Fátæk börn í Reykjavík eru 2% af öllum börnum 17 ára og yngri

Á tímabilinu janúar-maí 2018 voru börn þeirra sem fá fjárhagsaðstoð til framfærslu samtals 489 eða tæplega 2% af öllum börnum 17 ára og yngri í Reykjavík. Þetta er svar fyrirspurnar Flokks fólksins um fjölda barna undir framfærsluviðmiðum velferðarráðuneytisins. Langflest eða 153 búa í Breiðholti. Fæst eru í Grafarvogi og Kjalarnesi eða 55. Því má viðbæta að fjöldi barna skipt eftir þjónustumiðstöðvum og fjöldi barna per foreldra með fjárhagsaðstoð af einhverju tagi hjá velferðarsviði Reykjavíkur eru 784, flest í Breiðholti eða 218 og fæst í Grafarvogi og Kjalarnesi. Ef einhver hefur áhuga á að fá svar velferðarsviðsins í heild sinni þá er velkomið að senda það

Vil að borgarstjóri sé heiðarlegur og axli ábyrgð í braggamálinu

Ég sem borgarfulltrúi Flokks fólksins var með bókun í þessu máli sem Miðflokkurinn tók einnig þátt í. Nú hefur Minjastofnun sent frá sér yfirlýsingu og er mér brugðið. Ég verð bara að segja að það er sérstakt að sjá hvernig borgarstjóri reynir að varpa frá sér ábyrgð, kenna Minjastofnun m.a. um sem sver þetta af sér.

Öðrum var einnig kennt um þessa umframkeyrslu í bragga endurbyggingunni eins og sjá má í tillögu sem ég gerði í þessu máli um að kalla eftir endurgreiðslum (sjá fundargerð) og það er HR. Tillagan kom til því Minjastofnun og HR voru sögð ábyrg fyrir þessu  að minnsta kosti að hluta til. En hvernig kemur HR að þessu og hversu mikið greiðir skólinn? Ég mun leggja þá fyrirspurn fram næst ef það verður þá ekki þegar upplýst.

Ég bið bara um að borgarstjóri sé heiðarlegur, horfist í augu við mistökin og axli ábyrgð.

Náðhúsið kostaði 46 milljónir

Braggablúsinn, bókun:

Braggaverkefnið óx stjórnlaust, frá 155 milljónum sem var áætlunin í 404 milljónir. Þetta er óásættanlegt. Hér hafa verð gerð stór mistök og eins og þetta lítur út núna mun þetta koma verulega við pyngju borgarbúa á meðan enn er húsnæðisvandi og biðlistar í flesta þjónustu s.s. heimaþjónustu aldraðra og sálfræðiþjónustu barna. Rétt er að nefna að um 200 manns með heilabilun hafa ekki hjúkrunarrými.

 

Borgarfulltrúa Flokks fólksins hefur fundið það á fjölmörgum að mikil óánægja er með þessa framkvæmd, mörgum finnst þetta ekki vera í neinu samhengi við dapran raunveruleika sem margir búa við hér í Reykjavík. Fjölmargt í þessu ferli ber keim af fljótræði og vanhugsun auk þess sem borgin tók ákvörðun um að opna fyrir krana. Bara rétt til að almenningur átti sig á því bruðli sem hér átti sér stað kostaði náðhúsið eitt og sér kr. 46. milljónir.

 

Í kjölfarið kom Flokkur fólksins með eftirfarandi tillögu:

Flokkur fólksins leggur til að fundnar verði leiðir til að leiðrétta þau mistök sem orðið hafa í öllu ferli er varðar uppbyggingu/byggingu umrædds bragga. Á þetta verkefni opnaði borgin fyrir krana, gaf út opinn tékka. Þessar leiðir sem borgarfulltrúinn vill að fundnar verði miðast að því að HR og Minjastofnun greiði þann umframkostnað sem orðið hefur á þessu verkefni. Áætlunin nam 155 milljónir en endaði í 404 milljónum. Flokkur fólksins er ekki tilbúinn að una þessari niðurstöðu f.h. borgarbúa og krefst þess að máli linni ekki fyrr en þeir aðilar sem hér eru nefndir og eru ábyrgir fyrir útþenslu verkefnisins greiði þennan umframkostnað eins og eðlilegt þykir.

Vil að kosið verði um borgarlínu sérstaklega

Það er ljóst að borgarmeirihlutinn ætlar að hefja á uppbyggingu borgarlínu þrátt fyrir að mörg óleyst önnur brýn verkefni sem varðar grunnþarfir borgarbúa hafa ekki verið leyst. Er ekki nær að byrja á fæði, klæði og húsnæði fyrir alla áður en ráðist er í slíkt mannvirki sem borgarlína er. Að koma þaki yfir höfuð allra í Reykjavík, að eyða biðlistum svo börn fái þá þjónustu sem þau þurfa. Að setja þarfir borgarbúa í fyrsta sæti. Fólkið fyrst!

Í tillögu borgarmeirihlutans sem nú hefur verið lögð fram í borgarstjórn er ekki stafkrókur um kostnað, skiptingu hans milli ríkis og borgar og hlutfall annarra sveitarfélaga í þessari risaframkvæmd. Og enn skal þenja báknið með ráðningu verkefnastjóra, nokkurra.

Það er virðingarvert að ætla að efla almenningssamgöngur í borginni en Flokkur fólksins vill  vita hvar á að taka þessa. En hvað segja borgarbúar? Vita þeir allir út á hvað þetta verkefni gengur, hvernig það muni koma við pyngju þeirra og hvaða áhrif það kann að hafa á aðra þjónustu í borginni?

Áður en ráðist verður í þetta verkefni er það lágmarksvirðing við borgarbúa að þeir verði upplýstir af óháðum aðilum um hvert einasta smáatriði þessu tengdu og í kjölfarið gefist þeim kostur á að kjósa um hvort hefjast eigi handa við þetta verkefni í samræmi við tillögu borgarmeirihlutans. 

 

 

Á ekki að standa við gefið loforð?

Ég hef vakið athygli á því að Reykjavíkurborg hafi ekki ennþá endurgreitt öllum leigjendum Brynju, hússjóðs Öryrkjabandalagsins, sérstakar húsaleigubætur, afturvirkt með dráttarvöxtum, líkt og samþykkt var í borgarráði þann 3. maí síðastliðinn í kjölfar úrskurðar Hæstaréttar.

Árið 2015 höfðaði einn leigjandi Brynju hússjóðs mál gegn Reykjavíkurborg þar sem honum hafði verið synjuð umsókn um sérstakar húsaleigubætur á þeim forsendum að hann leigði húsnæði hjá hússjóði Öryrkjabandalagsins, en ekki hjá Félagsbústöðum eða á almennum markaði. Höfðaði hann mál gegn Reykjavíkurborg á þeim forsendum að óheimilt væri að mismuna borgurum eftir búsetu.

 

Héraðsdómur Reykjavíkur tók kröfu leigjandans til greina og  var synjun Reykjavíkurborgar felld úr gildi, þann 17. apríl 2015. Dómstóllinn komst meðal annars að þeirri niðurstöðu að Reykjavíkurborg hefði með ólögmætum hætti takmarkað óhóflega og með ómálefnalegum hætti skyldubundið mat sitt á aðstæðum fólks. Síðar fór málið fyrir Hæstarétt hvar niðurstaðan var staðfest.

 

Reykjavíkurborg fól velferðarsviði borgarinnar að afgreiða kröfurnar, til allra leigjenda Brynju hússjóðs, án tillits til þess hvort þau áttu umsókn inni eða ekki. Einnig var samþykkt að greiða dráttarvexti af öllum kröfum, aftur í tímann, án tillits hvort gerð hafði verið krafa um dráttarvexti eða ekki. 

Óljós svör leiða til kvíða

Nú er ekki vita hvar málið standi innan velferðarsviðs Reykjavíkurborgar, en veit þó til þess að margir leigjendur hafi enn ekki fengið neina endurgreiðslu, þó svo komnir séu rúmir fjórir mánuðir frá ákvörðun borgaryfirvalda um endurgreiðslurnar:

Þeir leigjendur sem leitað hafa til mín segja svör borgarinnar afar óljós og jafnvel séu engin svör veitt. Ég veit ekkert hversu margir hafa fengið endurgreitt, ef einhverjir, en þetta eru eitthvað um 460 manns. Þessi ákvörðun var tekin rétt fyrir kosningar og glöddust þá margir, en nú fjórum mánuðum síðar eru leigjendur orðnir óþreyjufullir og jafnvel kvíðnir yfir því að þetta sé ekkert að koma, því þetta er auðvitað baráttumál til 10 ára,“

Ég hyggst taka málið upp á borgarráðsfundi á fimmtudag. 

Bókun borgarráðs frá 3. maí er eftirfarandi:

Með dómi Hæstaréttar í máli nr. 728/2015 komst Hæstiréttur að þeirri niðurstöðu að Reykjavíkurborg hefði verið óheimilt að synja umsækjenda um sérstakar húsaleigubætur á þeim forsendum að hann leigði íbúð af Brynju, hússjóði Öryrkjabandalagsins. Á grundvelli þessa dóms hefur nú þegar verið gengið frá greiðslum til allra þeirra sem eru í samskonar aðstæðum og umræddur dómur tekur til og uppfylla kröfur um greiðslur sérstakra húsaleigubóta að öðru leyti. Dómurinn tekur hins vegar ekki á því álitaefni hvort leigjendur Brynju, hússjóðs ÖBÍ, sem ekki höfðu lagt inn umsókn, ættu rétt til sérstakra húsaleigubóta. Því er lagt til að borgarráð samþykki að fela velferðarsviði Reykjavíkurborgar að afgreiða kröfur um greiðslu sérstakra húsaleigubóta frá leigjendum Brynju, hússjóðs ÖBÍ, án tillits til þess hvort að umsókn hafi legið fyrir, sbr. nánari umfjöllun í meðfylgjandi minnisblaði. Þá er einnig lagt til að velferðarsvið Reykjavíkurborgar greiði dráttarvexti til þeirra sem eiga rétt á greiðslum sérstakra húsaleigubóta aftur í tímann án þess að gerð sé sérstök krafa um það. Jafnframt er lagt til að velferðarsvið leiti liðsinnis Öryrkjabandalagsins við að vekja athygli þeirra einstaklinga sem hugsanlega eiga rétt til greiðslu sérstakra húsaleigubóta aftur í tímann í samræmi við tillögu þessa. R17080174

Samþykkt.

Gæludýr skipa iðulega stóran sess í hjörtu eigenda þeirra

Tillaga hefur verið lögð fram þess efnis að leyfa hunda- og kattahald í félagslegu húsnæði í eigu borgarinnar. Leyfið er háð þeim skilyrðum að ef um sameiginlegan inngang eða stigagang er að ræða er hunda- og kattahald háð samþykki 2/3 hluta eigenda. Ef um sérinngang er að ræða er gæludýrahaldið leyfilegt. Þetta er í samræmi við Samþykkt um hundahald í Reykjavík dags. 16. maí 2012.

Ekkert getur komið í stað tengsla við aðra manneskju en gæludýr getur uppfyllt þörf fyrir vináttu og snertingu. Gæludýr þar með talið hundar og kettir eru hluti að lífi fjölmargra og skipa stóran tilfinninga- og félagslegan sess í hjörtu eigenda þeirra. Öll þekkjum við ýmist persónulega eða hjá vinum og vandamönnum hvernig gæludýr geta dimmu í dagsljós breytt, ekki síst hjá þeim sem eru einir og einmanna. Átakanleg eru þau fjölmörgu tilvik þar sem fólk hefur orðið að láta frá sér hundana sína vegna þess að þeir eru ekki leyfðir í félagslegum íbúðum á vegum borgarinnar.
Margar rannsóknir hafa sýnt fram á góð áhrif af umgengni manna við dýr. Rannsóknir sýna að umgengni við dýr eykur tilfinningalega og líkamlega vellíðan og eykur m.a. sjálfstraust, einbeitingu, athygli og minnkar streituviðbrögð. Dýr veita einstaklingnum vinskap, líkamlega snertingu og sýnir áhuga og væntumþykju án nokkurra skilyrða. Ást til gæludýrsins síns getur verið djúpstæð. Hundar og kettir sem dæmi eru oft hluti af fjölskyldunni. Sú sorg sem nístir þegar gæludýr fellur frá eða aðskilið frá eiganda sínum þekkjum við mörg, ef ekki af eigin reynslu þá annarra. Að banna gæludýr eins og hunda og ketti í félagslegu húsnæði borgarinnar er ómanneskjulegt og ástæðulaust. 
Lagt fram í borgarráði 13. september af borgarfulltrúa Flokkur Folksins

Braggar fyrst og börnin svo?

Það er sárt að sjá að borgin ákvað að endurnýja bragga fyrir 415 milljónir í stað þess að fjármagna frekar í þágu þeirra sem minna mega sín og barnanna í borginni. Nýlega hefur borgin fellt tillögu Flokks fólksins um að hafa gjaldfrjálsar skólamáltíðir. Fyrir 415 milljónir hefði mátt metta marga litla munna!!!

Borgarfulltrúi Flokks fólksins gefst ekki upp og leggur tillöguna aftur fyrir á þessum fundi en núna þannig að lækka gjald fyrir skólamáltíðirnar um þriðjung.

Hjá Velferðarsviði liggur enn óafgreidd tillaga um að lækka gjald frístundarheimila fyrir foreldra sem eru undir framfærslumiðviði Velferðarráðuneytis.

Börnin eru langt því frá að vera í forgangi hjá núverandi meirihluta að mati Flokks fólksins. Biðlistar eru hvarvetna, börn bíða eftir sálfræðiþjónustu, vitsmunagreiningum, 128 börn á biðlista eftir leikskólaplássi og á biðlista eftir félagslegu húsnæði eru 418 börn ásamt fjölskyldum sínum, samkvæmt nýlegri greiningu biðlistans.

 

Meirihlutinn meðvirkur

Tillögur felldar hver af annarri. Á fundi borgarráðs í gær var önnur tillaga Flokks fólksins er varðar Félagsbústaði felld. Tillögur er varða Félagsbústaði eru tilkomnar vegna fjölmargra kvartanna sem borist hafa allt frá því í kosningabaráttunni.

Eftirfarandi bókun var gerð á fundinum í gær:

Borgarfulltrúi Flokks fólksins hefur frá upphafi starfs verið að reyna að koma því áleiðis til borgarmeirihlutans að hjá Félagsbústöðum er margslunginn vandi m.a. viðmótsvandi og viðhaldsvandi og er álit þetta byggt á þeim fjölmörgum kvörtunum sem borist hafa. Ein tillaga  Flokks fólksins, sem lögð var fyrir borgarstjórn 19. júní og varðaði úttekt óháðs aðila á Félagsbústöðum s.s. leigusamningum og hvernig þeir eru kynntir leigjendum hefur nú þegar verið felld af meirihlutanum. Tillagan um að borgin hefji þá vinnu að skoða með raunhæfum hætti hvort færa eigi Félagsbústaði aftur undir A-hluta borgarinnar  hefur nú einnig verið felld. Borgarfulltrúa Flokks fólksins finnst hann tala fyrir daufum eyrum meirihlutans og upplifir meirihlutann jafnvel vera meðvirkan með ástandinu enda hefur ekki verið tekið undir neinar ábendingar eða athugasemdir sem fram hafa verið lagðar í þessu sambandi. Borgarfulltrúi Flokks fólksins væri ekki að vinna vinnuna sína ef hann hlustaði ekki á borgarbúa í þessu efni sem öðru. Fyrirtæki undir B hluta borgarinnar á ekki að vera fjarlægt hvorki minnihlutanum né fólkinu sem það þjónar. Starf borgarfulltrúa felst m.a. í því að fylgjast með öllum borgarrekstrinum og hafa afskipti ef á þarf að halda og mun borgarfulltrúi halda áfram að gera það í þeirri von að tekið verði á vandanum fyrir alvöru og til framtíðar.

Tvær aðrar tillögur þessu tengdar verða lagðar fyrir fund borgarstjórnar næstkomandi þriðjudag:

1. Tillaga áheyrnarfulltrúa Flokks fólksins um könnun á þjónustu Félagsbústaða. Lagt er til að fenginn verði óháður aðili til að gera könnun á þjónustumenningu Félagsbústaða í tengslum við samskipti starfsmanna fyrirtækisins við leigjendur. Við framkvæmd könnunarinnar skal leita til núverandi og fyrrverandi leigjenda og þá sem eru á biðlista eftir félagslegu húsnæði í dag og óska eftir að þeir taki þátt í könnuninni og veiti upplýsingar um álit sitt á viðmóti, viðhorfi og framkomu starfsmanna Félagsbústaða í þeirra garð. Greinargerð fylgir
   https://fundur.reykjavik.is/sites/default/files/agenda-items/64_tillaga_f_konnunfb_0.pdf

 

2. Tillaga áheyrnarfulltrúa Flokks fólksins um að fenginn verði óháður aðili til að meta viðhaldsþörf hjá Félagsbústöðum þar sem kvartanir hafa borist vegna myglu eða annarra galla. Lagt er til að þegar ágreiningur er uppi á milli leigjanda og Félagsbústaða verði fenginn óháður aðili til að leggja mat á viðhaldsþörfina. Í matinu skal jafnframt koma fram hvers lags viðgerða sé þörf og hvort viðgerðir hafi verið framkvæmdar með fullnægjandi hætti. Greinargerð fylgir.
   https://fundur.reykjavik.is/sites/default/files/agenda-items/58_tillaga_f_vidhaldfb_0.pdf

 

 

 

Kolbrún Baldursdóttir, borgarfulltrúi Flokks fólksins

Netfang: [e-mail]

1. 899-6783

 

Mannekla í leikskólum virðist viðvarandi vandamál í borginni, enn eru 128 börn á biðlista

Vetrarstarfið er nú hafið í leik- og grunnskólum og enn vantar í margar stöður á leikskólum borgarinnar. Eftir er að ráða í 61,8 stöðugildi í leikskólum miðað við grunnstöðugildi ásamt 22,5 stöðugildum sem vantar í afleysingu og enn eru 128 börn á biðlista eftir leikskólaplássi.

Þessi staða er með öllu óásættanleg. Mannekla í leikskólum er ekki nýtt vandamál og því þykir það sérkennilegt að borgin hafi ekki geta tekið á því með mannsæmandi hætti fyrir löngu, byrgt brunninn áður en vandinn varð svo stór að hann virðist óviðráðanlegur.

Ýmsar tillögur að lausn liggja fyrir og margar sannarlega metnaðarfullar.  Álagið sem þessu fylgir er ekki boðlegt börnunum og foreldrum þeirra hvað þá starfsfólki leikskólanna.

Ganga þarf lengra til að staðan verði fullnægjandi og til þess þarf meira fjármagn í málaflokkinn. Einkum tvennt hlýtur að skipta hvað mestu máli og það eru launin annars vegar og álag hins vegar. Alltof lengi hefur borgin sýnt stétt leikskólakennara og starfsmönnum leikskólanna lítilsvirðingu að mati borgarfulltrúa Flokks fólksins þegar kemur að launamálum. Inn í þetta spilar starfsálag sem hefur verið enn frekar íþyngjandi vegna langvarandi manneklu.

Það er ekkert sem skiptir meira máli en börnin okkar og allt sem varðar þau á borgin að setja í forgang þegar kemur að úthlutun fjármagns.

 

Ekki þörf á annars konar húsnæðiskerfi er mat fjármálaskrifstofu borgarinnar

Flokkur fólksins leggur til að Reykjavíkurborg hafi frumkvæði að umræðu við ríkið til að kanna hvort veita þurfi lífeyrissjóðum sérstaka lagaheimild til að setja á laggirnar leigufélög. Samhliða er lagt er til að Reykjavíkurborg hafi frumkvæði að því að leita eftir samvinnu og samstarfi við lífeyrissjóðina um að koma á laggirnar leigufélögum og muni borgina skuldbinda sig til að leggja til lóðir í verkefnið. Hugsunin er að hér sé um fyrirtæki að ræða sem hefur það ekki að markmiði að græða heldur munu sanngjarnar leigutekjur standa undir rekstri og viðhaldi eigna sem fjármagnið hefur verið bundið í. Hér er einnig verið að vísa til lífeyrissjóða sem skila jákvæðri ávöxtun á fé sjóðanna. Um er að ræða langtíma fjárfestingu fyrir sjóðina enda sýnt að það borgi sig að fjárfesta í steinsteypu eins og hefur svo oft sannast á Íslandi.

Greinargerð

Hjá lífeyrissjóðunum liggur mikið fé sem skoða mætti að nota til bygginga íbúða fyrir efnaminni einstaklinga sem eru og hafa verið í húsnæðisvanda eins og fram kemur í tillögunni Segja má að félagslega íbúðarkerfið sé í molum. Biðlistar þeirra sem sótt hafa um félaglegt húsnæði eru lengri en fyrir fjórum árum og sífellt berast kvartanir um að íbúðum sé ekki viðhaldið sem skyldi og að leiga hafi hækkað það mikið að hún er að sliga marga leigendur. Húsnæðisvandinn hefur tekið á sig æ alvarlegri myndir og þarf stórátak til að koma honum í eðlilegt horf. Grípa þarf til fjölbreyttra aðgerða til að mæta þörfum þeirra sem eru heimilislausir eða búa við óviðundandi aðstæður og þeirra sem eru að greiða leigu langt umfram greiðslugetu. Lífeyrissjóðirnir eru sjóðir sem flestir ef ekki allir hafa nægt fjármagn til að koma inn í samfélagsverkefni sem þetta. Margir eru nú þegar að taka þátt í annars konar verkefnum innan- sem utan lands svo sem hótelbyggingum. Hvað þetta verkefni varðar væru þeir að taka þátt í að þróa heilbrigðari húsnæðismarkað í Reykjavík fyrir fólkið sem greiðir í sjóðina. Þetta mun koma vel út fyrir allt samfélagið.

Lagt fram í borgarráði og afgreitt 23. ágúst með því að tillagan var felld.
Tillaga áheyrnarfulltrúa Flokks fólksins um samvinnu við ríki og lífeyrissjóði til að koma á fót öflugu félagslegu húsnæðiskerfi fyrir efnaminni fólk 

Umsögn fjármálaskrifstofu

Bókun Flokks fólksins:
Borgarfulltrú Flokks fólksins harmar að þessi tillaga hafi ekki fengið frekari skoðun hjá meirihlutanum. Svo virðist sem borgin telji nóg gert eða áætlað í húsnæðismálum samkvæmt upptalningu í umsögn fjármálaskrifstofu og meirihlutans og því óþarfi að leggja drög að nýjum hlutum eins og mögulegri samvinnu eða samtarfi við lífeyrissjóði. Einhverjir þeirra hafa síðustu ár verið að taka á hendur fjölbreyttari verkefni, jafnvel samfélagsverkefni.

Í tillögunni fólst að eiga frumkvæði að samtali, borgin með lóðir og lífeyrissjóðirnir með fjármagn. Auðvitað er það ákvörðun sjóðanna hvort þeim hugnast verkefni eins og hér um ræðir, hvort þeir hafi yfir höfuð áhuga á að leita leiða til að bæta aðbúnað sjóðsfélaga sinna hvað húsnæðismál varðar. Leiguíbúðir á viðráðanlegu verði myndu gjörbylta kjörum margra sjóðsfélaga auk þess sem lengi hefur verið vitað að fjárfesting í steypu er góð fjárfesting. Hér hefði því verið kjörið tækifæri fyrir borgina að hugsa út fyrir boxið og sjá hvar ný tækifæri kunna að liggja fyrir fólkið í borginni. Hvað varðar löggjafann telur Flokkur fólksins að á þessu upphafstigi sé óþarfi að ætla að hann komi til með að verða óyfirstíganleg hindrun.

Innflytjendur í Fellahverfi einangrast félags- og menningarlega

Nú er svo komið að stór hópur innflytjenda í Reykjavík hefur einangrast félagslega og menningarlega. Komið hefur fram að 70% af Fellaskóla eru börn innflytjenda og að aðeins 5 börn með íslensku að móðurmáli hefji skólagöngu í Fellaskóla í haust.

 

Gera má því skóna að fjölmargir innflytjendur hafi þar af leiðandi ekki náð að tengjast borgarsamfélaginu og blandast því með eðlilegum hætti. Ekki er að sjá að borgin hafi undanfarin ár mótað skýra stefnu um hvernig forða skuli innflytjendum frá því að einangrast eins og nú hefur gerst. Það er ljóst að þessi staða hefur verið að þróast í mörg ár og hefur borgarmeirihlutinn flotið sofandi að feigðarósi og ekki gætt þess að innflytjendur hafi blandast samfélaginu í Reykjavík nægjanlega vel, hvorki menningarlega né félagslega. Eftirfarandi fyrirspurnir voru lagðar fyrir borgarráð 23. ágúst sl.

1. Hvernig ætlar borgin að rjúfa einangrun innflytjenda í Fellahverfi?

2. Hvernig ætlar borgin að bregðast við menningarlegri og félagslegri einangrun þeirra sem þar búa, bæði til skemmri og lengri tíma.

3. Hvernig hyggst borgin ætla að standa að fræðslu og hvatningu til að innflytjendur geti með eðlilegum hætti blandast og samlagast íslensku samfélagi í framtíðinni?

 

 

Enginn nema óháður aðili sem kemur til greina í þetta verkefni

Fjölmargar kvartanir hafa borist frá leigjendum Félagsbústaða sem hafa leitað eftir viðgerð vegna myglu og öðru viðhaldi. Þess vegna mun eftirfarandi tillaga verða lögð fyrir fund borgarráðs á morgun 23. ágúst. 

Lagt er til að borgarráð samþykki að fá óháðan aðila til að meta eignir Félagsbústaða þar sem kvartanir hafa borist vegna myglu eða annarra galla þegar ágreiningur er uppi á milli leigjanda og Félagsbústaða. Í matinu skal jafnframt koma fram hvers lags viðgerða sé þörf og hvort viðgerðir hafi verið framkvæmdar með fullnægjandi hætti.

Greinargerð

Fjölmargar kvartanir hafa borist frá leigjendum Félagsbústaða sem hafa leitað eftir viðgerð vegna myglu og öðru viðhaldi. Leigjendur segjast ýmist ekki fá nein svör eða sein og þá ófullnægjandi viðbrögð. Beiðni um viðgerð er einfaldlega oft ekki sinnt og gildir þá oft einu hvort íbúar leggi fram læknisvottorð vegna heilsubrests, myndir af skemmdum vegna myglu og jafnvel vottorð frá öðrum sérfræðingum sem skoðað hafa húsnæðið.

Kvartað hefur verið undan myglu og rakaskemmdum í íbúðum og fullyrt að um sé að ræða heilsuspillandi húsnæði. Veikindi hafa verið tengd við myglu og raka í húsnæði sem Félagsbústaðir leigir út. Fjölskyldur hafa stundum þurft að flýja húsnæðið. Þetta fólk hefur sumt hvert ítrekað kvartað en ekki fengið lausn sinna mála hjá Félagsbústöðum sem hefur hunsað málið eða brugðist við seint og illa. Margir kvarta yfir að hafa verið sýnd vanvirðing og dónaskapur í samskiptum sínum við Félagsbústöðum. Oft er skeytum einfaldlega ekki svarað.

Þeir sem hafa kvartað yfir samskiptum sínum við Félagsbústaði segja að starfsfólk hafi sagt þeim bara að fara í mál. Hér um að ræða hóp fólks sem leigir í félagslegu húsnæðiskerfinu vegna þess að það er láglaunafólk, efnalítið og fátækt fólk. Þetta fólk hefur ekki ráð á að fara í mál við Félagsbústaði. Sumir hafa neyðst til þess og eru í kjölfarið skuldsettir umfram greiðslugetu. Það fólk sem stigið hefur fram með kvörtun af þessu tagi segir að Félagsbústaðir hafi ýmist neitað að þessi vandi sé til staðar eða hunsað hann. Í öðrum tilfellum hafa komið viðgerðarmenn og gert eitthvað smávegis en ekki ráðist að grunnvandanum. Mygla og annað sem fólk hefur verið að kvarta yfir hefur því haldið áfram að aukast og haft alvarleg áhrif á heilsu íbúa.  Reynslusögur fólks sem leigt hafa hjá Félagsbústöðum eru orðnar margar. Í einni slíkri segir kona frá að í íbúð á vegum Félagsbústaða hafi verið mygla og hafði hún ítrekað kvartað. Múrari hafi komið frá Félagsbústöðum til að athuga með leka og hafi sagt sér að ekki mætti fara í miklar aðgerðir sem kosta mikið. Því var bara settur „plástur“ á skemmdirnar sem dugði í ár. Það sem hefði þurft að gera var að rífa klæðningar inn að steypu og leyfa henni þorna. Þess í stað var farið í að múra upp í og loka. Hér má einnig lesa um sambærilega sögu mæðgna sem ítrekað þurftu að flýja heilsuspillandi húsnæði á vegum Félagsbústaða

http://www.visir.is/g/2018180529713

Haldnir hafa verið fjölmargir fundir vegna sambærilegra mála bæði við notendur/leigjendur og Félagsbústaði m.a. hjá Umboðsmanni borgarbúa. Svo virðist sem Félagsbústaðir séu ekki að greina nægjanleg vel hver viðhaldsþörfin er þegar kvörtun berst og þá til hvaða viðhaldsverka þarf að grípa til að leysa vanda með fullnægjandi hætti. Almennt viðhald virðist vera ábótavant á mörgum eignum Félagsbústaða.  Þegar kvörtun berst vísar Félagsbústaðir til heilbrigðisyfirvalda. Heilbrigðisyfirvöld styðjast við sjónpróf og lyktarpróf sem dugar oft ekki til til að finna hver grunnvandinn er. Iðulega er sagt við notendur „loftaðu bara betur út“. Af þessu að dæma er líklegt að endurskoða þurfi aðferðir sem heilbrigðiseftirlitið notar í málum af þessu tagi. 

Í mörgum tilvikum þarf ítarlegar greiningar til að komast að vandanum. Önnur fyrirtæki, einkafyrirtæki bjóða upp á nánari greiningu og kostnaðinn þurfa leigjendur iðulega sjálfir að bera en sem hafa eðli málsins samkvæmt enga fjárhagslega burði til. Í mörgum þessara tilvika er um lekavanda að ræða, vanda sem hefur e.t.v. verið mörg ár að þróast. Af frásögnum að dæma hjá mörgum virðist vera einhver mótþrói hjá Félagsbústöðum í að horfast í augu við að það þarf að setja fjármagn í fullnægjandi viðhald og bregðast við kvörtunum með fullnægjandi hætti. Ekki dugir að senda sífellt lögfræðinga á notendur Félagsbústaða. Nú er svo komið að taka þarf á þessu ástandi fyrir fullt og allt. Horfast þarf í augu við að Félagsbústaðir hafa víðtækum skyldum að gegna gagnvart öllum skjólstæðingum sínum. Hér er ekki um að ræða einkafyrirtæki eða banka. Félagsbústaðir getur ekki alltaf sett þessi mál bara í átakaferli. Hafa skal í huga að fólk er einnig misviðkvæmt gagnvart myglu. Mikilvægt er því að horfa á hvert tilvik fyrir sig í stað þessa að setja alla undir sama hatt. Endurskoða þyrfti alla verkferla Félagsbústaða af óháðum aðila og gera þá gagnsæja. Eftirlit með hvort Félagsbústaða séu að fylgja verkferlum virðist verulega ábótavant.

 

Upplýsingar í þessari greinargerð eru komnar frá  leigjendum Félagsbústaða og fleirum sem komið hafa að málum í tengslum við Félagsbústaða með einum eða öðrum hætti.

Sumir eru hræddir við að koma fram undir nafni

Vegna fjölmargra kvartana um meiðandi þjónustumenningu Félagsbústaða gagnvart notendum sínum verður eftirfarandi tillaga lögð fram í borgarráði á morgun 23. ágúst.

Lagt er til að borgarráð samþykki að fá óháðan aðila til að gera könnun á þjónustumenningu Félagsbústaða í tengslum við samskipti starfsmanna fyrirtækisins við leigjendur. Við framkvæmd könnunarinnar skal leita til núverandi og fyrrverandi leigjenda og þá sem eru á biðlista eftir félagslegu húsnæði í dag og óska eftir að þeir taki þátt í könnuninni og veiti upplýsingar um álit sitt á viðmóti, viðhorfi og framkomu starfsmanna Félagsbústaða í þeirra garð.

Greinargerð

Í langan tíma hafa notendur Félagsbústaða kvartað yfir neikvæðri framkomu starfsmanna í sinn garð. Kvartað er yfir neikvæðu og jafnvel meiðandi viðmóti, að þeim séu sýndir fordómar og dónaleg framkoma. Kvartað er yfir stjórnsýsluháttum Félagsbústaða, að notendur fái ekki svör við spurningum fyrr en seint og síðar meir og sumum erindum sé einfaldlega aldrei svarað. Notendur þjónustu Félagsbústaða kvarta yfir að þeir þurfi oft að hafa mikið fyrir hlutunum og að mikið vanti upp á að þeim sé sýnd virðing og tillitssemi. Sumir hafa jafnvel talað um að þeim hafi verið hótað af starfsfólki Félagsbústaða, ógnað og lítillægðir. Sumir notendur hafa sagst ekki þora að koma fram með kvörtun sína undir nafni af ótta við að verða með einhverjum hætti refsað. Margir hafa leitað til Umboðsmanns borgarbúa með mál sín. Fjölmargir notendur Félagsbústaða hafa auk þess kvartað yfir að þeir séu ekki upplýstir um réttarstöðu sína í þessum málum. Hafi þeir samband við Félagsbústaði með kvörtun sína er þeim vísað á lögfræðinga fyrirtækisins.

Á það skal bent að markmið Félagsbústaða er að þjónusta sem best fólk sem nýtir þjónustu þess.  Félagsbústaðir ættu að hafa sín gildi á hreinu.  Af þeim fjölmörgu kvörtunum skráðum og óskráðum sem notendur Félagsbústaða hafa borið á borð, má lýsa ástandinu við stríð, eins og Félagsbústaðir séu í stríði við notendur þjónustunnar í stað þess að sinna því þjónustuhlutverki sem fyrirtækinu er ætlað samkvæmt reglum.

Upplýsingar í þessari greinargerð eru komnar frá notendum og leigjendum Félagsbústaða og fleirum sem komið hafa að málum í tengslum við Félagsbústaði með einum eða öðrum hætti.

 

Ég er ekki komin í borgina til að láta fara vel um mig í þægilegum stól og hafa það huggulegt

Mér finnst áhugavert að lesa og heyra alls kyns skýringar bæði sérfræðinga og annarra á því sem gengið hefur á í borginni í vikunni. Sumar finnst mér alls ekki passa við það sem ég, sem borgarfulltrúi hef verið að upplifa síðustu daga og í sumar.

Varðandi þessi mál í vikunni höfum við í D M og F einfaldlega verið að bregðast við atferli og hegðun sem við erum ekki tilbúin að láta bjóða okkur og sem ég held að fæstir vildu láta bjóða sér. 

Í sumar hef ég nokkrum sinnum talað beint við meirihlutann um að vinna saman, vera meira saman í málum og á síðasta Velferðarráðsfundi stakk ég upp á að við stæðum saman að tillögu sem við vorum hvort eða er sammála um. 

Svo ég tali bara út frá sjálfri mér þá er ég þarna komin til að reyna að hafa áhrif til breytinga á því sem mér og Flokki fólksins finnst brýnt að breyta í borginni. Ég er ekki komin þarna til að hafa það huggulegt, fara í inniskóna og láta fara vel um mig í þægilegum stól. 

Síðustu árin hefur mér og fjölmörgum öðrum blöskrað aðgerðarleysi meirihlutans m.a. í málefnum er varða húsnæðismál og biðlista. Enda þótt margt hafi verið gert gott er einfaldleg líka mikið að sem við sem nú skipum meiri- og minnihluta verðum að laga. 

Ég hef verið með fjölmargar tillögur að úrbótum, margar unnar í samráði við borgarbúa og ég vil einfaldlega að þessar tillögur fái alvöru hlustun og skoðun hjá meirihlutanum og að einhverjar verði jafnvel að veruleika með eða án einhverra breytinga sem ég skil að stundum þurfi vissulega að gera á tillögum.

Meirihlutinn hefur völdin og hefur þess vegna allt í hendi sér hvaða tillögur okkar í stjórnarandstöðunni fá framgang og hvaða tillögum er ýtt út af borðinu.

Ein af mínum tillögum á síðasta borgaráðsfundi var einmitt um  samstarf og samvinnu til að hlutirnir gangi hraðar fyrir sig.  Mig langar bara virkilega að hjólin fari að snúast varðandi það sem brýnt er að bæta og breyta.

Hér koma tvær tillögur Flokks fólksins sem alls lagði fram sjö tillögur í borgarráð 16. ágúst. Þessar varða samstarf, samvinnu og skilvirkni.:

Tillaga áheyrnarfulltrúa Flokks fólksins um að stýrihópur um þjónustustefnu á velferðarsviði hafi samráð við önnur svið sem málið varðar 

Lögð er til aukin og þéttari samvinna og samstarf milli sviða. Nýlega var stofnaður stýrihópur sem hefur það markmið að móta heildstæða stefnu um þjónustu sem velferðarsvið veitir þeim hópi sem vegna veikinda eða annarra orsaka þarfnast fjölþættrar aðstoðar, þ. á m. þaks yfir höfuðið. Fjölmargir einstaklingar hafa lengi verið í húsnæðisvanda og enn öðrum bíður gatan eða vergangur næstu mánuði. Á þessu þarf að finna lausn hið fyrsta. Í stýrihópinn hefur nú þegar verið vísað tillögum að húsnæðisúrræðum sem kalla á lóðarstaðsetningu eða ákvörðun um að kaupa íbúðir/eignir. Það er þess vegna lagt til að strax frá upphafi komi til náins samstarfs og samvinnu við þau svið sem nauðsynlega þurfa að koma að þessum málum svo sem skrifstofu eigna og atvinnuþróunar sem annast kaup á sértæku húsnæði og átaksverkefnum og umhverfis- og skipulagssvið sem útvegar lóðir og sér um skipulag (smáhýsi, búsetukjarnar). 

Takist viðkomandi sviðum að vinna að lausn húsnæðisvandans í Reykjavík í sameiningu má gera því skóna að framkvæmdir taki skemmri tíma en ella.

Og önnur um meiri skilvirkni en að mínu viti ganga hlutirnir oft allt of hægt í borginni

Tillaga áheyrnarfulltrúa Flokks fólksins er varðar málsmeðferð, fyrirkomulag mála og fleira því tengt

1. Lagt er til að öllum erindum frá borgarbúum sem berast sviðum, ráðum, borgarfulltrúum og starfsmönnum Ráðhússins verði svarað innan 14 daga, ýmist með stuttu svari um móttöku eða efnislega. Í svari um að skeytið hefur verið móttekið komi fram að efnislegt svar berist eins fljótt og auðið er. 

2. Lagt er til að fyrirspurnum sem borgarfulltrúar leggja fram á fundum ráða eða nefnda sé svarað innan 20 daga. 

3. Lagt er til að mál (tillögur) borgarfulltrúa séu afgreidd innan mánaðar frá því að málið er lagt fram og komi þá aftur á dagskrá. 4. 

Lagt er til að skrifstofa borgarstjórnar haldi yfirlit yfir mál eftir því hverjir eru málshefjendur þeirra til að auka gagnsæi og rakningu mála. Um er að ræða yfirlit yfir tillögur, fyrirspurnir og önnur mál sem borgarfulltrúar leggja fram í borgarráði, borgarstjórn eða á nefndarfundum. Í yfirlitinu skal tiltekið á hvaða stigi málið er eða hvernig afgreiðslu það hefur fengið. Yfirlitið skal uppfært mánaðarlega og birt á heimasíðum borgarfulltrúa á ytri vef borgarinnar.

Flest önnur mál Flokks fólksins sem lögð hafa verið fram í sumar má finna á kolbrunbaldurs.is

 

Stórtíðindi. Meirihlutinn samþykkti sínar eigin tillögur í borgarráði í dag!!

Það var ólíku saman að jafna hvernig fréttamiðlar fjölluðu um neyðarfund borgarráðs í dag. Hjá einum miðli fannst mér vera heilmikil slagssíða. Fyrsta frétt, að meirihlutinn hafi samþykkt sínar eigin tillögur. Stórtíðindi!

Meirihlutinn í borginni er meirihluti og samþykkir vissulega sínar eigin tillögur og getur að sama skapi hafnað og svæft öll mál stjórnarandstöðunnar, þóknist honum svo.

Mér finnst það eigi ekki að vera fyrsta frétt hvað meirihlutinn samþykkti. Minni á að sumir borgarfulltrúar meirihlutans hafa verið við völd í mörg ár og hefðu getað samþykkt svona tillögur fyrir löngu. Þá væri þessi vandi heimilislausra ekki af þessari stærðargráðu.  Minnihlutinn er vonandi að hafa einhver áhrif þarna, þó allsendis óvíst hverju hann fær áorkað.  Minni á að hlutverk fjölmiðla er m.a. að veita stjórnvöldum aðhald! 

Vonbrigði

Ein af bókunum dagsins:

Nú hafa allar tillögur Flokks fólksins verið lagðar fyrir og ýmist verið frestað, vísað í ráð og ein felld.

Væntingar Flokks fólksins fyrir þennan neyðarfund sem stjórnarandstaðan óskaði eftir voru þær að meirihlutinn myndi taka tillögum stjórnarandstöðunnar með mun opnari huga en raun bar vitni.

Vonir stóðu til að teknar yrðu ákvarðanir um að framkvæma. Ganga til aðgerða!

Hvað varða tillögur meirihlutans voru flestar þeirra með einhvers konar fyrirvara eða skuldbindingum um sameiginlega ábyrgð sveitarfélaga eða háðar viðræðum við ríkið.

Flokkur fólksins vill benda á að þeir sem eru húsnæðislausir hafa ekki endalausan tíma til að bíða eftir úrræðum. Vandinn er núna og við honum þarf að bregðast hratt og örugglega.

Upplifun borgarfulltrúa Flokks fólksins er að borgarmeirihlutinn hafi verið ansi mikið á bremsunni á þessum fundi og frekar fátt bendir til þess að bretta eigi upp ermarnar af krafti fyrir veturinn til að laga stöðu þessa viðkvæma hóps.

 

Nóg komið af aðgerðarleysi í húsnæðismálum

Aukafundurinn vegna vaxandi vanda heimilislausra er í borgarráði í dag kl. 11. Tillögur Flokks fólksins eru fjórar og eru býsna fjölbreyttar enda þarfir og væntingar heimilislausra ólíkar. Tillögurnar hafa verið unnar í samvinnu við fjölmarga sem eru heimilislausir eða búa við óstöðugleika í húsnæðismálum sem og fleiri.

Flokkur fólksins er einnig með í öðrum sameiginlegum tillögum stjórnarandstöðuflokkanna. 

Greinargerðir með þeim má sjá á kolbrunbaldurs.is

Tillögurnar eru eftirfarandi:

Tillaga áheyrnarfulltrúa Flokks fólksins um samvinnu við ríki og lífeyrissjóði til að koma á fót öflugu félagslegu húsnæðiskerfi fyrir efnaminna fólk

Flokkur fólksins leggur til að Reykjavíkurborg hafi frumkvæði að umræðu við ríkið til að kanna hvort veita þurfi lífeyrissjóðum sérstaka lagaheimild til að setja á laggirnar leigufélög. Samhliða er lagt er til að Reykjavíkurborg hafi frumkvæði að því að leita eftir samvinnu og samstarfi við lífeyrissjóðina um að koma á laggirnar leigufélögum og muni borgina skuldbinda sig til að útvega lóðir í verkefnið. Hugsunin er að hér sé ekki um gróðafyrirtæki að ræða heldur munu sanngjarnar leigutekjur standa undir rekstri og viðhaldi eigna sem fjármagnið hefur verið bundið í. Hér er einnig verið að vísa til lífeyrissjóða sem skila jákvæðri ávöxtun á fé sjóðanna. Um er að ræða langtíma fjárfestingu fyrir sjóðina enda sýnt að það borgi sig að fjárfesta í steinsteypu eins og hefur svo oft sannast á Íslandi.

Tillaga áheyrnarfulltrúa Flokks fólksins um hjólhýsa- og húsbílabyggð

Lagt er til að borgin tilgreini svæði fyrir hjólhýsi og húsbíla til framtíðar í nálægð við alla helstu grunnþjónustu í Reykjavík. Það er ákveðinn hópur í Reykjavík sem óskar eftir því að búa í hjólhýsunum sínum og það ber að virða. Sem dæmi má nefna að það líður ekki öllum vel að búa í sambýli eins og í fjölbýlishúsum og finnst líka frelsi sem búseta í hjólhýsi eða húsbíl veitir henta sér. Sumir í þessum hópi sem hér um ræðir hafa átt hjólhýsi í mörg ár og hafa verið á flækingi með þau. Veturnir hafa verið sérlega erfiðir því þá loka flest tjaldstæði á landsbyggðinni. Á meðan verið er að undirbúa fullnægjandi hjólhýsa- og húsbýlagarð þar sem hjólhýsabyggð getur risið er lagt til að Laugardalurinn bjóði þennan hóp velkominn allt árið um kring þar til fundinn er hentug staðsetning þar hjólhýsabyggð getur risið í Reykjavík. Á það skal bent að í Laugardalnum er mikið og stórt autt svæði sem er ónotað. Þar er þjónustumiðstöð og sundlaug og stutt í alla aðra þjónustu.

Tillaga áheyrnarfulltrúa Flokks fólksins um að borgin kaupi ónotuðu húsnæði og innrétti íbúðir fyrir efnaminna fólk sem er húsnæðislaust eða býr við óstöðugleika í húsnæðismálum

Flokkur fólksins leggur til að borgin skoði frekari kaup á ónotuðu húsnæði í Reykjavík. Um gæti verið að ræða skrifstofuhúsnæði og í einhverjum tilfellum iðnaðarhúsnæði með það að markmiði að innrétta íbúðir sem ætlaðar eru þeim sem búið hafa við langvarandi óstöðugleika í húsnæðismálum og eru jafnvel enn á vergangi. Áhersla er lögð á að borgin sé ábyrgðaraðili þessa húsnæðis til að ávallt sé tryggt að það sé að öllu leyti fullnægjandi íbúðarhúsnæði. Tryggja þarf einnig að leiga verði ávallt sanngjörn og í samræmi við greiðslugetu leigjenda en hér er verið að tala um húsnæði fyrir fátækt fólk og aðra sem hafa engin tök á að leigja á húsnæðismarkaðinum eins og hann er í dag.

Tillaga áheyrnarfulltrúa Flokks fólksins um að nýkeyptir reitir í Breiðholti verði byggðir og leigðir út til fólks sem er í húsnæðisvanda

Lagt er til að borgin noti þá reiti sem hún hefur nýlega fest kaup á í Arnarbakki 2-6 í neðraBreiðholti og Völvufell 11 og 13-21 til að byggja íbúðir fyrir fjölskyldur sem hafa verið í húsnæðisvanda lengi og eiga í dag ekki fastan samastað. Fyrir þessa kjarna hefur borgin greitt rúmlega 752 milljónir króna og vel við hæfi þegar farið er að skipuleggja þessa reiti að forgangshópurinn verði þeir sem hafa verið á hrakhólum húsnæðislega, fjölskyldur jafnt sem einstaklingar. Fólk í húsnæðisvanda og heimilislausir og hópur þeirra sem ekki eiga fastan samastað sem þeir geta kallað heimili sitt hefur aukist síðustu árin. Biðlisti eftir félagslegu húsnæði hefur lengst sem sýnir að vandinn fer vaxandi með hverju ári. Nú þegar borgin hefur fest kaup á þessum tveimur kjörnum leggur Flokkur fólksins til að þeir verði nýttir að hluta til eða öllu leyti til uppbyggingar fyrir þá sem eru í og hafa lengi verið í húsnæðisvanda. Ýmist má hugsa sér að leiga íbúðirnar hjá leigufélögum sem eru óhagnaðardrifin eða selja þær á hagkvæmu verði sem efnaminna fólk ræður við að greiða án þess að skuldsetja sig langt umfram greiðslugetu. Mestu skiptir að gróðasjónarmið fái hér ekki ráðið.

Átt þú einhvers staðar heima?

Hér er ein hugmynd sem vel mætti skoða í ljósi vaxandi vanda í húsnæðismálum í Reykjavík.

Lagt fram í borgarráði 19. júlí af Flokki fólksins:

Heimilislausir hafa verið afgangsstærð borgarinnar árum saman. Heimilislausir eru fjölbreyttur hópur af öllum kynjum, á ólíkum aldri, einstaklingar, öryrkjar, barnafjölskyldur, einstæðir foreldrar og eldri borgarar. Að vera heimilislaus merkir að hafa ekki aðgang að húsnæði að staðaldri á sama stað þar sem viðkomandi getur kallað sitt heimili. Jafnframt þurfa að vera til úrræði fyrir utangarðsfólk s.s. fjölgun smáhýsa og þeir sem óska eftir að búa í húsbílum sínum þurfa framtíðarsvæði nálægt grunnþjónustu. Óhætt er að fullyrða að það ríki ófremdarástand í þessum málum í borginni, sérstaklega þegar kemur að húsnæði fyrir efnaminna og fátækt fólk. Það er verið að byggja í borginni, fasteignir sem í flestum tilfellum verða seldar fyrir upphæðir sem þessum hópum er fyrirmunað að ráða við að greiða. Félagslega íbúðakerfið er í molum í Reykjavík. Á biðlista bíða hundruð fjölskyldna eftir félagslegu húsnæði og mörg dæmi eru um að húsnæði á vegum Félagsbústaða sé ekki viðhaldið sem skyldi. Það er mat Flokks fólksins að hægt er að fara ólíkar leiðir í að auka framboð húsnæðis til að gera húsnæðismarkaðinn heilbrigðari. Má sem dæmi nefna að í viðtali við verkefnastjóra Kalkþörungaversmiðjunnar á Bíldudal á RÚV greindi hann frá innfluttum 50 fermetra timburhúsum frá Eistlandi, sem fullbúin kosta 16 milljónir.

Lögð fram svohljóðandi tillaga áheyrnarfulltrúa Flokks fólksins:

Lagt er til að borgin skoði fyrir alvöru að flytja inn timburhús frá Eistlandi sambærileg þeim sem flutt voru inn á Bíldudal með að það markmiði að gefa þeim einstaklingum og fjölskyldum sem búið hafa við viðvarandi óstöðugleika í húsnæðismálum tækifæri til að

Kynhlutlaus salerni í Reykjavík

Nú er fundargerð borgarráðs frá 19. júní komin á vefinn. Eitt af mörgum málum á dagskrá var tillaga meirihlutans um kynhlutlaus salerni í Reykjavík en hún var lögð fram á síðasta fundi mannréttindaráðs. Stjórnarandstaðan gerði eftirfarandi bókun:

Var ráðsmönnum í mannréttinda- og lýðræðisráði gerð grein fyrir því að tillaga um kynhlutlaus salerni og úttekt á klefa- og salernisaðstæðum í húsnæði í eigu Reykjavíkurborgar samræmist ekki reglum um húsnæði vinnustaða nr. 581/1995?

Það er lágmarkskrafa þegar mál eru komin til afgreiðslu í ráðum borgarinnar að búið sé að kanna lagalegan grundvöll þeirra.

Stjórnarandstaðan óskar eftir að fá fylgigögn og kynningu sem lögð voru fram undir 5. og 6. lið fundargerðarinnar.