mun Flokkur Fólksins harðlega mótmæla að borgin gangi í ábyrgð fyrir mistök við fjárfestingaráætlun Sorpu.

Það er með ólíkindum að meirihlutinn í borgarstjórn skuli samþykkja þetta án þess að blikna. Finnst þeim það ekkert tiltökumál að borgarbúar greiði á annað milljarð vegna stjórnunarklúðurs sem sagt er vera mistök?

Byggðasamlög er fyrirkomulag sem hentar Reykjavík illa. Lýðræðishalli er mikill. Reykjavík greiðir mest en getur ekki í krafti atkvæða sinna tekið ákvarðanir nema njóta stuðnings a.m.k. tveggja annarra sveitarfélaga.

Á næsta borgarstjórnarfundi mun Flokkur fólksins leggja fram tillögu um að borgarstjórn samþykki að aðild Reykjavíkur að byggðasamlögum verði skoðuð með tilliti til þess að auka lýðræðislega aðkomu reykvíkinga að þeim.

Þótt Sorpa sé í eigu allra sveitarfélaga höfuðborgarsvæðisins þarf Reykjavík að bera þungann af fjármögnun hennar vegna íbúafjölda. Ef fjárhagsleg ábyrgð Reykjavíkur á rekstri byggðasamlaga á að vera meiri en ábyrgð annarra sveitarfélaga þá á Reykjavík jafnframt að hafa stjórnunarheimildir í samræmi við þá auknu ábyrgð.

Hraða þarf uppsetningu hleðslustöðva

Það er aldrei lognmolla á fundum borgarráðs enda væri það bara leiðinlegt ef svo væri. Nokkrar tillögur og enn fleiri fyrirspurnir voru inn í morgun frá Flokki fólksins. Hér er ein tillaga þess efnis að drifið verði í að koma upp hleðslustöðum svo fólk geti farið að fá sér rafbíla þ.e. þeir sem kjósa það.

 

Tillaga borgarfulltrúa Flokks fólksins um að uppsetningu hleðslustöðva verði hraðað.

 

Lagt er til að sá tími sem áætlaður er í að setja upp 90 viðbótar hleðslustöðvar verði styttur um helming og verði þær komnar upp innan eins og hálfs árs í stað þriggja ára.

 

Komnar eru hlöður á nokkra staði í Reykjavík en betur má ef duga skal. Ljóst er að ef fólk getur ekki hlaðið rafbíla sína heima hjá sér og þarf að setja í samband við almenningshleðslur fælir það fólk frá að kaupa rafbíl en það mun tefja orkuskiptin. Það vantar hlöður í efri byggðir, t.d. Grafarvog og Breiðholt og reyndar miklu víðar. Þótt það séu hleðslustöðvar í hverfinu dugar það ekki ef aðeins er hægt að hlaða einn eða tvo rafbíla í einu.

Allar skuldir beint til lögfræðinga í innheimtu

Ný regla hjá Félagsbústöðum er að allar skuldir eru sendar beint í innheimtu hjá lögfræðingum. Þetta kom fram í kynningu á fundi velferðarráðs í vikunni. Mér, borgarfulltrúa Flokks fólksins, hugnast ekki þessi breyting, finnst hún ekki manneskjuleg.
Ég lét bóka eftirfarandi:

Borgarfulltrúi þakkar kynninguna. Það sem vekur áhyggjur er að Félagsbústaðir hafa fallið frá því að gera samkomulag um greiðsludreifingu og greiðslufresti á skrifstofu félagsins. Ef fólk fer í skuld, stóra eða smáa er skuldin send kerfisbundið til lögfræðinga í innheimtu. Félagsbústaðir er fyrirtæki í eigu borgarinnar, sett á laggirnar til að halda utan um okkar verst settu borgarbúa. Enginn leikur sér að því að borga ekki. Margir hafa kvartað og stendur ógn af því Félagsbústaðir skuli siga á þá lögfræðingum eins og fólk orðar það sjálf. Oft er um að ræða fólk sem hefur staðið í skilum en eitthvað komið upp á. Dæmi er um að eins mánaða skuld er send umsvifalaust til t.d. Mótus. Það er umhugsunarefni að Félagsbústaðir skuli velja að beina skjólstæðingum í þessa átt í stað þess að gefa þeim tækifæri til að dreifa skuld sinni hjá Félagsbústöðum. Skjólstæðingar Félagsbústaða hafa lítið milli handanna og eru í viðkvæmri stöðu. Okkur í velferðarráði ber að hafa gagnrýna hugsun og taka allar ábendingar til greina og skoða með hvaða hætti hægt er að bæta starfsemina og gera enn betur í þágu notenda þjónustunnar. Reglur eru vissulega nauðsynlegar en þær þurfa að vera manneskjulegar, sanngjarnar og taka mið af aðstæðum hvers og eins.

 

Í kjölfarið kom ég með nýja tillögu:
Tillaga Flokks fólksins að fyrirtækið Félagsbústaðir haldi sjálft utan um greiðsludreifingu leiguskulda hjá leigjendum sínum og hætti alfarið að senda skuldir í innheimtu hjá lögfræðingum

Eins og fram kemur í kynningu hefur verið fallið frá því að gera samkomulag um greiðsludreifingu og greiðslufresti á skrifstofu félagsins. Borgarfulltrúi Flokks fólksins leggur til að Félagsbústaðir hætti við að falla frá því að gera samkomulag um greiðsludreifingu og greiðslufresti á skrifstofu félagsins heldur semji sjálft við leigjendur sem komnir er í skuld. Félagsbústaðir eiga að hugsa um skjólstæðinga sína fyrst og fremst en ekki styrkja lögfræðinga.