Pabbi minn er ríkari en pabbi þinn?

Metingur af þessu tagi í hópi ungra barna fer sennilega hratt minnkandi og hver veit nema við heyrum aftur það sem margir muna e.t.v. eftir:
Pabbi minn er sterkari en pabbi þinn eða pabbi minn er lögga en ekki pabbi  þinn.

Þetta er eins og með tískuna og svo ótal margt annað. Við förum í hringi, það gamla kemur aftur, eitthvað sem talið var jafnvel gjörsamlega útilokað að myndi nokkurn tíman sjást framar.

Það er eitthvað notalegt við það að eiga von á að fá aftur þessi gömlu gildi inn í samfélagið, alla vega sum þeirra. Sjálfssagt koma þau mörg hver með nýju ívafi og breyttum áherslum.
Nú á maður von á að heyra:
Mamma mín er sterkari en mamma þín eða pabbi minn er betri kokkur en pabbi þinn.

Hvað veit maður hvað dúkkar upp í hugarheimi barna í því nýja og breytta þjóðfélagi sem blasir við. Börnin verða fljót að finna út hvað þeim finnst skipta máli og hvað þeim finnst markverðast.

Ný gildi, ný forgangsröðun, ný verkefni bíður nú allra aldurshópa.

 

Gera, gera ekki - líða, líða ekki í því umhverfi sem nú ríkir

Ég hef fáu að bæta við allar þær góðu ráðleggingar og huggunarorð sem nú streyma fram frá ýmsum stéttum og félagasamtökum.

Í síðdegisútvarpinu á Útvarps Sögu í gær með þeim Markúsi Þórhallssyni og Sigurði Sveinssyni fórum við í gegnum eitt og annað sem viðkemur áföllum, áfallahjálp, hvaða hópar fólks væru verst staddir andlega eins og nú árar, hvernig mætti sinna þeim betur og margt fleira í þessu sambandi.

Hvað varðar börnin langar mig hvað helst að skerpa á þeirri staðreynd að börn hafa áhyggjur í hlutfalli við áhyggjur sem þeir sjá að foreldrar þeirra hafa.

Hamfaratal í áheyrn barna getur verið mjög skaðlegt þeim og gildir þá einu um hverslags hamfarir um er að ræða svo fremi sem þau óttast að þær muni hafa áhrif á þeirra líf.

Þegar litlar sálir er nærri sem hafa ríka athyglisgáfu og stór eyru er ágætt að hafa þessi atriði í huga:

-Vera sjálf róleg og forðast að óskapast yfir að nú sé allt að fara til fjandans
-Sannfæra þau um að öryggi þeirra sé tryggt, nálægð foreldrana er tryggð, heimili, skólinn og vinirnir
-Útskýra í samræmi við aldur og þroska hvað verið er að segja í fjölmiðlum og hvað almenningur er að tala um
-Gæta þess að hafa eigin ytri ásýnd sem eðlilegasta og sýna léttleika, kátínu eins og kostur er.

 

Úff ... neikvæðar fréttir á forsíðu visir.is

Sem dæmi:

Lífeyrissjóðurinn tapar tugum milljarða

Bauhaus hættir við opnun hér á landi

Eignir íslenskra fyrirtækja að hrynja

Hundruð manna missa vinnu í Landsbankanum

Fyrsta jákvæða fréttin er :

Uma Thurman í inniskóm - mynd

Þetta er það sem kemur upp á forsíðunni og er ekki beint upplífgandi eða þannig.

Uppgreiðsluþóknun hjá SPRON, viljir þú greiða inn á lán

Þeir fyrirfinnast sem vilja gjarnan greiða inn á lán eða jafnvel greiða upp verðtryggt lán ekki hvað síst núna þegar fyrirsjáanlegt er að verðbólgan mælist há á komandi misserum.

Vilji einstaklingur sem dæmi greiða inn á höfuðstól húsnæðisláns hjá SPRON þarf hann að greiða 2% til bankans í svokallaða uppgreiðsluþóknun.

Dæmi:

Viljir þú greiða 1.5 milljón inn á lán sem er um 9 milljónir verður þú að greiða 30.000.- krónur í uppgreiðsluþóknun til bankans.

Ég hringdi í talsmann neytenda og spurði hann um þetta því mig minnir að uppgreiðslugjald hafi verið mikið til umræðu ekki alls fyrir löngu og að þá hafi verið rætt um að afnema bæri slíkt gjald.

Reyndar var þá verið að tala um gjald sem fólk þyrfti að greiða ætlaði það sér að greiða lánið upp að fullu. Það kann að vera að búið sé að afnema slíkt gjald í sumum  og kannski öllum viðskiptabönkunum en eftir stendur að viljir þú greiða inn á lán er þessi uppgreiðsluþóknun greinilega raunverulegt fyrirbæri.

 

Að búa í röngum líkama og ferli þess að leiðrétta kyn

Í næsta þætti Í Nærveru Sálar sem sýndur verður 8. október mun Anna K. Kristjánsdóttir, vélstýra fræða okkur um og ræða málefni tengd því ferli þegar einstaklingur fær kyn sitt leiðrétt

Hún skilgreinir hugtök eins og  trangender, transsexual og transvestite og ræðir um Félagið Trans Ísland.

Aðrir umræðufletir í þættinum:

-Aðdragandi kynskiptaaðgerðar, aðgerðin sjálf og lífið í kjölfarið.
-Munurinn á aðgerðum hér á landi og þeim sem framkvæmdar eru í Danmörku og síðan í Svíþjóð
-Kynhneigðin og kynhvötin
-Samfélagið, viðhorf og viðhorfabreytingar
-Andleg líðan þessa hóps
-Rannsóknir

Upplýsandi umræða um þennan minnihlutahóp samfélagsins.

Léttlyndi að eilífu þekkir ei neinn

Í nærveru sálar ég sit,
skynja manneskjuna sterkt.

Hvað er það í lífinu sem gefur lit?
Leitar og finnur sá sem það vill.

En lífið er meira en leikur einn,
léttlyndi að eilífu þekkir ei neinn.

Í lífsins skóla lærist margt,
lausnir í draumum felast.

 

Og svo er það virðingin:

Að vanda virðingu sína,
er val sérhvers manns.

Velsæmis gæta og lögum lúta,
láta engan sér múta.

Rætnar tungur og rógburður,
rífa, níða og meiða.

Eiturgróurnar fáum eira,
ef andann og sálina ná að seiða.

Góðan sunnudag

Hetjur vikunar eru þjónustufulltrúar og gjaldkerar bankanna

Afgreiðslufólk bankanna eru hetjur vikunar. Þetta fólk hefur verið undir miklu álagi síðustu daga. Stöðugar hringingar, löng röð af fólki sem bíður afgreiðslu, fyrirspurnir og án efa fjölmargar spurningar sem afgreiðslufólkið hefur ekki haft svör við.

Þjónustufulltrúar og gjaldkerar bankanna eru ekki í þeim hópi starfsmanna sem taka stórar eða afgerandi ákvarðanir um rekstur eða reglur bankanna. Afgreiðslufólkið ber því enga ábyrgð á þeim vanda sem bankarnir glíma nú við. Afgreiðslufólkið er hins vegar andlit bankanna út á við.
Þetta er fólkið sem maður sér og ræðir við fari maður í bankann til að eiga við hann viðskipti.

Í vikuni sem er að líða hefur verið mikið álag á þetta starfsfólk. Það hefur verið í því hlutverki að reyna að róa áhyggjufulla viðskiptavini og stundum orðið að taka við skömmum frá fólki sem vegna kvíða og óöryggis, fann hjá sér þörf til að hnýta í afgreiðslufólkið.

Því má ekki gleyma að afgreiðslufólkið sjálft er einnig í hópa viðskiptavina. Eins og aðrir er afgreiðslufólkið líka uggandi um sinn hag og óttast jafnvel að vera sagt upp störfum sínum.  

Ég vil hrósa afgreiðslufólki allra banka landsins fyrir að hafa staðist þetta álag og fyrir að hafa sýnt skjólstæðingum bankanna umburðarlyndi og þolinmæði við svo mjög erfiðar aðstæður.

Þetta eru hetjur vikunar. 

Þjóðstjórn bjargar engu, orku og tíma betur varið í að leita lausna

Ekki er séð að myndun þjóðstjórnar sé einhver lausn. Það eina sem þjóðstjórn breytir er að það verður jú engin stjórnarandstaða til. Gagnrýni á stjórnina hverfur og flokkarnir verða samábyrgir fyrir öllum ákvörðunum.

Ef marka má orð alþingismanna og ráðherra í gær eru allir sammála um að vandinn er stór og á hann þarf að ráðast og leysa. Það er því bara tíma og orkueyðsla að hefja myndun þjóðstjórnar.  

Áföll og jákvæðni

Jákvæðni, jákvæðistal og almenn bjartsýni er sannarlega gulls ígildi þessa dagana og okkur öllum sterkt haldreipi.

Það eru þó til þær aðstæður þar sem jákvæðistal virkar ekki sem skyldi. Sem dæmi nær slíkt tal frekar skammt ef því er skellt fram strax við áfall eða fyrstu stundirnar eftir að fólk verður fyrir áfalli.  Á slíkum stundum, meðan fólk er að gera sér grein fyrir þeim atburði/aðstæðum sem veldur áfallinu gildir fátt annað en nærvera, umhyggja, hlustun og þolinmæði.

Tal um styrkleika og jákvæðni á viðkvæmasta tímapunktinum getur virkað þannig að þeim sem hefur orðið fyrir áfallinu finnst að verið sé að gera lítið úr líðan sinni. Tími jákvæðistalsins kemur aðeins seinna þegar sálin hefur fengið að melta það sem gerst hefur og þá atburði/aðstæður sem kallaði á áfallsástandið.

Aðstæður í þjóðfélaginu núna, sérstaklega efnahagsaðstæður, valda mörgum kvíða og ótta. Þeir eru eflaust ófáir sem eru uggandi um hag sinn.  Ástæðurnar geta verið af ýmsum sökum. Sumir hafa tapað fé, e.t.v. megnið af sparnaði sínum eða hafa á einhvern hátt tengst fyrirtækjum sem nú hafa orðið eða eru á leið í gjaldþrot. Þetta er ekkert endilega fólkið sem hægt er að segja við,  þér var nær eða þú hefði geta sagt þér þetta sjálfur osfrv. 

Sumir eru sannarlega fórnarlömb þessara erfiðu aðstæðna og hefðu fátt getað gert til að sporna við þeirri þróun sem orðið hefur í málum þeirra. Þessir einstaklingar eru kannski núna í miklu áfalli í bókstaflegri merkingu þess orðs. Einkennin geta verið allt frá skjálfta, svitakófi, maga- og höfuðverk, svefnörðugleikum og þunglyndi. Fólk er dofið og finnst það ekki getað hugsað heila hugsun. Margir eru jafnvel óvinnufærir eða ófærir um að taka helstu ákvarðanir í lífi sínu. Þessi einkenni mildast hægt og rólega og má ætla að sérhver dagur gefi ögn skárri líðan. 

Það er á þessum tímapunkti sem illa kann að passa að fara að koma með mikið jákvæðistal eins og t.d. þetta er nú ekki svo slæmt, líttu nú á allt það góða, enginn hefur dáið osfrv.

Slíkt tal er kærkomið síðar,  jafnvel eftir fáeinar klukkustundir eða daga allt eftir því hversu alvarlegt áfallið var manneskjunni. En fyrst þarf að hlúa að viðkomandi og gefa einstaklingnum tíma til að skynja og skilja hvað hefur gerst, hver áhrifin eru og hverjar eru afleiðingarnar.

Sem sagt, jákvæðni eins mikilvæg og góð eins og hún er, þá skilar hún sér ekki alltaf.
Þeir sem vilja hjálpa með því að benda þeim sem eiga erfitt á allt það jákvæða, þurfa svolítið að þreifa fyrir sér hvernig móttökuskilyrðin eru þá og þá stundina.

Tímabært að þingmannamál komi úr nefndum

Óteljandi þingmannamál hafa verið lögð til hvílu í nefndum Alþingis. Kannski ekki til hinstu hvílu ef skoðun forseta þingsins sem hann gerði heyrinkunnuga við setningu þingsins í gær, fær einhvern hljómgrunn.

Það er tímabært að endurskoða með breytingu í huga það furðulega fyrirkomulag að þingmannamál sofni í nefndum og liggi þar árum saman ef ekki áratugum.  Bak við sérhvert þingmannamál er oftast nær mikill undirbúningur þingmanna sem hafa gert sér far um að leggja mál sín fram af kostgæfni. En sjaldgæft er að þingmannamál komist úr nefndum og hljóti áframhaldandi afgreiðslu þingsins.

Nú vill Sturla Böðvarsson, forseti Alþingis að gengið verði í að breyta þessu þannig að þingmannamál fái afgreiðslu frá Alþingi á því kjörtímabili sem þau eru lögð fram.

Orð í tíma töluð, nú er bara spurning hvort orðin verði að verki?
Ekki er nóg að tala, það þarf líka að framkvæma.  

Hvar er nú best að geyma sparnaðinn?

Dagurinn í dag var engum líkur og mun eflaust verða í minnum hafður.

Á Hrafnaþingi milli 8 og 10 í kvöld á ÍNN voru atburðir dagsins ræddir. Gestir úr fjármálaheiminum mættu til Ingva Hrafns og voru m.a. spurðir hvar fólk ætti nú helst að geyma sparnaðinn sinn þ.e. sé eitthvað enn eftir af honum.

Einhver nefndi við mig í dag að kannski væri bara best að sækja krónurnar og stinga þeim til geymslu í skóskápinn sinn. 

Vonandi er þetta nú ekki alveg svo slæmt.  Þó er líklegast rétt að yfirgefa alla áhættu og leita í öruggari sjóð. Hægt er að kaupa ríkisbréf bæði óverðtryggð og verðtryggð. Það þykir nokkuð öruggur geymslustaður fyrir fé næstu misserin.

Þeir sem enn eiga eitthvað eftir í hlutabréfum velta því fyrir sér hvort þeir eigi að selja það sem eftir er áður en allt er horfið eða bíða aðeins og sjá hvort ástandið á mörkuðum skáni eitthvað smá.
Fáir þora að ráðleggja nokkuð í þessum efnum, ekki einu sinni færustu fjármálaspekúlantar.

 

 

Sjósund er shockmeðferð

Það nýjasta nýtt er að skella sér í sjósund.  Hópur fólks stundar það nú að fara í ískaldan sjóinn og synda. Viðbrögð líkamans við skyndilegum kulda hlýtur að vera shock?

Er þetta heilsusamlegt?
Já, kannski fyrir þá sem eru stálhraustir.
En hvað með þá sem hafa einhverja heilsufarslega veikleika t.d. veikt hjarta eða aðra sjúkdóma?
Þeirri spurningu verða aðrir en ég að svara.

Líkamshitinn er venjulega um 37 gráður en sjórinn t.d. í Nauthólsvík hlýtur að vera 10 gráður eða kaldari.  Þegar hann er kaldastur fer hann jafnvel niður í (og niður fyrir) frostmark. Ég veit svo sem ekki hvort sjóbaðsunnendur stunda sjósund um hávetur þegar sjórinn er svo kaldur.

Við það að skella sér til sunds í svo köldum sjó má gera ráð fyrir að heilinn taki viðbragð og sendi út skilaboð um að varðveita skuli líkamshitann eins og hægt er. Húðin lokast, vöðvar dragast saman og einhvers konar shockástand myndast.  Halda þarf brjóstinu heitu umfram allt sem og öðrum mikilvægum líffærum. 

Sjósund kann að hafa sína kosti. Kannski styrkir svona shockmeðferð líkamann, gefið að hann sé heilbrigður. Með styrkingunni eykst þol og þá stenst líkaminn jafnvel enn betur áreiti og álag (sjúkdóma og streitu)?

Vitað er, að það er flestum hollt að reyna eitthvað á sig, púla og svitna.  Rannsóknir hafa sýnt að það er gott fyrir líkamskerfið að koma púlsinum upp og leyfa allri vélinni að vinna.
Að henda sér til sunds í ískaldan sjó kann að gera sama gagn?

Sálrænu áhrifin við sjósund er ekki erfitt að skilja. Að synda í hinu víðáttumikla hafi, öldurótinu og briminu er án efa magnað. Upplifunin leysir úr læðingi orku og afl og eins og einhver sagði, tíminn annað hvort stöðvast að er einfaldlega ekki til.
Hvað sem þessum vangaveltum líður, óska ég sjósundfólki góðrar skemmtunar í sjónum. 

 

Þegar barn eignast barn

Þegar unglingstúlka eignast barn er ekki skrýtið að hún velti því fyrir sér hvort hún sé með forræðið þar sem hún er ekki einu sinni með forræðið yfir sjálfri sér.

Unglingsstúlka sem uppgötvar það að hún eigi von á barni er í erfiðum sporum.  Hún er ekki fullveðja og því algerlega háð forráðamönnum sínum sem bera á henni ábyrgð til 18 ára aldurs. Þann stuðning sem hún þarfnast til að eignast og ala upp barn þarf hún að sækja til sinna nánustu.

Þá er spurningin hvort hennar nánustu séu í stakk búnir til að veita henni slíkan stuðning. Það er ekki sjálfgefið að allar fjölskyldur sem finna sig í þessum sporum hafi burði til að hjálpa barninu sínu enda um að ræða mikinn stuðning til langs tíma. Ástæða þess að fjölskyldur eiga e.t.v. erfitt með að taka á sig þetta hlutverk geta verið af ýmsum toga og margþættar.

 

Smá slys, saltaði pönnkökurnar í stað þess að sykra.

Það voru einhver áhöld um það hvort það var ég eða móðir mín sem ætti 84 ára afmæli í dag þegar í ljós kom að ég hafði saltað pönnukökurnar í stað þess að sykra þær.

Í tilefni afmælisdags hennar bauð ég sem sagt upp á saltaðar, upprúllaðar pönnukökur.

Þetta er víst ekki fyrsti skandallinn í eldhúsinu sem ég verð uppvís að. Enn er í minnum haft þegar ég, fyrir 27 árum bakaði svona ægilega fínar hálfmánakökur með málshætti inn í.  Í lok kaffiboðsins mundi ég allt í einu eftir að ég hafði gleymt að segja fólkinu að vara sig á að borða ekki málsháttinn.

Það var um seinan, gestirnir höfðu bara gleypt pappírinn með kökunni.

Meiri græðgin í þessu fólki.
Mér voru alla vega ekki vandaðar kveðjurnar þann daginn og hef ekki bakað hálfmánakökur síðan.

Krafin um að borga meðlagsskuld foreldris eftir andlát þess

.Það virkar sérkennilegt að lenda í þeirri stöðu að verða að greiða meðlagsskuld foreldris síns vegna sjálfs síns eftir að það foreldri er fallið frá.
Sú staða gæti auðveldlega komið upp að einstaklingur verði krafinn um að greiða meðlagsskuld foreldris eftir andlát þess foreldris.
Innheimtustofnun Sveitarfélaga vill eðli málsins samkvæmt fá skuldina greidda hvort sem skuldarinn er lífs eða liðinn. 

Tilbúið dæmi sem þó gæti verið raunverulegt:

Pabbi (mamma) greiddi ekki meðlag með mér í mörg ár. Við andlátið sat eftir útistandandi meðlagsskuld ásamt uppsöfnuðum dráttavöxtum hjá Innheimtustofnun Sveitarfélaga. Innheimtustofnunin gerði kröfu í dánarbúið og niðurstaðan varð sú að ég varð að greiða skuldina.

Hér sést að afkomandinn sem meðlagið snerist um verður greiðandi. Sé engin innistæða í dánarbúinu fyrir meðlagsskuldinni getur afkomandinn beðið um opinber skipti og er þá laus allra mála. Séu einhverjar eignir í búinu gerir Innheimtustofnun sveitarfélaga kröfu í búið um að þær verði teknar upp í meðlagsskuldina. Sá hluti eignarinnar gengur þar að leiðandi ekki til erfingjans. Erfinginn er barnið sem þetta sama foreldrið greiddi ekki meðlagið með þegar það var undir 18 ára aldri.

Eftir að hafa velt þessu fyrir sér spyr maður sig hvort skynsamlegt sé að forðast Innheimtustofnun Sveitarfélaga sem millilið, þegar meðlag er annars vegar.
Ef skuldin hrannast upp vegna vanskila foreldris kemur hún bara í hausinn á barninu, sem þá er orðinn fullorðinn einstaklingur, þegar skuldarinn (foreldrið) fellur frá.

Mænan ráðgáta þegar kemur að mænuskaða

Í dag hefst söfnunarátak á Stöð 2 til styrktar Mænuskaðastofnun Íslands. Hún er stofnuð af mæðgunum Auði Guðjónsdóttur og Hrafnhildi G. Thoroddsen en Hrafnhildur hlaut mænuskaða þegar hún slasaðist í bílslysi fyrir mörgum árum.

Mænan er það líffæri sem leiðir flest taugaboð líkamans.  Hún hefur verið rannsökuð talsvert en þegar kemur að mænuskaða er hún ráðgáta.

Hérlendis búa um 100 manns við mænuskaða og tæplega 50% er tilkominn af völdum umferðarslysa.
Mæðgurnar Auður og Hrafnhildur hafa barist fyrir málefnum mænuskaðaðra af ólýsanlegri þrautseigju og elju.

Leggjum þessu málefni lið, það er í þágu okkar allra.

Magnús Þór skorar á Sigurð Kára að vera næstur á bekkinn

Þátttöku í skoðanakönnun um val á nafni þáttarins er lokið. Mikill meirihluti var á því að þátturinn ætti að heita það sem hann var skírður í upphafi eða
Í nærveru sálar.

Á mánudaginn næstkomandi verður sendur út þátturinn með Magnúsi Þór Hafsteinssyni.
Í viðtalinu leyfir hann okkur að kynnast sér nánar með því að veita innsýn í hugarheim sinn, sálarlíf og daglega tilveru.
Hverjir styrkleikar, veikleikar, stóráföll, mistök og stórsigrar Magnúsar eru, kemur í ljós á mánudaginn.

Í lok þáttarins skoraði Magnús á Sigurð Kára Kristjánsson að koma næstur á bekkinn.

Magnús Þór Hafsteinsson á bekknum í settinu hjá ÍNN

Magnús Þór Hafsteinsson ætlar að koma til mín í dag í viðtal í þættinum Í Nærveru sálar sem við köllum líka stundum einfaldlega Sálartetrið.  Í þættinum pælum við í sál, fjöllum sem sagt um innri mál og atferli.

En eins og sést hér til hliðar í skoðanakönnuninni eru vangaveltur um nafnið á þættinum. Af þeim niðurstöðum sem komnar eru virðist sem Í nærveru sálar sé  vinsælast. Ég þakka þeim sem þegar hafa gefið sér tíma til að taka þátt í könnuninni. 

ÍNN er hægt að ná núna víðast hvar og er rás 20.

Í viðtalinu ætlar Magnús að leyfa okkur að skyggnast inn í hugarheim sinn, sálarlífið og daglega tilveru. Hann deilir með okkur lífsskoðunum sínum og gildismati. 

Hverjir eru styrkleikar hans, veikleikar, helstu mistök og stærstu sigrar?
Hvernig skyldi Magnús Þór höndla mótlæti og hvað hefði hann viljað gera öðruvísi?
Hvernig sýnir hann gleði, reiði og vonbrigði?
Hver eru markmið hans og hver er stóri draumurinn?

Við fáum vonandi í þessu viðtali tækifæri til að kynnast Magnúsi sem persónu. Eins og margir vita þá þekkjum oft ekki stjórnmálamennina okkar vel sem persónur og þess vegna verður gaman að fá tækifæri til að kynnast Magnúsi nánar.

Magnús mun síðan hugsanlega í lok þáttarins skora á einhvern annan stjórnmálamann að vera næstur á bekkinn.

 

Breiðhyltingar bregða á leik

Breiðholtshátíðin sem er menningar- og fjölskylduhátíð Breiðholts hefst í dag mánudaginn 15. september með metnaðarfullri dagskrá víðs vegar í Breiðholtinu. Hr. Ólafur Ragnar Grímsson, forseti Íslands heiðrar Breiðhyltinga með nærveru sinni fyrsta dag hátíðarinnar.
Forsetinn setur hátíðina með formlegum hætti á Hjúkrunarheimilinu Skógarbæ, Félagsmiðstöðinni Árskógum 4 kl. 14:00. Við setninguna verður opnuð málverkasýning heyrnarlausra myndlistarmanna. Sögurútan fer um hverfið kl. 17:00.

Hátíðin nær hápunkti sínum á hátíðarsamkomu sem haldin verður í Íþróttahúsinu Austurbergi á sjálfan Breiðholtsdaginn 20. september þar sem Hanna Birna Kristjánsdóttir, borgarstjóri mun ávarpa samkomuna og afhenda heiðursviðurkenningarskjöl.

Breiðholtið hefur á að skipa gríðarlega margbrotnu mannlífi. Margbreytileikinn sést m.a. á því hversu margar fjölskyldur af ólíkum uppruna búa í Breiðholti.  Kjarni hátíðarinnar er að íbúar hverfisins fái tækifæri til að kynnast nágrönnum sínum og að fyrirtæki, stofnanir og félagasamtök í Breiðholti eigi þess kost að kynna íbúum starfssemi sína. Boðið verður upp á fjölbreytta viðburði fyrir öll aldurskeið. Lögð er áhersla á að sem flestir taki þátt og að allir geti fundið eitthvað við sitt hæfi.

Breiðhyltingar bjóða Alþjóðahús velkomið í hverfið sem opnar með viðhöfn þriðjudaginn 16. september kl. 17. Með tilkomu Alþjóðahúss í Breiðholtið skapast tækifæri til að auka enn frekar fjölmenningarleg samskipti í Breiðholti. Fyrr um daginn verður opnuð sýning á myndum ljósmyndasamkeppni sem haldin var í Breiðholti í sumar. Myndefnið var mannlíf og umhverfi í Breiðholti.

Leikskólabörn munu heimsækja Árbæjarsafn og eldri borgarar í Breiðholti fara í vinabæjarheimsókn til eldri borgara í Reykjanesbæ. Í göngugötunni í Mjódd verður haldin kynning á Námsflokkunum og einnig verður kökubasar og kynning á Kvenfélaginu Fjallkonunum í Hólagarði.

Í Breiðholti er fjölskyldan í fyrirrúmi. Málþing um málefni fjölskyldunnar verður haldið í Menningarmiðstöðinni Gerðubergi á fimmtudeginum eftir hádegi. Fulltrúar frá öllum helstu stofnunum sem koma að málefnum fjölskyldunnar munu halda fyrirlestra.

Eldri borgarar og grunnskólabörn eru með ýmis dans,- og söngatriði á takteinum að ónefndu pottakaffi í Breiðholtslaug alla morgna vikunnar. Foreldrar í Breiðholti munu treysta böndin á foreldramorgni í Breiðholtskirkju á föstudeginum og ekki má gleyma að minna á prjónakaffið með góðum gesti hjá Félagsstarfi Gerðubergs einnig á föstudeginum.   

Skipulagðar göngur eru fyrirhugaðar; Seljaganga með Guðrúnu Jónsdóttur, arkitekt og bókmenntaganga Borgarbókasafnsins. Kaffihúsið í Miðbergi býður göngugörpum í kaffi að lokinni göngu.

Kórar, söng,- og danshópar láta til sín taka í hátíðarvikunni. Vinabandið lætur sig ekki vanta og mun m.a. spila og syngja í Fríðuhúsi.

Á hátíðarsamkomunni munu unglingar úr Breiðholtsskóla sýna atriði úr Grease og ÍR danshópurinn taka sporið.Fjölmargar samveru,- og kyrrðarstundir sem og guðþjónustur og fyrirbænastundir verða haldnar í kirkjum Breiðholts þessa viku. Samkomuhald verður t.d. í Seljaskóla í umsjón barnastarfs Miðbergs. Messa verður í Maríukirkjunni við Raufarsel alla virka daga og ensk messa verður haldin í Maríukirkjunni á laugardeginum.

Íþróttafélag Reykjavíkur (ÍR) mun ekki láta sitt eftir liggja. Á laugardeginum munu deildir ÍR kynna starfsemi sína. Hoppukastali verður á staðnum, boðið verður til grillveislu og unglingaráð knattspyrnudeildarinnar blæs til uppskerufagnaðar svo fátt eitt sé nefnt.

Hér er einungis birt brot af þeirri viðamiklu dagskrá sem sett hefur verið saman í tilefni Breiðholtsdaga 2008. Breiðhyltingar eru hvattir til að fjölmenna á sem flesta viðburði og samverustundir sem haldnar eru víðs vegar í Breiðholti þessa viku.  Samhugur og samvera íbúanna er merki um hversu stoltir Breiðhyltingar eru af hverfinu sínu og hversu umhugað þeim er að gæða í það enn fjölbreyttara lífi og hlúa að ímynd þess og íbúum.

Bregðum á leik í Breiðholti vikuna 15-20 september 2008.